కేంద్రంలోని మోడీ ప్రభుత్వం ఇటీవల ఎనిమిదో వేతన సంఘం ఏర్పాటు గురించి ప్రకటించినప్పటికీ, ఇప్పటివరకు చైర్మన్ మరియు సభ్యుల వివరాలను వెల్లడించలేదు. ఈ కారణంగా సంఘం పనులు అధికారికంగా ప్రారంభం కావడానికి ఇంకా ఆలస్యం అవుతోంది. నిపుణుల అంచనా ప్రకారం, సిఫార్సులు సిద్ధమై కేంద్ర ప్రభుత్వానికి అందించడానికి కనీసం ఒక సంవత్సరం పడే అవకాశం ఉంది. అంటే, కొత్త వేతన నిర్మాణం అమలులోకి రావడానికి 2026 వరకు వేచి చూడాల్సి రావచ్చు.
ఈ ఆలస్యం మధ్యలోనే కేంద్ర ప్రభుత్వం ఉద్యోగులు, పెన్షనర్లకు శుభవార్త అందించే అవకాశం ఉందని సమాచారం. ఎనిమిదో వేతన సంఘం ప్రక్రియ ఇంకా ప్రారంభ దశలో ఉన్నా, ప్రస్తుతం అమల్లో ఉన్న ఏడవ వేతన సంఘం కింద డియర్నెస్ అలవెన్స్ (DA) పెంపుపై కీలక నిర్ణయం తీసుకోవచ్చని తెలుస్తోంది. ఈ ప్రకటన ఆగస్టు 15 స్వతంత్ర దినోత్సవం నాడు వెలువడే అవకాశం ఉంది.
ప్రస్తుతం కేంద్ర ఉద్యోగులు మరియు పెన్షనర్లు 55% డీఏ పొందుతున్నారు. ఈ రేటు జనవరి 2025లో రెండు శాతం పెరిగి అమల్లోకి వచ్చింది. డీఏ ప్రతి ఆరు నెలలకు ఒకసారి ఆల్ ఇండియా కన్స్యూమర్ ప్రైస్ ఇండెక్స్ (CPI-IW) ఆధారంగా లెక్కించబడుతుంది. నిపుణులు అంచనా వేస్తున్న ప్రకారం, జనవరి నుంచి జూన్ 2025 వరకు CPI-IW డేటా చూస్తే, మరో 3% పెంపు జరిగే అవకాశం ఉంది. మే 2025లో CPI-IW 0.5 పాయింట్లు పెరిగి 144.0కి చేరుకోగా, జూన్ 2025లో మరింతగా పెరిగి 145.0కి చేరుకుంది. ఈ గణాంకాలు డీఏ పెంపు సాధ్యాసాధ్యాలను బలపరుస్తున్నాయి. పెంపు జరిగితే, రేటు 55% నుంచి 58%కి చేరుతుంది.
డిసెంబర్ 2024లో CPI-IW 0.8 పాయింట్లు తగ్గి 143.7కి పడిపోవడంతో, జనవరి 2025లో డీఏ పెంపు కేవలం 2% మాత్రమే ఇచ్చారు. అంతకుముందు, 2024 దీపావళి సందర్భంగా 3% డీఏ పెంపు ప్రకటించారు. ఇది ఏడవ వేతన సంఘం విధానాల ప్రకారం జరిగింది. CPI-IW గణాంకాలు పెరుగుదల చూపినప్పుడల్లా, డీఏ పెంపు శాతం కూడా పెరుగుతుంది.
ఎనిమిదో వేతన సంఘం అమల్లోకి వస్తే వేతనాల్లో, భత్యాల్లో భారీ మార్పులు వచ్చే అవకాశం ఉంది. కానీ అది కనీసం ఏడాది దూరంలో ఉంది. అప్పటివరకు, డీఏ పెంపులు ఉద్యోగులకు తాత్కాలిక ఉపశమనం ఇస్తాయి. ఆగస్టు 15 నాటికి ప్రకటన వెలువడితే, ఇది కేంద్ర ఉద్యోగులు మరియు పెన్షనర్లకు ఈ ఏడాది రెండవ సంతోషకరమైన వార్త అవుతుంది.
