దుబాయ్లో చదువు, ఉద్యోగాల అవకాశాలు ఈ ఏడాది భారత విద్యార్థులకు పెద్ద ఆకర్షణగా మారాయి. వేగంగా అభివృద్ధి చెందుతున్న ఈ ప్రాంతం ప్రపంచవ్యాప్తంగా పెట్టుబడులను ఆకర్షిస్తూ కొత్త రంగాల్లో విస్తరిస్తోంది. ఈ పెరుగుతున్న అవకాశాలు విదేశాల్లో చదవాలని చూసే భారత విద్యార్థులకు దుబాయ్ను అత్యంత సరైన గమ్యస్థానంగా మార్చాయి. సులభమైన అడ్మిషన్ విధానం ప్రభుత్వ అనుకూల విధానాలు చదువు పూర్తయ్యే సరికి లభించే ఉద్యోగ అవకాశాలు వంటి అంశాలు ఈ నగరాన్ని యువతరానికి దగ్గర చేస్తున్నాయి.
దుబాయ్లో చమురు గ్యాస్, టూరిజం, ఫైనాన్స్, రియల్ ఎస్టేట్ వంటి రంగాలు వేగంగా విస్తరిస్తుండటంతో గ్రాడ్యుయేట్లకు ఉద్యోగాల అవకాశాలు పెరుగుతున్నాయి. ఇక్కడ చదివిన వాళ్లకు స్థానికంగానే కాక గల్ఫ్ దేశాల్లో కూడా మంచి కెరీర్ అవకాశాలు లభిస్తున్నాయి. ముఖ్యంగా, క్లిష్టమైన పేపర్వర్క్ లేకుండా అడ్మిషన్లు పొందవచ్చు. చాలా యూనివర్సిటీలు ఆన్లైన్ ద్వారా దరఖాస్తులను స్వీకరిస్తాయి. విద్యార్థులకు అవసరమైన పత్రాల పరిశీలన వీసా ప్రాసెసింగ్ వంటి అంశాలలో కళాశాలలు ప్రత్యక్షంగా సహాయం చేస్తాయి.
దుబాయ్లో అత్యుత్తమ ప్రతిభ కనబరిచిన విద్యార్థులకు 10 సంవత్సరాల ‘గోల్డెన్ వీసా’ కూడా లభిస్తుంది. ఇది చదువు పూర్తయ్యాక అక్కడే ఉద్యోగం చేసేందుకు, కెరీర్ను స్థిరపరుచుకోవడానికి పెద్ద సహాయం చేస్తుంది. అంతేకాదు ఇక్కడ జీతాలపై ఆదాయపు పన్నులు ఉండకపోవడం అనేకమంది విద్యార్థులు యువ ఉద్యోగులను ఆకట్టుకుంటున్న అంశం. పన్నుల మినహాయింపు వల్ల చేతికి వచ్చే మొత్తం ఎక్కువవుతుందని భావించి చాలామంది దుబాయ్ను ఆదర్శ గమ్యస్థానంగా చూస్తున్నారు.
దుబాయ్లో వివిధ దేశాల ప్రజలు కలిసి ఉండటంతో విద్యార్థులకు ప్రత్యేకమైన గ్లోబల్ అనుభవం లభిస్తుంది. ఇది వారి కమ్యూనికేషన్ నైపుణ్యాలు, వ్యక్తిత్వ వికాసం, జీవనశైలిలో మార్పులకు తోడ్పడుతుంది. ఇక్కడ విస్తృతంగా ఇంగ్లీష్ మాట్లాడటం వల్ల భాష విషయంలో పెద్ద ఇబ్బందులు ఉండవు. భారత దేశానికి కేవలం మూడు గంటల దూరంలో ఉండటంతో ఇంటికి రావడం కూడా సౌకర్యంగా ఉంటుంది. ఈ భౌగోళిక దగ్గరదనం విద్యార్థులు వారి కుటుంబాలకు పెద్ద ధైర్యాన్ని ఇస్తుంది.
ఒక సంవత్సరానికి సుమారు 50,000 దిర్హామ్ ట్యూషన్ ఫీజుగా ఖర్చవుతుంది. నివాసం, భోజనం, ఇతర అవసరాలకు సుమారుగా 30,000 దిర్హామ్ ఖర్చు అవుతుంది. అయితే ఇతర దేశాలతో పోలిస్తే ఇది తక్కువగానే ఉంటుంది. పైగా దుబాయ్లో పని చేసే అవకాశాలు ఎక్కువగా ఉండటంతో విద్యార్థులు తమ ఖర్చులను సులభంగా తీరుస్తున్నారు. UK, US వంటి దేశాల టాప్ యూనివర్సిటీల బ్రాంచ్ క్యాంపసులు కూడా ఇక్కడ ఉండటంతో ప్రపంచ స్థాయి డిగ్రీలు తక్కువ ఖర్చుతో పొందే అవకాశం ఉంది.
దుబాయ్లో ప్రముఖ విద్యాసంస్థల్లో యూనివర్సిటీ ఆఫ్ బర్మింగ్హామ్, హెరిట్ వాట్ యూనివర్సిటీ, మర్డాక్ యూనివర్సిటీ, యూనివర్సిటీ ఆఫ్ వొల్లోంగాంగ్, బాత్ స్పా యూనివర్సిటీ వంటి అనేక విశ్వవిద్యాలయాలు ఉన్నాయి. ఇవి బిజినెస్ మేనేజ్మెంట్, టూరిజం, హాస్పిటాలిటీ, సివిల్ ఇంజినీరింగ్, ఆర్కిటెక్చర్ వంటి కోర్సుల్లో ప్రపంచ స్థాయి విద్యను అందిస్తున్నాయి. ప్రతి సంవత్సరం వేలాది మంది భారత విద్యార్థులు ఈ కోర్సుల్లో చేరి తమ భవిష్యత్తుకు బలమైన పునాది వేస్తున్నారు.
మొత్తం చూస్తే దుబాయ్లో విద్య అనేది కేవలం డిగ్రీ కోసం చేసే ప్రయాణం మాత్రమే కాదు అంతర్జాతీయ అనుభవం, అద్భుతమైన కెరీర్ అవకాశాలు, పన్నుల మినహాయింపు, గోల్డెన్ వీసా వంటి లాభాలు అందించే మార్గం. ఈ ప్రయోజనాలన్నింటితో దుబాయ్ ప్రపంచంలోనే వేగంగా ఎదుగుతున్న విద్యా-ఉద్యోగ గమ్యస్థానాల్లో ఒకటిగా నిలుస్తోంది. భారత విద్యార్థులు దీనిని తమ భవిష్యత్తుకు మైలురాయిగా చూస్తూ అక్కడ చదువుకు ప్రాధాన్యం ఇస్తున్నారు.
