ఆంధ్రప్రదేశ్ ప్రభుత్వానికి చెందిన స్టేట్ స్కిల్ డెవలప్మెంట్ కార్పొరేషన్ (APSSDC) ద్వారా యువతకు మరోసారి స్వర్ణావకాశం లభించింది. రాష్ట్ర ప్రభుత్వం, జర్మనీలోని సంస్థలతో కలసి మెకాట్రానిక్స్ టెక్నీషియన్ (Car & Commercial) పోస్టులకు ప్రత్యేక శిక్షణ, ప్లేస్మెంట్ అవకాశాలు కల్పిస్తోంది. మెకానికల్, ఎలక్ట్రికల్, ఆటోమొబైల్, మెకాట్రానిక్స్ రంగాల్లో ఐటీఐ, డిప్లొమా లేదా బీ.టెక్ చేసిన అభ్యర్థులు ఈ అవకాశాన్ని వినియోగించుకోవచ్చు. ఇది అంతర్జాతీయ స్థాయిలో ఉద్యోగాన్ని పొందే గొప్ప అవకాశం అని అధికారులు చెబుతున్నారు.
ఈ కార్యక్రమానికి 18 నుండి 40 సంవత్సరాల మధ్య వయస్సు గల పురుషులు మాత్రమే అర్హులు. కనీసం 3 నుండి 5 సంవత్సరాల అనుభవం తప్పనిసరి. ఎంపికలో ఇంగ్లీష్ ప్రావీణ్య పరీక్ష, సాంకేతిక నైపుణ్యాల అంచనా (వర్చువల్ మోడ్లో) నిర్వహిస్తారు. అభ్యర్థులు పాస్పోర్ట్, విద్యార్హత సర్టిఫికేట్లు, అనుభవ పత్రాలను సమర్పించాలి. ఎంపికైన వారికి వీసా, విమాన టికెట్, అటెస్టేషన్ వంటి సౌకర్యాలు కంపెనీ ద్వారా అందించబడతాయి.
జర్మనీలో ఎంపికైన అభ్యర్థులకు నెలకు యూరో 2,500 నుండి 3,000 (సుమారు రూ.2.5 లక్షలు) జీతం లభిస్తుంది. వార్షికంగా 30 రోజుల చెల్లింపు సెలవులు ఇస్తారు. ఒప్పందం రెండు సంవత్సరాలపాటు కొనసాగుతుంది. భోజనం, వసతి ఖర్చులు అభ్యర్థి భరించవలసి ఉన్నా, ట్రైనింగ్ పూర్తయ్యాక మొదటి మూడు నెలల ఫీజు రీఫండ్ చేసే సౌకర్యం కల్పిస్తున్నారు. ఈ విధంగా ఆర్థిక భారం తగ్గించేందుకు కూడా ప్రభుత్వం చర్యలు తీసుకుంది.
భాషా నైపుణ్యాల పెంపు కోసం జర్మన్ లాంగ్వేజ్ ట్రైనింగ్ కూడా అందిస్తున్నారు. మొదట ఆన్లైన్ ద్వారా A2 స్థాయి, తర్వాత B1 స్థాయి శిక్షణ ఇస్తారు. శిక్షణ కాలం 8 నుండి 10 నెలలపాటు ఉంటుంది. రిజిస్ట్రేషన్ ఫీజు రూ.10,000, ట్రైనింగ్ ఫీజు రూ.50,000గా నిర్ణయించారు. EMI సదుపాయం కూడా కల్పించారు. మొదటి ప్రయత్నంలో గ్యోతే / టెల్సీ / OSD పరీక్ష ఫీజును కస్టమర్ ద్వారా చెల్లిస్తారు. ఇది అంతర్జాతీయ స్థాయిలో శిక్షణ పొందేందుకు అద్భుతమైన అవకాశం.
2025 నవంబర్ 10వ తేదీ రిజిస్ట్రేషన్కు చివరి తేదీగా నిర్ణయించారు. అభ్యర్థులు తమ వివరాలను [naipunyam.ap.gov.in](https://naipunyam.ap.gov.in/user-registration?page=program-registration) వెబ్సైట్లో నమోదు చేసుకోవాలి లేదా [skillinternational@apssdc.in](mailto:skillinternational@apssdc.in) కు తమ బయోడేటా పంపవచ్చు. ఈ ప్రాజెక్ట్ ద్వారా ఆంధ్రప్రదేశ్ యువతకు విదేశీ కెరీర్ అవకాశాలు అందించడమే కాకుండా, రాష్ట్రాన్ని నైపుణ్యాభివృద్ధిలో ముందంజలో నిలపాలనే లక్ష్యంతో ప్రభుత్వం ఈ కార్యక్రమాన్ని చేపట్టింది.
