ఉక్రెయిన్–రష్యా యుద్ధం మూడో సంవత్సరంలోకి ప్రవేశించినప్పటికీ, సమస్యకు శాశ్వత పరిష్కారం కనిపించడం లేదు. ఈ నేపథ్యంలో అమెరికా తీసుకున్న కొత్త నిర్ణయం అంతర్జాతీయ వర్గాల్లో చర్చనీయాంశమైంది. అమెరికా తయారీ లాంగ్–రేంజ్ ఆర్మీ టాక్టికల్ మిస్సైల్ సిస్టమ్స్ (ATACMS) ను ఉక్రెయిన్ వాడకూడదని వాషింగ్టన్ స్పష్టం చేసింది. ఈ నిర్ణయం కేవలం సాంకేతిక పరిమితి మాత్రమే కాదు, అంతర్జాతీయ రాజకీయాల్లోని సంక్లిష్టతలకు ప్రతిబింబం.
ATACMS మిస్సైల్‌లు సాధారణంగా 300 కిలోమీటర్ల దూరంలో టార్గెట్‌ను ధ్వంసం చేయగల శక్తివంతమైన ఆయుధాలు. వీటిని ఉక్రెయిన్ ఉపయోగించడం రష్యా భూభాగాన్ని నేరుగా దాడి చేసే అవకాశం కలిగిస్తుందని అమెరికా ఆందోళన చెందుతోంది. ఒకవేళ రష్యా భూభాగంలో నేరుగా దాడి జరిగితే, యుద్ధం మరింత విస్తరించి మూడో ప్రపంచ యుద్ధానికి దారితీసే ప్రమాదం ఉందని నిపుణుల విశ్లేషణ.
కాబట్టి, అమెరికా “ఉక్రెయిన్ రష్యాపై దాడి చేయాలంటే మాకు ముందుగా అనుమతి తీసుకోవాలి” అనే షరతు విధించడం, యుద్ధం నియంత్రణలో ఉంచటం. ఇది ఒక రకంగా “అస్త్రాల కంటే ఆంక్షలు” అనే అమెరికా వ్యూహానికి సూచిక.
అమెరికా అధ్యక్షుడు డోనాల్డ్ ట్రంప్ ఇప్పటికే ఉక్రెయిన్ యుద్ధంపై పలు సార్లు అసంతృప్తి వ్యక్తం చేశారు. “ఈ యుద్ధాన్ని ఆపలేకపోయానని” ఆయన నిరాశ వ్యక్తం చేసిన విషయం తెలిసిందే. అంతేకాదు, రష్యాపై అదనపు టారిఫ్‌లు విధించవచ్చని, శాంతి చర్చల నుండి తప్పుకోవచ్చని కూడా ఆయన సంకేతాలు ఇచ్చారు.
ట్రంప్ తరచూ “అమెరికా వనరులు అంతా ఉక్రెయిన్‌కే వెళ్తున్నాయి. మా దేశ ప్రజల భవిష్యత్తు ప్రాధాన్యం కాదా అనే ప్రశ్నను లేవనెత్తుతుంటారు. కాబట్టి, ఆయుధ సహాయాన్ని తగ్గించి ఆంక్షల వైపు మళ్లడం, ట్రంప్ ఆలోచనలకు దగ్గరగా ఉన్న నిర్ణయంగా కనిపిస్తోంది.
ఉక్రెయిన్ మాత్రం వేరే సమస్యలతో సతమతమవుతోంది. రష్యా సైన్యం మెల్లగా కొత్త ప్రాంతాలపై ఆధిపత్యం చెలాయిస్తుండగా, పశ్చిమ దేశాల మద్దతు తగ్గిపోతుందేమో అన్న భయాలు కీవ్ ప్రభుత్వాన్ని ఆందోళనకు గురిచేస్తున్నాయి.ATACMS లాంటి ఆయుధాలు ఉక్రెయిన్‌కు పెద్ద స్థాయిలో మద్దతు ఇచ్చేవి. అయితే, వాటి వినియోగంపై అమెరికా ఆంక్షలు విధించడం వల్ల, ఉక్రెయిన్ సైనిక వ్యూహాలు పరిమితమైపోతున్నాయి.
రష్యా వైపు నుంచి కూడా స్పష్టమైన హెచ్చరికలు వస్తున్నాయి. “పశ్చిమ దేశాలు మాకు వ్యతిరేకంగా జోక్యం చేసుకుంటే, తగిన సమాధానం ఇస్తాం” అని మాస్కో పదేపదే ప్రకటిస్తోంది. కాబట్టి అమెరికా నిర్ణయం రష్యా వైపు నుంచి తక్షణ ప్రతిస్పందనను తగ్గించవచ్చని అంతర్జాతీయ వర్గాలు భావిస్తున్నాయి.
అమెరికా ఆంక్షలు విధించినప్పటికీ, ఉక్రెయిన్‌కు ఆర్థిక, రక్షణ సహాయం కొనసాగించే అవకాశం ఉంది. కానీ ఆయుధ వినియోగంపై కఠిన నియంత్రణలు ఉంటాయి. ట్రంప్ వ్యాఖ్యలు, అమెరికా ఆంక్షలు ఇవన్నీ రాబోయే నెలల్లో శాంతి చర్చలకు మార్గం చూపే అవకాశం ఉందని నిపుణులు అంటున్నారు.
అమెరికా వెనక్కు తగ్గుతున్నట్లుగా భావిస్తే, రష్యా మరింత దూకుడుగా ముందుకు సాగే అవకాశం ఉంది. ఇది యుద్ధ భవిష్యత్తును నిర్దేశించే కీలక అంశం. అమెరికా తీసుకున్న “ఆయుధాలకంటే ఆంక్షలు” అనే వ్యూహం తాత్కాలికంగా శాంతిని కాపాడే ప్రయత్నం అయినా, దీర్ఘకాలంలో దాని ప్రభావం ఎలా ఉండబోతుందో. ఉక్రెయిన్ ఆశలు తగ్గిపోతుండగా, రష్యా బలపడుతుందా? లేక అంతర్జాతీయ ఒత్తిడితో శాంతి చర్చలు మళ్లీ పుంజుకుంటాయా? అనే ప్రశ్నకు సమాధానం రాబోయే నెలల్లోనే లభించనుంది.
