AP Govt: ఏపీలో ఐఏఎస్ అధికారుల బదిలీ.. నలుగురు ఉన్నతాధికారులకు కొత్త పోస్టింగులు!

• "ఐటీడీఏలకు కొత్త సారథులు": ఏజెన్సీ ప్రాంతాల అభివృద్ధిపై ప్రభుత్వం ప్రత్యేక ఫోకస్..
   
• Politics: "కోనసీమ జేసీగా నిడియా దేవి": వేచి చూస్తున్న ఐఏఎస్ అధికారికి కీలక బాధ్యత..

AP Govt: ఆంధ్రప్రదేశ్ రాష్ట్ర పాలనా యంత్రాంగంలో కీలక మార్పులు చేస్తూ ప్రభుత్వం నలుగురు ఐఏఎస్ అధికారులను బదిలీ చేసింది. ఈ మేరకు ప్రభుత్వ ప్రధాన కార్యదర్శి (సీఎస్) జి. సాయి ప్రసాద్ ఆదివారం అధికారిక ఉత్తర్వులు జారీ చేశారు. తాజా బదిలీల్లో భాగంగా విజయవాడలో కమర్షియల్ ట్యాక్స్ జాయింట్ కమిషనర్‌గా విధుల్లో ఉన్న 2021 బ్యాచ్ ఐఏఎస్ అధికారి సూరపాటి ప్రశాంత్ కుమార్‌ను పోలవరం జిల్లా జాయింట్ కలెక్టర్ మరియు అదనపు జిల్లా మేజిస్ట్రేట్‌గా నియమించారు. దీనికి అదనంగా ఆయనకు రంపచోడవరం ఐటీడీఏ ప్రాజెక్ట్ ఆఫీసర్‌గా మరియు కొత్త ఆర్డీవో వచ్చేవరకు రంపచోడవరం సబ్-కలెక్టర్‌గా కూడా పూర్తి అదనపు బాధ్యతలు (FAC) అప్పగిస్తూ ప్రభుత్వం నిర్ణయం తీసుకుంది.

ప్రభుత్వ ఆదేశాల ప్రకారం, గత కొంతకాలంగా పోస్టింగ్ కోసం వేచి చూస్తున్న వైఖోమ్ నిడియా దేవికి డాక్టర్ బీఆర్ అంబేద్కర్ కోనసీమ జిల్లా జాయింట్ కలెక్టర్‌గా బాధ్యతలు కట్టబెట్టారు. అదేవిధంగా, రంపచోడవరం సబ్-కలెక్టర్‌గా సేవలందిస్తున్న శుభమ్ నోఖ్వాల్‌ను చింతూరు ఐటీడీఏ ప్రాజెక్ట్ ఆఫీసర్‌గా బదిలీ చేశారు. ఆయన తన విధులతో పాటు చింతూరు సబ్-కలెక్టర్‌గా కూడా అదనపు బాధ్యతలను నిర్వర్తించనున్నారు. ఏజెన్సీ ప్రాంతాల్లో పాలనను మరింత వేగవంతం చేసేందుకు గానూ ఈ యువ అధికారులకు ఐటీడీఏ ప్రాజెక్ట్ ఆఫీసర్లుగా కీలక బాధ్యతలు అప్పగించినట్లు తెలుస్తోంది.

మరోవైపు, పార్వతీపురం సబ్-కలెక్టర్ వైశాలి ఆర్‌ను అదే ప్రాంత ఐటీడీఏ ప్రాజెక్ట్ ఆఫీసర్‌గా నియమిస్తూ ప్రభుత్వం ఉత్తర్వుల్లో పేర్కొంది. కొత్త ఆర్డీవో నియామకం పూర్తయ్యే వరకు ఆమె సబ్-కలెక్టర్‌గా కూడా అదనపు బాధ్యతలను కొనసాగిస్తారు. కాగా, రంపచోడవరం ఐటీడీఏ పీవోగా పనిచేసిన బాచు స్మరణ్ రాజ్‌ను బదిలీ చేసిన ప్రభుత్వం, ఆయనను సాధారణ పరిపాలన శాఖలో (GAD) రిపోర్ట్ చేయాలని ఆదేశించింది. రాష్ట్రంలో పాలనాపరమైన అవసరాలు మరియు ఏజెన్సీ ప్రాంతాల అభివృద్ధిని దృష్టిలో ఉంచుకుని ప్రభుత్వం ఈ నిర్ణయం తీసుకున్నట్లు అధికార వర్గాలు వెల్లడించాయి. ఐఏఎస్ అధికారుల ఈ బదిలీలు తక్షణమే అమలులోకి రానున్నాయి.