అమెరికా వెళ్లాలనేది ఎంతోమంది భారతీయుల కల. విద్యా, ఉద్యోగావకాశాల కోసం అమెరికా చేరే వారి సంఖ్య రోజురోజుకూ పెరుగుతోంది. కానీ ఇటీవల విదేశీయులు అక్కడ నేరాలకు పాల్పడుతున్న ఘటనలు ఎక్కువవుతున్నాయి. ముఖ్యంగా భారతీయులపై ఆ దేశంలోని కొన్ని నియమాలు మరింత కఠినంగా అమలవుతున్నాయి. ఈ నేపథ్యంలో అమెరికా ప్రభుత్వం కీలక హెచ్చరికలు జారీ చేసింది.
అమెరికాలో నేరాలకు పాల్పడే విదేశీయులకు lifetime ban విధించనున్నట్లు యూఎస్ ఎంబసీ స్పష్టం చేసింది. చట్టాలను అతిక్రమిస్తే వారు ఇక ఎప్పటికీ అమెరికా అడుగు పెట్టలేరని హెచ్చరించింది. విదేశీయులు అమెరికా చట్టాలను గౌరవించి అక్కడి నియమాలను పాటించాలని కోరింది. ఈ ఆదేశాలు ట్రంప్ ప్రభుత్వం తీసుకున్న "Make America Great Again" విధానంలో భాగంగా ఉన్నాయి. ఇప్పటివరకు వేలాది మంది వలసదారులను అమెరికా నుంచి బహిష్కరించారు.
భారత విదేశాంగ మంత్రిత్వశాఖ ప్రతినిధి రణధీర్ జైశ్వాల్ స్పందిస్తూ, భారతీయులు అమెరికాలో నిబంధనలు తప్పక పాటించాలని సూచించారు. ఇటువంటి చర్యల వల్ల దేశప్రతిష్టకు నష్టం కలిగే అవకాశం ఉందని, అందువల్ల ప్రతీ భారత పౌరుడు బాధ్యతగా ప్రవర్తించాలన్నారు. ఇటీవల మూడు సార్లు అమెరికా ఎంబసీ ఇలాంటి హెచ్చరికలు జారీ చేయడం గమనార్హం.
ఇదిలా ఉండగా ట్రంప్ యూరప్ పర్యటనలో వలసదారులపై తీవ్ర వ్యాఖ్యలు చేశారు. యూరప్ దేశాల్లో వలసలు కొనసాగితే వాటి భవిష్యత్తు ప్రమాదంలో పడుతుందన్న ఆయన వ్యాఖ్యలు చర్చనీయాంశమయ్యాయి. ఐక్యరాజ్యసమితి తాజా అంచనాల ప్రకారం ప్రస్తుతం 87 మిలియన్ల వలసదారులు యూరప్ లో నివసిస్తున్నారు. వలసల సమస్యపై ట్రంప్ ధృఢంగా ఉన్నారు, ఇది ఆయన పాలనకు ముఖ్యాంశంగా మారింది.
