డార్లింగ్‌ ప్రభాస్‌ అభిమాన నటుడు ఆ ముగ్గురు మాత్రం కాదు.. తెలిస్తే ఆశ్చర్యపోతారు!

• ప్రభాస్‌కు ఇష్టమైన నటుడు చిరంజీవి, ఎన్టీఆర్‌, కృష్ణంరాజు కాదు. పాత తరం నటుల్లో తన నటనతో ప్రత్యేక గుర్తింపు తెచ్చుకున్న ఓ మహానటుడంటే డార్లింగ్‌కు ఎంతో ఇష్టం.
• ప్రభాస్‌ ప్రస్తుతం ‘ఫౌజీ’, ‘స్పిరిట్‌’ వంటి భారీ చిత్రాలతో బిజీగా ఉన్నారు. ఈ సినిమాలపై అభిమానుల్లో భారీ అంచనాలు ఉన్నాయి.

Prabhas Favorite Actor: రెబల్ స్టార్ ప్రభాస్‌.. ‘బాహుబలి’ సినిమాతో పాన్ ఇండియా స్థాయిలో గుర్తింపు తెచ్చుకుని, ఇప్పుడు గ్లోబల్ స్టార్‌గా ఎదిగారు. ఆయన సినిమాల గురించి మాత్రమే కాదు.. వ్యక్తిగత అభిరుచుల గురించి తెలుసుకోవడానికి కూడా అభిమానులు ఆసక్తి చూపిస్తుంటారు. ముఖ్యంగా ప్రభాస్‌కు ఇష్టమైన హీరో ఎవరు? ఆయన అభిమానించే నటుడు ఎవరనే ప్రశ్న చాలామందిలో ఆసక్తిని రేకెత్తిస్తోంది. అయితే ప్రభాస్ తనకు ఇష్టమైన నటుడిగా చెప్పిన పేరు మాత్రం చాలామందిని ఆశ్చర్యపరుస్తుంది.

భారీ చిత్రాలతో బిజీగా ప్రభాస్‌..

ప్రభాస్ ప్రస్తుతం వరుసగా భారీ బడ్జెట్ చిత్రాలతో బిజీగా ఉన్నారు. ఆయన నటించిన ‘ది రాజా సాబ్’ ఆశించిన స్థాయిలో విజయం సాధించకపోయినా, రాబోయే సినిమాలపై అభిమానుల్లో భారీ అంచనాలు ఉన్నాయి. ప్రస్తుతం ఆయన ‘ఫౌజీ’, ‘స్పిరిట్’ వంటి చిత్రాలతో ప్రేక్షకులను అలరించేందుకు సిద్ధమవుతున్నారు. ఈ సినిమాలు బాక్సాఫీస్ వద్ద ఎలాంటి ప్రభావం చూపిస్తాయనేది ఆసక్తికరంగా మారింది.

ప్రభాస్‌కు ఇష్టమైన హీరోయిన్లు వీరే!

ప్రభాస్‌కు ఇష్టమైన హీరోయిన్ల గురించి గతంలో పలు సందర్భాల్లో చర్చ జరిగింది. పాత తరం నటీమణుల్లో మహానటి సావిత్రి అంటే ఆయనకు ప్రత్యేకమైన అభిమానం ఉందని తెలుస్తోంది. ఇక ప్రస్తుత తరం హీరోయిన్లలో అనుష్క, సాయిపల్లవి, సమంత, త్రిష వంటి నటీమణుల పేర్లు కూడా ఆయన అభిరుచుల ప్రస్తావనలో వినిపించాయి.

ఫేవరెట్ యాక్టర్‌గా మహానటుడు పేరు!

అయితే హీరోల విషయానికి వచ్చేసరికి ప్రభాస్‌ ఎంపిక మరింత ఆసక్తికరంగా ఉంటుంది. సాధారణంగా తన పెదనాన్న, నటుడు కృష్ణంరాజు లేదా అగ్ర కథానాయకులు ఎన్టీఆర్‌, చిరంజీవి పేర్లు చెబుతారని చాలామంది భావిస్తారు. కానీ ప్రభాస్ తనకు ఇష్టమైన నటుడిగా సీనియర్ నటుడు ఎస్వీ రంగారావు (ఎస్వీఆర్‌) పేరును వెల్లడించారు.

ఎస్వీ రంగారావు నటన అంటే తనకు ఎంతో ఇష్టమని, ఆయన అద్భుతమైన నటుడని ప్రభాస్ పేర్కొన్నట్లు గతంలో సితారకు ఇచ్చిన ఇంటర్వ్యూలో వెల్లడైంది. ఎస్వీఆర్‌ తెరపై కనిపించినప్పుడు ఆయన నటన ప్రత్యేకమైన అనుభూతిని కలిగిస్తుందని ప్రభాస్ అభిప్రాయపడినట్లు సమాచారం.

అందుకే ఎస్వీఆర్‌కు ప్రత్యేక స్థానం!

తెలుగు సినీ చరిత్రలో ఎస్వీ రంగారావుకు విశిష్టమైన స్థానం ఉంది. పౌరాణిక, జానపద, సాంఘిక చిత్రాల్లో విభిన్న పాత్రలతో ప్రేక్షకులను ఆకట్టుకున్న ఆయన తన నటనతో చెరగని ముద్ర వేశారు. అలాంటి మహానటుడిని ప్రభాస్ తన అభిమాన నటుడిగా పేర్కొనడం సినీ అభిమానులకు ఆసక్తికరమైన విషయమే. స్టార్ హీరోల పేర్లను కాకుండా, తన నటనతో ప్రేక్షకుల మనసులు గెలుచుకున్న ఎస్వీ రంగారావును ఎంచుకోవడం ప్రభాస్ అభిరుచిని తెలియజేస్తోంది.