ఇకపై డ్రైవింగ్ లైసెన్సు సులభం కాదు! ఇవి పాటించకపోతే వీసా కట్!

• ఏడు దశాబ్దాల్లోనే అతిపెద్ద రోడ్డు రవాణా సంస్కరణ, కొత్త డ్రైవర్లకు కఠిన నిబంధనలు!

• ప్రాక్టికల్ టెస్ట్‌కు ముందే 6 నెలల శిక్షణ తప్పనిసరి, డిజిటల్ లాగ్‌బుక్ పూర్తి చేస్తేనే లైసెన్స్!

• రెండు సంవత్సరాల పాటు 'R' ప్లేట్ ప్రదర్శన తప్పనిసరి, ఏడాది నుంచి 24 నెలలకు పెంపు!

NRI: యునైటెడ్ కింగ్‌డమ్‌లోని ఉత్తర ఐర్లాండ్ ప్రాంతంలో డ్రైవింగ్ లైసెన్స్ జారీ నిబంధనలు, శిక్షణా విధానంలో చారిత్రాత్మక మార్పులు చోటుచేసుకున్నాయి. దాదాపు ఏడు దశాబ్దాల (70 ఏళ్లు) తర్వాత డ్రైవింగ్ రంగంలో అత్యంత సమగ్రమైన సంస్కరణగా అభివర్ణిస్తున్న "గ్రాడ్యుయేటెడ్ డ్రైవర్ లైసెన్సింగ్" (GDL - Graduated Driver Licensing) విధానాన్ని అధికారికంగా అమల్లోకి తెచ్చారు. కొత్తగా డ్రైవింగ్ నేర్చుకునేవారు, లైసెన్స్ పొందే యువతకు సరైన క్రమశిక్షణ, నైపుణ్యాన్ని అందించడమే లక్ష్యంగా ఉత్తర ఐర్లాండ్ మౌలిక వసతుల శాఖ (Department for Infrastructure) ఈ నూతన చట్టాన్ని రూపొందించింది.

6 నెలల తప్పనిసరి శిక్షణ – డిజిటల్ లాగ్‌బుక్ రికార్డులు

ఈ నూతన నిబంధనల ప్రకారం, కార్ లెర్నర్ డ్రైవర్లు ప్రాక్టికల్ డ్రైవింగ్ టెస్ట్‌కు హాజరు కావడానికి ముందు కనీసం ఆరు నెలల పాటు తప్పనిసరి శిక్షణా కాలాన్ని (Mandatory Minimum Learning Period) పూర్తి చేయాల్సి ఉంటుంది. ప్రొవిజనల్ లైసెన్స్ వచ్చిన తేదీ నుంచి ఈ కాలం లెక్కించబడుతుంది. అంతేకాకుండా, అభ్యాసకులు నిర్దేశిత 'ట్రైనింగ్ ప్రోగ్రామ్' పూర్తి చేసి, అందులోని 14 మాడ్యూళ్ల పురోగతిని ప్రత్యేక మొబైల్ యాప్ లేదా వెబ్ ఆధారిత లాగ్‌బుక్‌లో అధికారికంగా నమోదు చేయాలి. ఈ లాగ్‌బుక్ రికార్డులను సమర్పించిన తర్వాతే ఫైనల్ డ్రైవింగ్ టెస్ట్‌కు అనుమతి లభిస్తుంది.

రెండు సంవత్సరాల పాటు 'R' ప్లేట్ ప్రదర్శన తప్పనిసరి

టెస్ట్ పాసైన తర్వాత కొత్త డ్రైవర్లు తమ వాహనాలపై ప్రదర్శించే ‘ఆర్’ (Restricted - R Plate) ప్లేట్ నిబంధనల్లో కీలక మార్పులు చేశారు. గతంలో ఉన్న ఒక సంవత్సరం గడువును ఇప్పుడు ఏకంగా రెండు సంవత్సరాలకు (24 నెలలు) పెంచారు. ఈ రెండేళ్ల కాలంలో తొలి 6 నెలలు తెలుపు రంగు బ్యాక్‌గ్రౌండ్‌పై నీలి రంగు 'R' అక్షరం ఉన్న ప్లేట్‌ను, ఆ తర్వాత మిగిలిన 18 నెలలు నీలిరంగు బ్యాక్‌గ్రౌండ్‌పై తెలుపు రంగు 'R' ఉన్న ప్లేట్‌ను తప్పనిసరిగా వాహనానికి అమర్చాలి. అనుభవం లేని డ్రైవర్లను రోడ్డుపై సులభంగా గుర్తించి ప్రమాదాలు నివారించేందుకు ఈ ఏర్పాట్లు చేశారు.

24 ఏళ్లలోపు యువ డ్రైవర్లపై నైట్ ప్యాసింజర్ ఆంక్షలు

ముఖ్యంగా 24 సంవత్సరాల కంటే తక్కువ వయస్సు ఉన్న యువ డ్రైవర్లకు టెస్ట్ పాసైన మొదటి ఆరు నెలల పాటు కఠినమైన నిబంధనలు విధించారు. రాత్రి 11:00 గంటల నుంచి ఉదయం 6:00 గంటల మధ్య సమయంలో 14 నుంచి 20 ఏళ్ల లోపు వయసున్న యువ ప్రయాణికులలో ఒక్కరి కంటే ఎక్కువ మందిని కారులో తీసుకెళ్లడంపై నిషేధం విధించారు. రాత్రి వేళల్లో యువకులు గుంపులుగా చేరి సరదాగా డ్రైవ్ చేస్తూ ప్రమాదాల బారిన పడకుండా నిరోధించడమే దీని ముఖ్య ఉద్దేశం. అయితే సొంత కుటుంబ సభ్యులకు లేదా పక్క సీట్లో 21 ఏళ్లు దాటిన అనుభవజ్ఞుడైన డ్రైవర్ ఉన్న సందర్భాల్లో దీనికి మినహాయింపు ఉంటుంది.

పాత 45 మైళ్ల వేగ పరిమితి ఎత్తివేత – రహదారులపై సమాన వేగం

ఈ సంస్కరణల్లో కొత్త డ్రైవర్లకు భారీ ఉపశమనం కలిగించే మరో కీలక మార్పు ఏమిటంటే.. దశాబ్దాలుగా ఉన్న 45 mph (గంటకు 45 మైళ్లు) గరిష్ట వేగ పరిమితిని పూర్తిగా ఎత్తివేశారు. గతంలో లెర్నర్లు, కొత్త డ్రైవర్లు మోటార్‌వేలపై సైతం 45 మైళ్ల వేగానికి మించి వెళ్లకూడదనే నిబంధన ఉండేది. దీనివల్ల వేగంగా వెళ్లే ఇతర వాహనాలకు అడ్డంకిగా మారి ప్రమాదాలు జరిగేవి. తాజా నిర్ణయంతో కొత్త డ్రైవర్లు కూడా రోడ్డుపై సాధారణ ట్రాఫిక్ వేగ పరిమితికి (స్పీడ్ లిమిట్లకు) అనుగుణంగా మోటార్‌వేలపై సురక్షితంగా ప్రయాణించవచ్చు.

కఠిన జరిమానాలు – ప్రమాదాల నివారణే ధ్యేయం

ఈ జీడీఎల్ నిబంధనలను ఉల్లంఘిస్తే తీవ్ర పరిణామాలు ఎదుర్కోవాల్సి వస్తుందని అధికారులు హెచ్చరిస్తున్నారు. R ప్లేట్ పెట్టకపోయినా, అర్ధరాత్రి వేళల్లో అనధికారికంగా ప్రయాణికులను తీసుకెళ్లినా డ్రైవింగ్ లైసెన్స్‌పై 3 పెనాల్టీ పాయింట్లు పడటంతో పాటు £1,000 (సుమారు రూ. 1.10 లక్షలు) వరకు భారీ జరిమానా విధిస్తారు. యువ డ్రైవర్లకు రెండేళ్లలో 6 పెనాల్టీ పాయింట్లు దాటితే లైసెన్స్ రద్దవుతుంది. గణాంకాల ప్రకారం 17 నుంచి 23 ఏళ్ల వయసున్న యువత కేవలం 8 శాతం లైసెన్సులు కలిగి ఉన్నప్పటికీ, 24 శాతం తీవ్రమైన ప్రాణాంతక ప్రమాదాలకు కారణమవుతున్నారు. ఈ ప్రమాదాలను అరికట్టేందుకు తెచ్చిన ఈ చట్టాన్ని భవిష్యత్తులో ఇంగ్లాండ్, వేల్స్, స్కాట్లాండ్ అంతటా విస్తరించే అవకాశాన్ని పరిశీలిస్తున్నారు.