గర్భధారణ సమయంలో పారాసిటమాల్ (Paracetamol During Pregnancy) వాడకంపై గత కొంతకాలంగా గర్భిణులు, కుటుంబ సభ్యుల్లో అనేక సందేహాలు, భయాలు నెలకొన్నాయి. ముఖ్యంగా ఈ మందు వాడటం వల్ల పుట్టబోయే పిల్లలకు ఆటిజం లేదా ఏడీహెచ్డీ వంటి నాడీ సంబంధిత సమస్యలు వస్తాయన్న ప్రచారం కారణంగా చాలామంది ఆందోళన చెందారు. అయితే ఈ భయాలకు ఇకపై తావులేదని ప్రముఖ వైద్య జర్నల్ ‘ది లాన్సెట్’ స్పష్టంగా తెలియజేసింది. గర్భిణులు అవసరమైన సందర్భాల్లో పారాసిటమాల్ వాడటం సురక్షితమేనని తాజా అధ్యయనం తేల్చి చెప్పింది.
యూరప్కు చెందిన ప్రముఖ పరిశోధకుల బృందం ఈ అంశంపై సమగ్ర అధ్యయనం నిర్వహించింది. లండన్లోని సిటీ సెయింట్ జార్జ్ యూనివర్సిటీకి చెందిన ప్రొఫెసర్ అస్మా ఖలీల్ నేతృత్వంలో ఈ పరిశోధన జరిగింది. గతంలో ప్రపంచవ్యాప్తంగా ప్రచురితమైన 43 అధ్యయనాలను పరిశీలించి, వాటి ఫలితాలను లోతుగా విశ్లేషించారు. ఈ సమీక్షను “గోల్డ్ స్టాండర్డ్ రివ్యూ”గా అభివర్ణిస్తున్నారు. పారాసిటమాల్ వాడకం వల్ల పిల్లల ఆరోగ్యంపై ప్రతికూల ప్రభావాలు ఉన్నాయన్న పాత నివేదికలకు శాస్త్రీయ ఆధారాలు లేవని ఈ అధ్యయనం స్పష్టం చేసింది.
గతంలో జరిగిన కొన్ని పరిశోధనల్లో పారాసిటమాల్ వాడకం, పిల్లల్లో నాడీ సంబంధిత సమస్యల మధ్య సంబంధం ఉందన్న అనుమానాలు వ్యక్తమయ్యాయి. అయితే అవి పూర్తిస్థాయి ఆధారాలతో కూడినవి కాదని తాజా అధ్యయనం వెల్లడించింది. పిల్లల ఆరోగ్య సమస్యలకు జన్యుపరమైన కారణాలు, (Pregnancy Health News) గర్భధారణ సమయంలో తల్లికి వచ్చిన జ్వరం, ఇన్ఫెక్షన్లు లేదా ఇతర వైద్య పరిస్థితులు కారణమై ఉండవచ్చని పరిశోధకులు పేర్కొన్నారు. మందు ప్రభావమే కారణమని తేల్చడం సరైంది కాదని స్పష్టం చేశారు.
ప్రొఫెసర్ అస్మా ఖలీల్ మాట్లాడుతూ, గర్భిణులకు జ్వరం లేదా తీవ్రమైన నొప్పులు వచ్చినప్పుడు చికిత్స తీసుకోకుండా ఉండటం మరింత ప్రమాదకరమని తెలిపారు. సరైన సమయంలో మందులు వాడకపోతే తల్లి, బిడ్డ ఇద్దరికీ సమస్యలు తలెత్తే అవకాశం ఉందన్నారు. తీవ్రమైన జ్వరం వల్ల గర్భస్రావం, అకాల ప్రసవం వంటి ప్రమాదాలు కూడా ఉండొచ్చని ఈ నివేదిక హెచ్చరించింది. అందువల్ల వైద్యుల సలహా మేరకు అవసరమైనప్పుడు పారాసిటమాల్ వాడటం సురక్షితమని పరిశోధకులు భరోసా ఇచ్చారు.
ఈ అధ్యయనం ఫలితాలు (Medical Research News) ప్రపంచవ్యాప్తంగా ఉన్న ఆరోగ్య సంస్థల మార్గదర్శకాలను మరింత బలపరుస్తున్నాయి. గర్భధారణ సమయంలో మందుల వాడకంపై భయపడకుండా, డాక్టర్ల సూచనలను పాటించాల్సిన అవసరం ఉందని నిపుణులు సూచిస్తున్నారు. తాజా నివేదికతో గర్భిణుల్లో నెలకొన్న అనుమానాలకు తెరపడినట్టే అని వైద్య వర్గాలు అభిప్రాయపడుతున్నాయి.
