ప్రస్తుతం మన సమాజంలో ఊబకాయం ఒక పెద్ద సమస్యగా మారింది. తగినంత వ్యాయామం చేయకపోవడం, అనారోగ్యకరమైన ఆహారపు అలవాట్లు, పని ఒత్తిడి, మరియు సరిగ్గా నిద్ర లేకపోవడం వంటివి ఈ సమస్యకు కారణాలు. చాలామంది బరువు పెరిగిన తర్వాతే తమ ఆరోగ్యం గురించి ఆలోచించడం ప్రారంభిస్తారు. అప్పుడు వారు డయాబెటిస్, బీపీ వంటి రోగాలతో బాధపడుతూ బరువు తగ్గడానికి మార్గాలు వెతుకుతారు.
ఇటీవలి కాలంలో చాలామంది తృణధాన్యాలతో చేసిన ఆహారాలను తమ ఆహారంలో చేర్చుతున్నారు. ముఖ్యంగా జొన్న రొట్టె, రాగి రొట్టె వంటి పదార్థాలు ప్రజాదరణ పొందుతున్నాయి. ఇవి రెండూ శరీరానికి అవసరమైన పోషకాలతో నిండివుంటాయి. ఫైబర్, విటమిన్లు, ఖనిజాలు, ప్రోటీన్లు పుష్కలంగా ఉండడం వల్ల ఇవి ఆరోగ్యానికి మంచివి. అలాగే కడుపు నిండిన భావన కలిగించి, అనవసరమైన తినే అలవాట్లను నియంత్రించడంలో సహాయపడతాయి.
జొన్న రొట్టె విషయానికి వస్తే, ఇందులో తక్కువ క్యాలరీలు ఉంటాయి. ఇది త్వరగా జీర్ణం అవుతుంది మరియు తిన్న తర్వాత ఎక్కువసేపు ఆకలి వేయకుండా ఉంటుంది. జొన్న రొట్టెలో ఉన్న ఫైబర్ ఆహారాన్ని నెమ్మదిగా జీర్ణం చేయడం వల్ల బరువు తగ్గడానికి బాగా సహాయపడుతుంది. అంతేకాదు ఇది రక్తంలో చక్కెర స్థాయిలను కూడా సమతుల్యం చేస్తుంది.
రాగి రొట్టెలో కూడా ఫైబర్, ప్రోటీన్‌ అధికంగా ఉంటాయి. ఇవి జీర్ణక్రియను మెరుగుపరచడంతో పాటు ఎముకల ఆరోగ్యానికి కూడా ఉపయోగపడతాయి. రాగిలో ఉన్న క్యాల్షియం ఎముకల బలానికి దోహదం చేస్తుంది. కానీ రాగి రొట్టెలో క్యాలరీలు జొన్న రొట్టె కంటే కొంచెం ఎక్కువగా ఉండటం వల్ల బరువు తగ్గే ప్రక్రియలో కొంత ఆలస్యం కావచ్చు.
నిపుణుల అభిప్రాయం ప్రకారం, బరువు తగ్గాలనుకునే వారికి జొన్న రొట్టె ఉత్తమమైనది. ఇది తక్కువ క్యాలరీలు, ఎక్కువ ఫైబర్‌తో కూడి ఉండటంతో కొవ్వు తగ్గించడంలో ప్రభావవంతంగా పనిచేస్తుంది. కాబట్టి ఆరోగ్యకరమైన జీవనశైలిని పాటిస్తూ, రోజువారీ ఆహారంలో జొన్న రొట్టెను చేర్చడం ద్వారా మంచి ఫలితాలు పొందవచ్చని వైద్యులు సూచిస్తున్నారు.
