ఆంధ్రప్రదేశ్ ప్రభుత్వం రాష్ట్రంలోని పౌరసరఫరాల వ్యవస్థలో పెద్ద మార్పులు చేయాలని నిర్ణయించింది. ఇప్పటివరకు రేషన్ షాపులు నెలలో నిర్దిష్టమైన రోజుల్లో, నిర్ణీత సమయాల్లో మాత్రమే లబ్ధిదారులకు బియ్యం, పిండి, పప్పులు, చక్కెర వంటి వస్తువులు అందించేవి. అయితే డీలర్లు షాపులు సరిగ్గా తెరవకపోవడం, సమయానికి అందుబాటులో లేకపోవడం వల్ల ప్రజలు ఇబ్బందులు పడుతున్నారు. ఈ సమస్యను అధిగమించేందుకు ప్రభుత్వం కొత్త నిర్ణయానికి వచ్చింది. ఇకపై రేషన్ షాపులను రోజంతా (సుమారు 12 గంటలపాటు) ఓపెన్‌గా ఉంచాలని నిర్ణయించింది. దీంతో ప్రజలు తమకు అనుకూలంగా ఉన్న సమయానికే రేషన్ సౌకర్యాన్ని పొందగలరు.
ఈ కొత్త విధానంలో భాగంగా రేషన్ షాపులను మినీమాల్స్‌గా మార్చే ప్రణాళికలు కూడా సిద్ధమవుతున్నాయి. ఇప్పటి వరకు రేషన్ దుకాణాలు కేవలం బియ్యం, కొన్ని ముఖ్యమైన వస్తువులకే పరిమితమై ఉండగా, రాబోయే రోజుల్లో అక్కడే నిత్యావసర వస్తువులు కూడా అందుబాటులోకి రానున్నాయి. అధికారులు జాతీయ వ్యవసాయ కో-ఆపరేటివ్ సొసైటీ, గిరిజన కార్పొరేషన్ వంటి సంస్థల ద్వారా నిత్యావసర సరుకులు సరఫరా చేసే విధానాన్ని పరిశీలిస్తున్నారు. అయితే ఈ వస్తువులను ప్రభుత్వం కొనుగోలు చేసి అందిస్తుందా? లేక డీలర్లు స్వయంగా తెచ్చుకోవాలా అన్న అంశంపై స్పష్టత ఇంకా రాలేదు. అలాగే ఈ వస్తువులపై లబ్ధిదారులకు రాయితీ ఇస్తారా లేదా అనేది కూడా తేలాల్సి ఉంది.
పైలట్ ప్రాజెక్ట్‌గా మొదటి దశలో ఒక్కో నగరంలో 15 చొప్పున, మొత్తం 75 రేషన్ షాపులను ఎంపిక చేస్తున్నారు. ఈ ప్రక్రియ ఈ వారంలోనే పూర్తవుతుందని అధికారులు చెబుతున్నారు. రేషన్ షాపులను మినీమాల్స్‌గా మార్చడం ద్వారా డీలర్లకూ కొత్త అవకాశాలు లభిస్తాయి. ఇప్పటివరకు వారు రోజులో కొద్ది గంటలే పనిచేసి మిగిలిన సమయంలో ఇతర పనులు చేసుకునే పరిస్థితి ఉండేది. ఇకపై రోజంతా షాపులో ఉండడం వల్ల వారికి నష్టమేమీ లేకుండా, అదనంగా ఉపాధి అవకాశాలు కూడా లభిస్తాయి. అన్నిరకాల నిత్యావసర వస్తువులు అందుబాటులో ఉంటే ప్రజలకు కూడా మరింత సౌకర్యం కలుగుతుంది.
ఈ నూతన విధానం ఎంతవరకు సక్సెస్ అవుతుందో చూడాలి. ప్రజలకు సౌకర్యంగా ఉంటుందా? డీలర్లకు లాభదాయకమవుతుందా? రాయితీలు ఉంటాయా లేదా? అన్న ప్రశ్నలకు సమాధానాలు రాబోయే నెలల్లోనే తెలుస్తాయి. అయితే రేషన్ షాపులను మినీమాల్స్‌గా మార్చడం ద్వారా పౌరసరఫరాల వ్యవస్థలో ఒక విప్లవాత్మక మార్పు తీసుకురావాలని ప్రభుత్వం భావిస్తోంది. ఇది సక్రమంగా అమలు అయితే, ఇకపై రేషన్ షాపులు కేవలం రేషన్ వస్తువులకే పరిమితం కాకుండా, సాధారణ ప్రజలందరికీ అవసరమైన అన్నివిధాల సరుకులు అందించే కేంద్రాలుగా మారతాయి.
