ఆహారం తిన్న వెంటనే బెడ్‌కి వెళ్లిపోవడం లేదా కూర్చుని వేళ్లాడడం అనేది శరీరానికి మంచి కాదు అని వైద్య నిపుణులు హెచ్చరిస్తున్నారు. భోజనం అనంతరం కేవలం 10 నిమిషాలు నెమ్మదిగా నడవడమే శరీరానికి గొప్ప లాభాలను ఇస్తుందని ప్రముఖ వైద్యుడు డాక్టర్ మోహనవంశీ సూచించారు. ఈ చిన్న అలవాటు మన ఆరోగ్యాన్ని ఎంతో మెరుగుపరిచే శక్తిని కలిగి ఉందని ఆయన తెలిపారు.
విశ్లేషణల ప్రకారం, భోజనం తర్వాత రక్తంలో గ్లూకోజ్ స్థాయి ఒక్కసారిగా పెరగొచ్చు. ఇది డయాబెటిస్ ఉన్నవారికి పెద్ద సమస్యగా మారుతుంది. అయితే, తిన్న వెంటనే నెమ్మదిగా నడవడం ద్వారా ఈ గ్లూకోజ్‌ను కండరాలకు తేర్చే ప్రక్రియ వేగవంతం అవుతుంది. దీనివల్ల రక్తంలోని చక్కెర స్థాయిని సుమారు 30 శాతం వరకు తగ్గించగలమని డాక్టర్ మోహనవంశీ చెబుతున్నారు.
ముఖ్యంగా మధుమేహం ఉన్నవారు, మధుమేహం వచ్చే అవకాశమున్న వారు భోజనం తరువాత కొంత సమయం నడవడం తప్పనిసరి గా తీసుకోవాలి. ఇది కేవలం షుగర్ లెవెల్స్‌ను నియంత్రించడమే కాకుండా, జీర్ణక్రియను మెరుగుపరిచి, బరువు నియంత్రణకూ సహకరిస్తుంది.
లంచ్ అయినా, డిన్నర్ అయినా — భోజనం తరువాత కనీసం 10 నిమిషాల పాటు నడవడం దినచర్యలో భాగం చేసుకోవాలని డాక్టర్ సూచించారు. ఇది ఒక సాధారణ మార్గమైనప్పటికీ దీని ప్రభావం చాలా మేలైనదిగా శాస్త్రీయంగా కూడా రుజువైంది. కాబట్టి, ఆరోగ్యాన్ని జాగ్రత్తగా కాపాడుకోవాలనుకునే ప్రతి ఒక్కరూ ఈ మంచి అలవాటును అలవర్చుకోవాలి.
