Chandrababu: జిల్లా కలెక్టర్లకు సీఎం చంద్రబాబు ఛాలెంజ్.. వచ్చే సదస్సు నాటికి 28 జిల్లాల నుంచి..

• ఏజెంట్ల మోసాలకు ఇక చెక్: కోనసీమ 'సెంటర్ ఫర్ మైగ్రేషన్' ప్రయోగం రాష్ట్రవ్యాప్తం చేయాలని ఆదేశం..
   
• డిజిటల్ హెల్త్ & వైజాగ్ 1: చిత్తూరు, విశాఖ జిల్లాల టెక్నాలజీ ఆవిష్కరణలను మెచ్చుకున్న ముఖ్యమంత్రి..

Chandrababu Meeting With District Collectors: ముఖ్యమంత్రి చంద్రబాబు నాయుడు కలెక్టర్ల సదస్సులో మాట్లాడుతూ రాష్ట్రవ్యాప్తంగా వివిధ జిల్లాల్లో అమలవుతున్న ఉత్తమ విధానాలను ప్రశంసించడమే కాకుండా, వాటిని మిగిలిన జిల్లాలకు స్ఫూర్తిగా తీసుకోవాలని పిలుపునిచ్చారు. నెట్ జీరో కాన్సెప్టులో భాగంగా అనకాపల్లి జిల్లాలోని హాస్టళ్లు, పాఠశాలల్లో కిచెన్ గార్డెన్ల నిర్వహణ అద్భుతంగా ఉందని, అలాగే కరువు నేలగా పేరున్న అన్నమయ్య జిల్లాలో జలసిరులు కురిపించేలా ఆ జిల్లా కలెక్టర్ చేసిన వినూత్న ఆలోచనలు అభినందనీయమని పేర్కొన్నారు. ఇలాంటి చొరవనే ప్రతి కలెక్టర్ తీసుకోవాల్సిన అవసరం ఉందని ఆయన స్పష్టం చేశారు. విశాఖపట్నం జిల్లాలో ప్రజలకు ఎంతో ఉపయోగకరంగా ఉన్న 'వైజాగ్ 1' యాప్‌ను, చిత్తూరు జిల్లాలో ఆరోగ్యానికి సంబంధించిన వ్యక్తిగత డిజిటల్ రికార్డుల రూపకల్పనను సీఎం ప్రత్యేకంగా మెచ్చుకున్నారు. సంజీవని ప్రాజెక్టును అన్ని జిల్లాల్లోనూ సమర్థంగా అమలు చేస్తే అద్భుతమైన ఫలితాలు వస్తాయని ఆయన ఆశాభావం వ్యక్తం చేశారు.

విదేశాలకు వెళ్లే వారి రక్షణ కోసం కోనసీమ జిల్లాలో ఏర్పాటు చేసిన 'సెంటర్ ఫర్ మైగ్రేషన్' ప్రయోగంపై ముఖ్యమంత్రి సానుకూలంగా స్పందించారు. గల్ఫ్ వంటి దేశాలకు వెళ్లే వారు ఏజెంట్ల మోసాలకు గురికాకుండా ఉండటానికి ఈ కేంద్రం ఎంతగానో దోహదపడుతుందని, దీనిని రాష్ట్రవ్యాప్తంగా అమలు చేసేలా జీఏడీ (GAD) తక్షణ చర్యలు తీసుకోవాలని ఆదేశించారు. ప్రవాసాంధ్రులను రక్షించడానికి ఏపీఎన్ఆర్టీ (APNRT) తో కలిసి పనిచేయాలని, ఏజెంట్ల మోసాల వల్ల ఎవరూ నష్టపోకూడదని ఆయన ఉద్ఘాటించారు. 

భూ వివాదాల పరిష్కారంలో నెల్లూరు జిల్లా అనుసరిస్తున్న విధానం సత్ఫలితాలను ఇస్తోందని, పీజీఆర్ఎస్ (PGRS) లో నమోదైన ఫిర్యాదులను వర్గీకరించి సమస్యలను పరిష్కరిస్తున్న తీరును మిగిలిన జిల్లాల్లోనూ అమలు చేయాలని సూచించారు. గత ప్రభుత్వ హయాంలో ప్రైవేటు భూములను 22ఏ జాబితాలో చేర్చడం వల్ల ప్రజలు ఇబ్బందులు పడ్డారని, ఇటీవల డోన్ పర్యటనలో ఇలాంటి ఘటనలు తన దృష్టికి వచ్చాయని ఆయన గుర్తుచేశారు.

రాష్ట్రంలో ఎక్కడా భూవివాదాలు లేని పరిస్థితిని కల్పించడమే ప్రభుత్వ లక్ష్యమని, కోర్టుల్లో ఏళ్ల తరబడి పెండింగ్‌లో ఉన్న కేసులను మీడియేషన్ ద్వారా పరిష్కరించే ప్రయత్నం చేయాలని కలెక్టర్లకు దిశానిర్దేశం చేశారు. విజయనగరం జిల్లాను ఉత్తరాంధ్ర హార్టికల్చర్ హబ్ గా మార్చడం గొప్ప విషయమని, సంప్రదాయ పంటల నుంచి వాణిజ్య పంటల వైపు రైతుల్ని మళ్లించడం ద్వారా వారు అధిక సంపదను సృష్టించగలుగుతారని సీఎం వివరించారు. 

ఉత్తరాంధ్ర వలసల నివారణకు కలెక్టర్లు తీసుకుంటున్న చర్యలను ఆయన అభినందించారు. జిల్లాల్లోని సమస్యలను కేవలం సమస్యలుగా కాకుండా సవాళ్లుగా స్వీకరించి, వినూత్న ఆలోచనలు మరియు ఆవిష్కరణలతో పరిష్కారం వెతకాలని పిలుపునిచ్చారు. ప్రస్తుతం అందుబాటులో ఉన్న వనరులతోనే వివాదాలను వేగంగా పరిష్కరించాలని, ఇప్పుడు ప్రదర్శించిన 7 సక్సెస్ స్టోరీల తరహాలో వచ్చే కలెక్టర్ల సదస్సు నాటికి మొత్తం 28 జిల్లాల నుంచి 28 విజయగాథలు రావాలని ముఖ్యమంత్రి చంద్రబాబు నాయుడు లక్ష్యంగా నిర్దేశించారు.