Electricity: విద్యుత్ ఛార్జీలు తగ్గింపు లక్ష్యం! సంస్కరణలపై సీఎం చంద్రబాబు దృష్టి!
Electricity Charges: రాష్ట్రంలో విద్యుత్ రంగాన్ని మరింత బలోపేతం చేయడంతో పాటు ప్రజలపై భారం తగ్గించే దిశగా ప్రభుత్వం కీలక చర్యలు చేపడుతోంది. విద్యుత్ కొనుగోలు ధర యూనిట్ రూ. 4కు తగ్గాలన్నదే లక్ష్యం.
విద్యుత్ సంస్థల రుణాలు తీరేలా ప్రణాళిక..
ప్రజలపై విద్యుత్ భారం తగ్గేలా సంస్కరణలు..
విద్యుత్ శాఖ పై సమీక్షలో ముఖ్యమంత్రి చంద్రబాబు..
రాష్ట్రంలో విద్యుత్ రంగాన్ని మరింత బలోపేతం చేయడంతో పాటు ప్రజలపై భారం తగ్గించే దిశగా ప్రభుత్వం కీలక చర్యలు చేపడుతోంది. ఈ మేరకు సీఎం చంద్రబాబు మంగళవారం సచివాలయంలో విద్యుత్ శాఖపై సమీక్ష నిర్వహించి పలు కీలక సూచనలు చేశారు.
విద్యుత్ కొనుగోలు ధర తగ్గించడమే లక్ష్యం
రాష్ట్రంలో విద్యుత్ కొనుగోలు ధరను యూనిట్కు రూ.4 వరకు తగ్గించాలని సీఎం స్పష్టమైన ఆదేశాలు ఇచ్చారు. ప్రస్తుతం చేపడుతున్న చర్యలను మరింత వేగవంతం చేయాలని అధికారులను ఆదేశించారు. 2028-29 నాటికి యూనిట్ ధరను రూ.4.10 వరకు తీసుకురావాలని అధికారులు ప్రణాళికలు రూపొందించగా, దాన్ని రూ.4కి తగ్గించేలా కృషి చేయాలని సీఎం సూచించారు.
విద్యుత్ సంస్థల రుణాలపై ప్రణాళిక
విద్యుత్ సంస్థలపై ఉన్న రుణభారం తగ్గించేందుకు ప్రత్యేక కార్యాచరణ రూపొందించాలని సీఎం తెలిపారు. ప్రజలపై అదనపు భారం లేకుండా అప్పులు తీర్చే మార్గాలను అన్వేషించాలని ఆదేశించారు.
సంస్కరణలతో ఖర్చు తగ్గింపు
విద్యుత్ రంగంలో సంస్కరణలు అమలు చేస్తే యూనిట్కు రూ.1.32 వరకు ఖర్చు తగ్గించే అవకాశం ఉందని అధికారులు వివరించారు. సమర్థ నిర్వహణతో 2025-26 ఆర్థిక సంవత్సరంలోనే సుమారు రూ.339 కోట్ల ఆదా సాధించినట్లు తెలిపారు. ఈ తరహా పొదుపు చర్యలను మరింతగా విస్తరించాలని సీఎం సూచించారు.
గ్రీన్ ఎనర్జీపై దృష్టి
ప్రపంచవ్యాప్తంగా గ్రీన్ ఎనర్జీ వైపు అడుగులు వేస్తున్న నేపథ్యంలో రాష్ట్రం కూడా అదే దిశగా ముందుకు సాగాలని సీఎం పేర్కొన్నారు. సోలార్, విండ్ ఎనర్జీ, పంప్డ్ స్టోరేజ్ ప్రాజెక్టులు, బ్యాటరీ ఎనర్జీ స్టోరేజ్ సిస్టంలను సమన్వయం చేయాలని సూచించారు.
సూర్యఘర్, కుసుమ్ పథకాల ప్రోత్సాహం
పీఎం సూర్య ఘర్ పథకం ను ప్రజలకు మరింత చేరువ చేయాలని సీఎం అన్నారు. అలాగే వ్యవసాయ పంపుసెట్లకు పీఎం కుసుమ్ పథకం వినియోగంపై రైతుల్లో అవగాహన పెంచాలని సూచించారు. రాష్ట్రంలో సోలార్ రూఫ్టాప్ విద్యుత్ ఉత్పత్తిపై ప్రత్యేక దృష్టి పెట్టాలని చెప్పారు.
పరిశ్రమలకు ఆకర్షణ
గ్రీన్ ఎనర్జీ విధానాల కారణంగా పెద్ద కంపెనీలు రాష్ట్రంలో పెట్టుబడులు పెడుతున్నాయని సీఎం పేర్కొన్నారు. గూగుల్ వంటి సంస్థలు డేటా సెంటర్లు ఏర్పాటు చేయడం దీనికి ఉదాహరణగా తెలిపారు.
ఎనర్జీ యూనివర్సిటీ ఏర్పాటు ప్రతిపాదన
విద్యుత్ రంగంలో కొత్త టెక్నాలజీలు, ఆవిష్కరణలను ప్రోత్సహించేందుకు ప్రత్యేకంగా ఎనర్జీ యూనివర్సిటీ ఏర్పాటు చేయాలని సీఎం సూచించారు. అలాగే స్టార్టప్ కంపెనీలకు మద్దతుగా ఇంక్యుబేషన్ ఫండ్ ఏర్పాటు చేయాలని, అవసరమైన మార్జిన్ మనీ అందించాలని ఆదేశించారు.
ఇతర రాష్ట్రాలకు కన్సల్టెన్సీ లక్ష్యం
ఏపీ విద్యుత్ సంస్థలు ఇతర రాష్ట్రాలకు కన్సల్టెన్సీ సేవలు అందించే స్థాయికి ఎదగాలని సీఎం ఆకాంక్షించారు. ఆర్థికంగా సంస్థలను బలోపేతం చేయాలని సూచించారు.
ప్రజలపై భారం తగ్గింపు
ఇప్పటికే ట్రూ-అప్ భారాన్ని ప్రజలపై వేయకుండా చర్యలు తీసుకున్నామని సీఎం తెలిపారు. విద్యుత్ ఛార్జీల్లో 13 పైసల మేర ట్రూ-డౌన్ చేసినట్లు చెప్పారు. కొనుగోలు ఖర్చును మరింత తగ్గిస్తే ప్రజలకు ఇంకా ప్రయోజనం కలుగుతుందని అన్నారు.
ఈ సమీక్ష సమావేశంలో విద్యుత్ శాఖ మంత్రి గొట్టిపాటి రవి కుమార్, ఉన్నతాధికారులు పాల్గొన్నారు. మొత్తంగా, విద్యుత్ రంగంలో సంస్కరణలు, గ్రీన్ ఎనర్జీ ప్రోత్సాహం, ఖర్చు తగ్గింపు— అన్నీ కలిసి ప్రజలకు తక్కువ ధరలో విద్యుత్ అందించే లక్ష్యంతో ప్రభుత్వం ముందుకు సాగుతోంది.
Be the first to react
