అరేబియా సముద్రం ప్రస్తుతం అల్లకల్లోలంగా మారింది. రుతుపవనాల ప్రభావంతో ఏర్పడిన 'శక్తి' తుఫాను క్రమంగా తీవ్ర తుఫానుగా మారి భయంకరంగా విరుచుకుపడుతోంది. ముఖ్యంగా గుజరాత్ తీరం వెంబడి సముద్రం భయంకరంగా మారింది. దీనికి సంబంధించి భారత వాతావరణ శాఖ (IMD) కీలక హెచ్చరికలు జారీ చేసింది.
ఈ తుఫాను గుజరాత్, మహారాష్ట్ర రాష్ట్రాలపై తీవ్ర ప్రభావం చూపనుందని ఐఎండీ వెల్లడించింది. కాబట్టి ఆయా తీర ప్రాంతాల ప్రజలు, ముఖ్యంగా మత్స్యకారులు మరియు ముంబై నగరవాసులు అత్యంత అప్రమత్తంగా ఉండాలని వాతావరణ శాఖ సూచించింది.
'శక్తి' తుఫాను శక్తి ఏ స్థాయిలో ఉందో తెలుసుకోవడానికి వాతావరణ శాఖ ఇచ్చిన వివరాలు ఇవి: ఈ తుఫాను ప్రభావంతో గంటకు 100 కిలోమీటర్ల వేగంతో గాలులు విపరీతంగా వీచే అవకాశం ఉందని వాతావరణ శాఖ తెలిపింది.
తుఫాను ప్రస్తుతం గుజరాత్లోని ద్వారక దగ్గర పశ్చిమ నైరుతి దిశగా తీరం నుంచి సుమారు 420 కిలోమీటర్ల దూరంలో కేంద్రీకృతమై ఉందని వెల్లడైంది.
ఈ తుఫాను అరేబియా సముద్రంలోకి మరింత లోపలికి కదులుతోంది. అరేబియా సముద్రంలో నెలకొన్న ఈ భయంకరమైన వాతావరణం కారణంగా మత్స్యకారులు సముద్రంలోకి వెళ్లడం పూర్తిగా నిషేధించబడింది.
వచ్చే మంగళవారం వరకు వాయువ్య, ఈశాన్య, మధ్య అరేబియా సముద్రం, గుజరాత్, ఉత్తర మహారాష్ట్ర తీరాల వెంబడి మత్స్యకారులు చేపల వేటకు వెళ్లొద్దని ఐఎండీ కఠినంగా సూచించింది. ఆదివారం వరకు గుజరాత్, ఉత్తర మహారాష్ట్ర తీరం, పాకిస్తాన్ తీరం వెంబడి సముద్రంలో అల్లకల్లోలంగా ఉంటుందని, భారీ అలలు ఎగిసిపడే అవకాశం ఉందని హెచ్చరించింది.
ఇటీవలే భారీ వర్షాలు, వరదలతో తల్లడిల్లిన ముంబై మహా నగరానికి ఐఎండీ మరోసారి భారీ వర్ష సూచన చేసింది. ఈ 'శక్తి' తుఫాను ప్రభావంతో ముంబైలో భారీ నుంచి అతిభారీ వర్షాలు కురిసే అవకాశం ఉందని తెలిపింది.
ముంబైతో పాటు థానే, పాల్హర్, రాయ్డ్, రత్నగిరి, సింధుదుర్గ్ వంటి జిల్లాల్లో కూడా అక్టోబర్ 4 నుంచి 7 వరకు భారీ వర్షాలు, బలమైన గాలులు వీచే అవకాశం ఉందని వాతావరణ శాఖ హెచ్చరించింది.
అక్టోబర్ 4 నుంచి 5 వరకు ఉత్తర మహారాష్ట్ర తీరం వెంబడి గంటకు 65 కి.మీ వేగంతో విపరీతమైన వేగంతో గాలులు వీస్తాయని పేర్కొంది. తీరం వెంబడి నివసించే ప్రజలు మరియు ముంబై వాసులు ఈ తుఫాను ప్రభావాన్ని దృష్టిలో ఉంచుకుని కొన్ని ముఖ్యమైన జాగ్రత్తలు తీసుకోవాలి:
అత్యవసరం అయితే తప్ప ప్రయాణాలు, ముఖ్యంగా సముద్ర తీరం వెంబడి ప్రయాణాలు వాయిదా వేయడం మంచిది.గాలులు బలంగా వీచే అవకాశం ఉన్నందున, బలహీనంగా ఉన్న కట్టడాల కింద, పాత చెట్ల కింద నిలబడటం లేదా ఆశ్రయం తీసుకోవడం సురక్షితం కాదు.
ఎప్పటికప్పుడు IMD ఇచ్చే తాజా వాతావరణ అంచనాలను, స్థానిక అధికారులు ఇచ్చే సూచనలను గమనిస్తూ ఉండండి. 'శక్తి' తుఫాను ప్రభావం పూర్తిగా తగ్గే వరకు అందరూ అప్రమత్తంగా ఉండి, సురక్షిత ప్రాంతాల్లో ఉండాలని కోరుకుందాం.
