సినిమాలు, కార్టూన్లు, డిజిటల్ కంటెంట్ ప్రభావం పిల్లలపై రోజు రోజుకు పెరుగుతున్న ఈ కాలంలో, మన సంస్కృతి-పురాణాల ప్రాధాన్యతను మళ్లీ గుర్తు చేయాల్సిన అవసరం ఉందని గౌరవ ముఖ్యమంత్రి చంద్రబాబు నాయుడు స్పష్టం చేశారు. విదేశీ సూపర్ హీరోల కథలకే పరిమితమవుతున్న పిల్లల ఊహాజగత్తును మన పురాణ గాథల వైపు మళ్లించాల్సిన బాధ్యత తల్లిదండ్రులు, ఉపాధ్యాయులు, సమాజం మొత్తంపైనా ఉందని ఆయన పేర్కొన్నారు. స్పైడర్ మ్యాన్, బ్యాట్ మ్యాన్ వంటి కల్పిత పాత్రలకన్నా మన ఇతిహాసాల్లోని మహానుభావుల జీవితం పిల్లలకు ఎంతో విలువైన బోధన ఇస్తుందని సీఎం వివరించారు.
హాలీవుడ్ సూపర్ హీరోలను గొప్పగా చూపించే సినిమాలు, సిరీస్లు పిల్లలను ఆకర్షిస్తున్నాయన్నది నిజమే అయినా, వాటితో పాటు మన పురాణ పురుషుల గొప్పతనాన్ని కూడా సమానంగా తెలియజేయాలని చంద్రబాబు నాయుడు సూచించారు. సూపర్ మ్యాన్ బలాన్ని చూసి ముచ్చటపడే పిల్లలకు, మన హనుమంతుడి అపార శక్తి, భక్తి, త్యాగ గుణాల గురించి వివరించాల్సిన అవసరం ఉందన్నారు. అలాగే ఐరన్ మ్యాన్, బ్యాట్ మ్యాన్లను ఆదర్శంగా భావించే యువతకు, మహాభారతంలో అర్జునుడు చూపిన ధైర్యం, క్రమశిక్షణ, ధర్మబద్ధమైన యుద్ధ నైపుణ్యాన్ని వివరించగలిగితే నిజమైన విలువలు అర్థమవుతాయని చెప్పారు.
మన సంస్కృతిలో కృష్ణుడి లీలలు, శివుడి మహిమలు కేవలం కథలు మాత్రమే కాకుండా జీవన విధానానికి మార్గదర్శకాలుగా నిలుస్తాయని ముఖ్యమంత్రి అభిప్రాయపడ్డారు. కృష్ణుడు బోధించిన కర్మయోగం, శివుడి తపస్సు, త్యాగం, సమతాభావం యువతకు ఆచరణాత్మకమైన సందేశాలు అందిస్తాయని ఆయన అన్నారు. అలాగే రాముడు చూపిన ఆదర్శ జీవితం, ధర్మపాలన, ప్రజల పట్ల బాధ్యతే రామరాజ్యానికి అసలైన అర్థమని, పురుషోత్తముడిగా రాముడి వ్యక్తిత్వం ఇప్పటికీ సమాజానికి మార్గదర్శకమని చెప్పారు.
విదేశీ సినిమాలైన అవతార్ లాంటి చిత్రాలు సాంకేతికంగా అద్భుతంగా ఉన్నా, మన భారత, రామాయణ, మహాభారత గాథలు భావోద్వేగంగా, విలువల పరంగా ఎంతో గొప్పవని పిల్లలకు చెప్పాల్సిన బాధ్యత మనపై ఉందని చంద్రబాబు నాయుడు పేర్కొన్నారు. కథల్లోని మంచి-చెడు పాత్రలను వివరించటం ద్వారా పిల్లలకు నీతి, అనీతి మధ్య తేడా అర్థమవుతుందని ఆయన వివరించారు. బకాసురుడు, కంసుడు వంటి రాక్షస పాత్రలు చెడును సూచిస్తే, వాటిని ఎదుర్కొన్న ధర్మశక్తులు మంచి మార్గాన్ని చూపిస్తాయని చెప్పారు.
పురాణాల పట్ల ప్రజలు ఆసక్తి కోల్పోతున్న సమయంలో, దివంగత ఎన్టీఆర్ పురాణ గాథలతో కూడిన సినిమాలు చేసి సమాజంలో చైతన్యం తీసుకువచ్చారని చంద్రబాబు నాయుడు గుర్తు చేశారు. సినిమాల ద్వారా విలువలను బోధించిన ఎన్టీఆర్, రాజకీయాల్లోనూ అదే స్థాయిలో ప్రజాసేవ, నైతిక విలువలను పాటించిన నాయకుడిగా నిలిచారని అన్నారు. దేశాభివృద్ధికి వాజ్పేయి బలమైన పునాదులు వేస్తే, ఆ మార్గాన్ని కొనసాగిస్తూ ప్రధాని నరేంద్ర మోదీ దేశాన్ని అభివృద్ధి దిశగా ముందుకు తీసుకెళ్తున్నారని సీఎం వ్యాఖ్యానించారు.
భవిష్యత్తులో భారత్ సూపర్ పవర్గా ఎదగాలంటే కేవలం సాంకేతిక అభివృద్ధి సరిపోదని, మన మూలాలైన సంస్కృతి, విలువలు, పురాణాల బోధన కూడా అంతే ముఖ్యమని చంద్రబాబు నాయుడు స్పష్టం చేశారు. వినూత్న ఆలోచనలు, కొత్త ఆవిష్కరణలతో పాటు ధర్మం, నైతికతను కలిపి ముందుకు సాగితేనే దేశానికి బలమైన భవిష్యత్తు ఉంటుందని ఆయన అభిప్రాయపడ్డారు.
