అణు ఒప్పందం అంశంపై ప్రపంచ రాజకీయాల్లో మరోసారి ఉద్రిక్తతలు పెరిగాయి. ఐక్యరాజ్యసమితి వేదికగా ఇరాన్, అమెరికా దేశాలు ఒకదానిపై ఒకటి తీవ్ర వ్యాఖ్యలు చేసుకున్నాయి. ఎలాంటి ఒత్తిడికీ తాము లొంగబోమని ఇరాన్ స్పష్టంగా ప్రకటించగా, అణు కార్యక్రమంపై కఠిన నిబంధనలు తప్పవని అమెరికా తేల్చి చెప్పింది. ఈ పరిణామాలు మధ్యప్రాచ్యంతో పాటు అంతర్జాతీయ స్థాయిలోనూ ఆందోళన కలిగిస్తున్నాయి.
న్యూయార్క్లోని ఐక్యరాజ్యసమితి భద్రతామండలి సమావేశంలో ఈ అంశం ప్రధాన చర్చకు వచ్చింది. ఇరాన్ అణు కార్యక్రమం పునరుద్ధరణపై జరుగుతున్న చర్చల్లో భాగంగా ఇరు దేశాల మధ్య మాటల యుద్ధం చోటు చేసుకుంది. అమెరికా ప్రతినిధులు మాట్లాడుతూ, నేరుగా చర్చలకు తాము సిద్ధంగా ఉన్నామని, అయితే ఇరాన్ అణు సుసంపన్నతను పూర్తిగా నిలిపివేయాల్సిందేనని స్పష్టం చేశారు. అణు ఆయుధాల ముప్పును నివారించడమే తమ ప్రధాన లక్ష్యమని వారు పేర్కొన్నారు.
దీనికి ప్రతిస్పందనగా ఇరాన్ తీవ్రంగా అభ్యంతరం తెలిపింది. తమ దేశం అణు ఆయుధాల అభివృద్ధి కోసం ప్రయత్నించడం లేదని, తమ అణు కార్యక్రమం పూర్తిగా శాంతియుత అవసరాల కోసమేనని ఇరాన్ మరోసారి స్పష్టం చేసింది. అణు వ్యాప్తి నిరోధక ఒప్పందంలో సభ్యదేశంగా తమకు అణు సాంకేతికతను వినియోగించే హక్కు ఉందని ఇరాన్ వాదించింది. పూర్తిస్థాయి అణు సుసంపన్నత నిషేధం విధించడం అన్యాయమని, ఇది సమానత్వ సూత్రాలకు విరుద్ధమని పేర్కొంది.
ఈ సందర్భంగా ఇరాన్ ప్రతినిధి మాట్లాడుతూ ముందే నిర్ణయించుకున్న షరతులను ఒప్పందంగా రుద్దే ప్రయత్నం అమెరికా చేస్తోందని ఆరోపించారు. అలాంటి ఒత్తిళ్లకు తాము తలవంచబోమని, బెదిరింపులు, ఆంక్షల ద్వారా చర్చలు ముందుకు సాగవని స్పష్టం చేశారు. న్యాయసమ్మతమైన, పరస్పర గౌరవంపై ఆధారపడిన చర్చలకే తాము సిద్ధమని ఇరాన్ వెల్లడించింది.
ఇదిలా ఉండగా గతంలో ఇరు దేశాల మధ్య అణు చర్చలు పలు దశల్లో సాగిన విషయం తెలిసిందే. కొద్ది నెలల క్రితం ఇరాన్–ఇజ్రాయెల్ మధ్య జరిగిన తాత్కాలిక యుద్ధం, ఆ తర్వాత అమెరికా జోక్యం పరిస్థితులను మరింత సంక్లిష్టం చేసింది. ఆ పరిణామాల ప్రభావం ఇప్పుడు ఐక్యరాజ్యసమితి వేదికపై స్పష్టంగా కనిపిస్తోంది.
అణు ఒప్పందం అంశంలో యూరోప్ దేశాలు కూడా కీలక పాత్ర పోషిస్తున్నాయి. కొన్ని యూరోపియన్ దేశాలు ఇరాన్పై మళ్లీ ఆంక్షలు అమలు చేసే ప్రక్రియను ప్రారంభించగా, రష్యా, చైనా మాత్రం దీనికి వ్యతిరేకంగా నిలిచాయి. అణు ఒప్పందానికి సంబంధించిన పాత తీర్మానాల గడువు ముగిసిందని రష్యా, చైనా వాదిస్తున్నాయి. అయినప్పటికీ భద్రతామండలిలో సమావేశం కొనసాగడం గమనార్హం.
ఇరాన్–అమెరికా మధ్య అణు చర్చలు మరోసారి కీలక మలుపులో నిలిచాయి. పరస్పర అనుమానాలు, కఠిన వైఖరులు కొనసాగుతున్న నేపథ్యంలో, ఈ వివాదం ఎలా పరిష్కారమవుతుందన్నది అంతర్జాతీయ సమాజం ఆసక్తిగా గమనిస్తోంది. శాంతియుత చర్చల ద్వారా పరిష్కారం సాధ్యమవుతుందా, లేక ఉద్రిక్తతలు మరింత పెరుగుతాయా అన్నది రాబోయే రోజుల్లో తేలనుంది. ఈ పరిణామాలు మధ్యప్రాచ్య స్థిరత్వంతో పాటు ప్రపంచ భద్రతపై కూడా ప్రభావం చూపే అవకాశం ఉండటంతో, ఐక్యరాజ్యసమితి పాత్ర మరింత కీలకంగా మారింది.
