NTR: ఎన్టీఆర్ పొలిటికల్ ఎంట్రీ.... క్లారిటీ ఇచ్చిన అభిమానుల సంఘం!

• అది కేవలం 'ఊరు-వాడ' సామాజిక కార్యక్రమమే.. రాజకీయాలతో ముడిపెట్టొద్దు!
• న్టీఆర్ రాజకీయ ఆరంగేట్రంపై వస్తున్న వార్తల్లో నిజమెంత?
• ఫ్యాన్స్లో అయోమయం వద్దు.. తారక్ రాజకీయ వార్తలపై ఎన్టీఆర్ ఫ్యాన్స్ ప్రెస్ నోట్!

NTR: టాలీవుడ్ స్టార్ హీరో జూనియర్ ఎన్టీఆర్ (తారక్) రాజకీయ ఆరంగేట్రంపై గత కొద్దిరోజులుగా సోషల్ మీడియాలో వస్తున్న వార్తలకు ఎట్టకేలకు బ్రేక్ పడింది. జులై 18న ఎన్టీఆర్ భారీ ఎత్తున రాజకీయాల్లోకి రాబోతున్నారంటూ జోరుగా ప్రచారం సాగింది. అయితే, ఈ వార్తలపై ఎన్టీఆర్ అభిమానుల సంఘం అధికారికంగా స్పందిస్తూ ఒక స్పష్టీకరణ లేఖను విడుదల చేసింది.

రాజకీయాల కోసం కాదు.. అది సామాజిక కార్యక్రమం
జులై 18న అభిమానుల సంఘం ఆధ్వర్యంలో నిర్వహించనున్న 'ఊరు-వాడ' కార్యక్రమానికి, తారక్ రాజకీయ ఎంట్రీకి ఎలాంటి సంబంధం లేదని ఆ లేఖలో స్పష్టం చేశారు. ఈ కార్యక్రమం కేవలం సమాజ సేవ, సామాజిక బాధ్యతలో భాగంగా చాలా కాలం క్రితమే ప్లాన్ చేశామని, దీనిని రాజకీయాలతో ముడిపెట్టవద్దని కోరారు.

అనవసర గందరగోళానికి గురిచేయొద్దు
సోషల్ మీడియా పేజీలు, కొన్ని మీడియా సంస్థలు ఎలాంటి నిజనిజాలు తెలుసుకోకుండా ఎన్టీఆర్ పొలిటికల్ ఎంట్రీపై అసత్య ప్రచారాలు చేస్తున్నాయని అభిమానుల సంఘం ఆగ్రహం వ్యక్తం చేసింది. ఇలాంటి పుకార్ల వల్ల సాధారణ అభిమానులు అనవసరంగా అయోమయానికి (కన్ఫ్యూజన్కు) గురవుతున్నారని, ఇకనైనా ఇలాంటి తప్పుడు వార్తలను ప్రచారం చేయడం ఆపాలని విజ్ఞప్తి చేశారు.

సినిమా వర్గాల్లో ఆసక్తికర చర్చ
తమిళనాడులో స్టార్ హీరో విజయ్ విజయవంతంగా రాజకీయ పార్టీ పెట్టి మంచి ఫలితాలు సాధించినప్పటి నుంచి, తెలుగులో కూడా అల్లు అర్జున్, జూనియర్ ఎన్టీఆర్ వంటి టాప్ హీరోలు రాజకీయాల్లోకి వస్తారనే ప్రచారం గట్టిగా సాగుతోంది. ఇటీవలే అల్లు అర్జున్ పొలిటికల్ స్ట్రాటజిస్ట్ ప్రశాంత్ కిశోర్ను కలిశారనే వార్తలు కూడా వచ్చాయి. అయితే తాజాగా ఎన్టీఆర్ ఫ్యాన్స్ అసోసియేషన్ క్లారిటీ ఇవ్వడంతో తారక్ పొలిటికల్ ఎంట్రీ రూమర్లకు ప్రస్తుతానికి తెరపడినట్లయింది. అయినప్పటికీ, ఈ విషయంపై నేరుగా ఎన్టీఆర్ స్వయంగా ఎప్పుడు స్పందిస్తారా అని అభిమానులు ఆసక్తిగా ఎదురుచూస్తున్నారు.