ఆంధ్రప్రదేశ్ ప్రభుత్వం ప్రజలకు డిజిటల్ సేవలను మరింత చేరువ చేయడానికి మరో కీలక నిర్ణయం తీసుకుంది. “మన మిత్ర” వాట్సాప్ ఆధారిత సేవలపై ప్రజల్లో అవగాహన కల్పించేందుకు రాష్ట్ర ప్రభుత్వం కొత్త కార్యక్రమాన్ని ప్రారంభిస్తోంది. ఈ కార్యక్రమం 2025 నవంబర్ 7వ తేదీ (శుక్రవారం) నుండి ప్రారంభమవుతుంది. ప్రతి శుక్రవారం గ్రామ, వార్డు సచివాలయాల సిబ్బంది ఇంటింటికీ వెళ్లి ఈ సేవల గురించి ప్రజలకు తెలియజేయనున్నారు.
ప్రతి శుక్రవారం నిర్వహించే ఈ డోర్ టు డోర్ క్యాంపెయిన్లో గ్రామ, వార్డు సచివాలయాల సిబ్బంది ప్రజలకు వాట్సాప్ ద్వారా ప్రభుత్వ సేవలు ఎలా పొందాలో ప్రత్యక్షంగా చూపిస్తారు. డెమో ప్రదర్శనలు, పాంప్లెట్ పంపిణీ, QR కోడ్ స్కానింగ్ ద్వారా సేవల వినియోగం వివరించబడుతుంది. ప్రతి ఇంటిని కవర్ చేస్తూ, నమోదైన పౌరుల వివరాలు సేకరించనున్నారు. ఈ చర్య ద్వారా గ్రామస్థాయి ప్రజల్లో డిజిటల్ సేవల వినియోగం పెరుగుతుంది.
విభిన్న శాఖలకు చెందిన సిబ్బంది తమ రంగాలకు సంబంధించిన సేవలపై అవగాహన కల్పిస్తారు. ఉదాహరణకు — ఎనర్జీ అసిస్టెంట్లు విద్యుత్ బిల్లులు, కొత్త కనెక్షన్లు, ఫిర్యాదులపై వాట్సాప్ ద్వారా సేవల వివరాలు అందిస్తారు. అలాగే వ్యవసాయ, ఉద్యాన, వెటర్నరీ, ఫిషరీస్, హెల్త్ శాఖల సిబ్బంది ఆయా రంగాలకు సంబంధించిన డిజిటల్ సేవలను ప్రజలకు వివరించనున్నారు. దీని ద్వారా ప్రజలు తాము ఎదుర్కొనే సమస్యలను ఇంటి వద్ద నుంచే పరిష్కరించుకునే అవకాశం కలుగుతుంది.
ఈ కార్యక్రమం సమర్థవంతంగా సాగేందుకు పంచాయతీ సెక్రటరీలు, వార్డ్ అడ్మినిస్ట్రేటివ్ సెక్రటరీలు సమన్వయం చేస్తారు. ప్రతి జిల్లాలో గ్రామ, వార్డు సచివాలయాల అధికారులు క్యాంపెయిన్ ప్రగతిని పర్యవేక్షించి, నవంబర్ 8వ తేదీ నాటికి రిపోర్ట్ పంపించాలి. మున్సిపల్ కమిషనర్లు, ఎంపీడీవోలు ఈ కార్యక్రమానికి అవసరమైన లాజిస్టిక్స్, ప్రచార సామగ్రి, సాంకేతిక మద్దతు అందిస్తారు.
ఏపీ ప్రభుత్వం “మన మిత్ర”ను వాట్సాప్ గవర్నెన్స్లో భాగంగా రూపొందించింది. ప్రజలకు సేవలను సులభంగా, వేగంగా అందించే లక్ష్యంతో ఈ డిజిటల్ వేదికను ప్రవేశపెట్టింది. కానీ చాలామందికి దీనిపై పూర్తి అవగాహన లేకపోవడంతో ప్రభుత్వం ఈ క్యాంపెయిన్ ప్రారంభించింది. ఈ కార్యక్రమం ద్వారా రాష్ట్ర వ్యాప్తంగా ప్రజలు ప్రభుత్వ సేవలను సులభంగా పొందగలరని, డిజిటల్ ఆంధ్రప్రదేశ్ దిశగా ఇది ఒక పెద్ద ముందడుగు అవుతుందని అధికారులు భావిస్తున్నారు.
