నెల్లూరు నగరంలో డాక్టర్ ఏపీజే అబ్దుల్ కలాం అంతర్జాతీయ పాఠశాల ఏర్పాటుకు మంత్రి నారాయణ శంకుస్థాపన చేశారు. వక్ఫ్ బోర్డు ఆధ్వర్యంలో ఈ పాఠశాల నిర్మాణం జరగనుంది. పేద విద్యార్థులకు నాణ్యమైన విద్య అందించాలనే లక్ష్యంతో ఈ స్కూల్ను ఏర్పాటు చేస్తున్నట్లు మంత్రి తెలిపారు. నెల్లూరు పరమేశ్వరినగర్లో వక్ఫ్ బోర్డుకు చెందిన ఐదు ఎకరాల స్థలంలో ఈ అంతర్జాతీయ పాఠశాల నిర్మాణం చేపడుతున్నారు.
ఈ స్కూల్ నిర్మాణానికి సుమారు రూ.20 కోట్ల వరకు వ్యయం అవుతుందని అంచనా వేశారు. ఎన్సీసీ గ్రూపు ఈ పాఠశాల భవనానికి డిజైన్ రూపొందించింది. అవసరమైన నిధులను కార్పొరేట్ సోషల్ రెస్పాన్సిబిలిటీ (సీఎస్సార్) ద్వారా సమీకరిస్తామని మంత్రి నారాయణ వెల్లడించారు. ఈ స్కూల్ పూర్తిస్థాయిలో ఆధునిక సౌకర్యాలతో నిర్మించనున్నారు.
శంకుస్థాపన కార్యక్రమంలో వక్ఫ్ బోర్డు రాష్ట్ర ఛైర్మన్ అబ్దుల్ అజీజ్, ఎమ్మెల్యే కోటంరెడ్డి శ్రీధర్రెడ్డి, నగర ఇంఛార్జ్ మేయర్ రూప్కుమార్ యాదవ్, నుడా ఛైర్మన్ శ్రీనివాసులురెడ్డి, శాసనమండలి మాజీ ఛైర్మన్ షరీఫ్ తదితర ప్రముఖులు పాల్గొన్నారు. మంత్రి నారాయణ కుమార్తె శరణి కూడా ఈ కార్యక్రమంలో పాల్గొన్నారు.
నెల్లూరు నగరంలో ఎన్నికల ప్రచారం సందర్భంగా తాను సుమారు 84 వేల ఇళ్లను సందర్శించానని మంత్రి నారాయణ తెలిపారు. ఆ సమయంలో పేద కుటుంబాల పిల్లలకు నాణ్యమైన విద్య ఎంత అవసరమో గుర్తించానని చెప్పారు. అందుకే ఈ అంతర్జాతీయ పాఠశాల ఏర్పాటు నిర్ణయం తీసుకున్నామని, ఈ స్కూల్లో విద్య పూర్తిగా ఉచితంగా అందిస్తామని స్పష్టం చేశారు.
జూన్ 12 నాటికి ఈ పాఠశాలలో అడ్మిషన్లు ప్రారంభిస్తామని మంత్రి నారాయణ వెల్లడించారు. నగరంలోని 15 ప్రభుత్వ పాఠశాలల అభివృద్ధికి కూడా పలు సంస్థలు, వ్యక్తులు సహకారం అందిస్తున్నారని తెలిపారు. మైనార్టీల పట్ల ముఖ్యమంత్రి చంద్రబాబు నాయుడుకు ప్రత్యేకమైన అభిమానం ఉందని ఎంపీ వేమిరెడ్డి ప్రభాకర్రెడ్డి పేర్కొన్నారు. ఈ పాఠశాల ద్వారా పేద విద్యార్థుల భవిష్యత్తు మారుతుందని ఆయన ఆశాభావం వ్యక్తం చేశారు.
