జీడిపప్పు ఒక అద్భుతమైన పోషకాహారం. ఇందులో మెగ్నీషియం, జింక్, ఐరన్, పొటాషియం, విటమిన్ కె, విటమిన్ ఈ, విటమిన్ బి6, ఫైబర్ వంటి ఎన్నో ముఖ్యమైన పోషకాలు ఉన్నాయి. ఇవి శరీరానికి కావలసిన శక్తిని అందించడంతో పాటు, రోగనిరోధక శక్తిని పెంచడంలో సహాయపడతాయి. అందుకే జీడిపప్పును ఆరోగ్యానికి ఎంతో మంచిదని చెబుతారు. అయితే, దీనిని ఎవరు తినాలి, ఎవరు మితంగా తినాలి అనేది తెలుసుకోవడం చాలా అవసరం.
కొలెస్ట్రాల్ సమస్యతో బాధపడే వారు కూడా జీడిపప్పును పూర్తిగా మానుకోవాల్సిన అవసరం లేదు. మితంగా తినటం వల్ల జీడిపప్పులో ఉండే మంచి కొవ్వులు (హెల్తీ ఫ్యాట్స్) ఎల్డీఎల్ అంటే చెడు కొలెస్ట్రాల్‌ను తగ్గిస్తాయి. అలాగే హెచ్డీఎల్ అంటే మంచి కొలెస్ట్రాల్‌ను పెంచుతాయి. దీంతో గుండె ఆరోగ్యానికి మేలు జరుగుతుంది. జీడిపప్పులో ఉండే మెగ్నీషియం రక్తపోటు నియంత్రణలో కూడా సహాయపడుతుంది.
అయితే, జీడిపప్పును ఎక్కువగా తినటం వల్ల కొన్ని సమస్యలు రావచ్చు. ఎందుకంటే ఇందులో అధికంగా క్యాలరీలు, కొవ్వులు ఉంటాయి. ఇవి శరీరంలో అధిక బరువు పెరగడానికి దోహదం చేస్తాయి. అంతేకాదు, జీడిపప్పు ఎక్కువగా తినే వారు కడుపుబ్బరం, మలబద్ధకం వంటి సమస్యలను ఎదుర్కొనే అవకాశం ఉంటుంది. కాబట్టి, ఇది ఆరోగ్యానికి మంచిదే అయినా పరిమిత మోతాదులో తినడం చాలా ముఖ్యం.
మితంగా జీడిపప్పు తినడం వల్ల శరీరానికి ఎన్నో లాభాలు కలుగుతాయి. ఇవి ఎముకలను బలపరుస్తాయి, నరాల మరియు కండరాల పనితీరును మెరుగుపరుస్తాయి. శరీరానికి కావలసిన శక్తిని అందించి, రోగనిరోధక శక్తిని పెంచుతాయి. చిన్నపాటి అలసటను తగ్గించడంలో కూడా ఇవి ఉపయోగపడతాయి.
అందువల్ల జీడిపప్పు తినడం ఆరోగ్యానికి మేలు చేస్తుంది. కానీ ఒకే సారి ఎక్కువగా తినటం మాత్రం ప్రమాదకరం. మితంగా తినడం వల్ల ప్రయోజనాలు పొందవచ్చు, కానీ అతిగా తినడం వల్ల అనర్థాలు వస్తాయి. ముఖ్యంగా కొలెస్ట్రాల్ సమస్య ఉన్న వారు పరిమిత మోతాదులో తీసుకుంటే మంచిది. జాగ్రత్తగా, సరైన మోతాదులో తీసుకుంటే జీడిపప్పు ఒక మంచి ఔషధం లా పని చేస్తుంది.
