ఆగ్నేయ బంగాళాఖాతంలో కొత్తగా అల్పపీడనం ఏర్పడే అవకాశం ఉండడంతో ఆంధ్రప్రదేశ్పై మరోసారి తుఫాన్ ముప్పు పొంచి ఉందని వాతావరణ శాఖ హెచ్చరించింది. రాబోయే శనివారం ఈ అల్పపీడనం రూపుదిద్దుకుని, తర్వాత 48 గంటల్లో వాయుగుండంగా మారి నైరుతి బంగాళాఖాతంలో తుఫాన్గా బలపడే అవకాశం ఉందని తెలిపింది. దీనితో ఇప్పటికే కొన్ని జిల్లాల్లో వాతావరణ మార్పులు మొదలై తేలికపాటి వర్షాలు కురుస్తున్నాయి.
అల్పపీడనం ప్రభావంతో ఈరోజు ప్రకాశం, నెల్లూరు, తిరుపతి, చిత్తూరు జిల్లాల్లో తేలికపాటి నుంచి ఓ మోస్తరు వర్షాలు పడనున్నాయని విపత్తుల నిర్వహణ సంస్థ తెలిపింది. శుక్రవారం కూడా ఈ జిల్లాలతో పాటు కృష్ణా, బాపట్లలో వర్షాలు కురిసే అవకాశం ఉంది. రాష్ట్రంలోని అనేక ప్రాంతాల్లో శుక్ర, శని, ఆదివారాల్లో తేలికపాటి వర్షాలు, మంగళవారం కొన్ని చోట్ల భారీ వర్షాలు పడే అవకాశం ఉందని IMD ప్రకటించింది.
ఇక చలి తీవ్రత కూడా ఏపీలో పెరుగుతోంది. ముఖ్యంగా ఏజెన్సీ ప్రాంతాల్లో ఉష్ణోగ్రతలు తీవ్రంగా పడిపోతుండటంతో ప్రజలు ఇబ్బందులు పడుతున్నారు. కొన్ని ప్రాంతాల్లో 4.6 డిగ్రీల కనిష్ఠ ఉష్ణోగ్రత నమోదైంది. ముంచంగిపుట్టు, చింతపల్లి, డుంబ్రిగుడ, పెదబయలు వంటి పర్వత ప్రాంతాల్లో కూడా ఉష్ణోగ్రతలు 8 డిగ్రీల పరిధిలోనే కొనసాగుతున్నాయి. ఉత్తరాంధ్ర, తెలంగాణ, ఛత్తీస్గఢ్ రాష్ట్రాల్లో కూడా సాధారణం కంటే 5 డిగ్రీలు తక్కువ ఉష్ణోగ్రతలు నమోదవుతున్నాయి.
మొంథా తుఫాన్ కారణంగా ఇటీవల ఏపీ అనేక జిల్లాల్లో కుండపోత వర్షాలు కురిశాయి. 117 మండలాల్లో భారీ వర్షాలు, 58 మండలాల్లో అతిభారీ వర్షాలు, 12 మండలాల్లో అత్యంత భారీ వర్షాలు కురిసినట్లు అధికారులు తెలిపారు. ప్రకాశం, నెల్లూరు, బాపట్ల, నంద్యాల, పల్నాడు, అల్లూరి సీతారామరాజు జిల్లాల్లో వరదలాంటి పరిస్థితులు నెలకొన్నాయి. ఈ అనుభవం ప్రజల్లో కొత్త తుఫాన్పై భయాందోళనలు పెంచుతోంది.
తాజా వాతావరణ సూచనలతో మరోసారి భారీ వర్షాలు మరియు గాలివానల ముప్పు ఉందని నిపుణులు హెచ్చరిస్తున్నారు. ప్రభుత్వం, విపత్తుల నిర్వహణ సంస్థ ముందస్తు చర్యలు తీసుకుంటోంది. ప్రజలు కూడా అప్రమత్తంగా ఉండాలని, అధికారుల సూచనలను పాటించాలని విజ్ఞప్తి చేస్తున్నారు. గత మొంథా తుఫాన్ ప్రభావం ఇంకా ప్రజల మదిలో ఉండడంతో, నూతన తుఫాన్ సమాచారం భయాన్ని కలిగిస్తోంది.
