రాష్ట్రంలోని ఏడు నగరాల్లో స్మార్ట్ స్ట్రీట్ వెండింగ్ మార్కెట్ల ఏర్పాటుకు ఏపీ ప్రభుత్వం అనుమతినిచ్చింది. పట్టణాల్లోని స్వయం సహాయక సంఘాల్లోని మహిళలు, వీధి వ్యాపారులు దీని ద్వారా లబ్ధి పొందనున్నారు. ఇటీవల శ్రీపొట్టి శ్రీరాములు నెల్లూరు జిల్లా మైపాడు రోడ్డులో ప్రయోగాత్మకంగా 'స్మార్ట్ స్ట్రీట్ వెండింగ్ మార్కెట్' ఏర్పాటు చేశారు. దీనికి మంచి స్పందన రావడంతో రాష్ట్ర వ్యాప్తంగా నిర్వహించాలని ప్రభుత్వం తాజాగా అనుమతులు జారీ చేసింది.
మెప్మా ద్వారా 7 పట్టణ ప్రాంతాల్లో ఏర్పాటుకు అనుమతులిచ్చింది. అనంతపురం, కర్నూలు, తాడేపల్లి - మంగళగిరి, ఒంగోలు, శ్రీకాకుళం, విజయవాడ, వైయస్సార్ కడప మున్సిపల్ కార్పొరేషన్లలో స్మార్ట్ స్ట్రీట్ వెండింగ్ మార్కెట్లు ఏర్పాటు కానున్నాయి. మున్సిపాలిటీలు, బ్యాంకుల ద్వారా లబ్ధిదారులకు రుణాలు ఇప్పించనున్నారు. గరిష్టంగా 200 వరకు దుకాణాలను ఏర్పాటు చేసి పొదుపు మహిళలకు కేటాయించనున్నారు.
