ఆంధ్రప్రదేశ్లో విమానయాన రంగంలో మరో గొప్ప అడుగు పడబోతోంది. ఉత్తరాంధ్ర అభివృద్ధికి కీలకంగా భావిస్తున్న భోగాపురం అంతర్జాతీయ విమానాశ్రయం నిర్మాణ పనులు వేగంగా కొనసాగుతున్నాయి. ఈ ప్రాజెక్టు ఇప్పటికే 91.7 శాతం పూర్తయిందని కేంద్ర పౌర విమానయాన మంత్రి కింజరాపు రామ్మోహన్ నాయుడు వెల్లడించారు. 2026 జూన్ నాటికి ఈ విమానాశ్రయాన్ని ప్రారంభించాలనే లక్ష్యంతో ప్రభుత్వం కృషి చేస్తోందని ఆయన తెలిపారు. ఈ ఎయిర్పోర్ట్ పూర్తి అయితే, ఉత్తరాంధ్ర ప్రాంతం వ్యాపారం, పర్యాటకం, ఉపాధి రంగాల్లో విప్లవాత్మక మార్పులు దిశగా అడుగులు వేస్తుందని ఆయన అన్నారు.
కేంద్ర మంత్రి రామ్మోహన్ నాయుడు ఇటీవల భోగాపురం విమానాశ్రయ నిర్మాణ స్థలాన్ని సందర్శించారు. ప్రధాన టెర్మినల్ భవనం, రన్వేలు, టాక్సీవేలు, బ్యాగేజ్ హ్యాండ్లింగ్ సిస్టమ్ వంటి కీలక సదుపాయాల నిర్మాణ పనులను పరిశీలించారు. ఈ సందర్భంగా ఆయన, ప్రాజెక్టు ప్రతీ అంశం ప్రపంచ స్థాయి ప్రమాణాలతో పూర్తవ్వాలని, ఉత్తరాంధ్ర సాంస్కృతిక ప్రత్యేకత ప్రతిబింబించేలా డిజైన్లో మార్పులు చేయాలని సూచించారు. అలాగే, GMR మరియు L&T సంస్థలతో సమీక్షా సమావేశం నిర్వహించి, మిగిలిన పనులను అత్యంత వేగంగా పూర్తి చేయాలని ఆదేశించారు.
విమానాశ్రయానికి సంబంధించి ట్రయల్ రన్ ఈ ఏడాది చివర్లో లేదా వచ్చే జనవరి ప్రారంభంలో నిర్వహించే అవకాశం ఉందని రామ్మోహన్ నాయుడు వెల్లడించారు. విమానాశ్రయం చుట్టూ ఐదు స్టార్ హోటళ్లు, రిసార్టులు నిర్మాణ దశలో ఉన్నాయని తెలిపారు. దీని వలన స్థానిక యువతకు ఉపాధి అవకాశాలు పెరుగుతాయని, ఇతర ప్రాంతాలకు వలస వెళ్లే అవసరం తగ్గుతుందని చెప్పారు. విశాఖపట్నం కంటే ఎక్కువ విమానాల రాకపోకలు భోగాపురంలో ఉండేలా సదుపాయాలు కల్పిస్తున్నామని ఆయన తెలిపారు.
ఈ ప్రాజెక్టు పూర్తయిన తర్వాత భోగాపురం విమానాశ్రయం ఉత్తరాంధ్ర ప్రాంత అభివృద్ధికి ఆర్థిక, వాణిజ్య, పర్యాటక కేంద్రంగా మారబోతోందని కేంద్ర మంత్రి అన్నారు. గ్లోబల్ స్టాండర్డ్స్కు తగ్గ సదుపాయాలతో ఈ ఎయిర్పోర్ట్ నిర్మాణం జరుగుతుందని తెలిపారు. అంతేకాకుండా, విమానాశ్రయానికి చేరుకోవడానికి కొత్త రోడ్లు, బ్రిడ్జిలు నిర్మాణంలో ఉన్నాయని, దీనివల్ల ప్రయాణ సమయం గణనీయంగా తగ్గుతుందని ఆయన చెప్పారు.
కేంద్ర మంత్రి రామ్మోహన్ నాయుడు తన ట్వీట్లో కూడా ఈ ప్రాజెక్టుపై గర్వం వ్యక్తం చేశారు. “ప్రధాన మంత్రి నరేంద్ర మోదీ, ముఖ్యమంత్రి చంద్రబాబు నాయుడు దూరదృష్టి నాయకత్వంలో ఈ ప్రతిష్టాత్మక ప్రాజెక్టు 2026 జూన్ నాటికి పూర్తవుతుందని విశ్వాసం ఉంది. ఇది ఉత్తరాంధ్ర అభివృద్ధికి కొత్త శకం తెరుస్తుంది,” అని ఆయన పేర్కొన్నారు. భోగాపురం ఎయిర్పోర్ట్ పూర్తయితే, ఆంధ్రప్రదేశ్ ఆర్థిక రూపురేఖలు మారనున్నాయని నిపుణులు అభిప్రాయపడుతున్నారు.
