దేశ వ్యాప్తంగా ఉన్న రైల్వే రీజియన్లలో గ్రూప్–డీ పోస్టుల భర్తీకి నిర్వహించనున్న కంప్యూటర్ బేస్డ్ టెస్ట్ (CBT–1) పరీక్షల షెడ్యూల్లో కీలక మార్పులు చోటు చేసుకున్నాయి. ఈ మేరకు రైల్వే రిక్రూట్మెంట్ బోర్డ్ (RRB) సవరించిన పరీక్ష తేదీలతో కూడిన కొత్త నోటిఫికేషన్ను విడుదల చేసింది. గతంలో విడుదల చేసిన షెడ్యూల్ ప్రకారం 2026 జనవరి 1 నుంచి 16 వరకు గ్రూప్–డీ పరీక్షలు నిర్వహించాల్సి ఉండగా, తాజాగా ఆ తేదీలను మార్చినట్లు ఆర్ఆర్బీ ప్రకటించింది. ఈ మార్పులతో లక్షలాది మంది అభ్యర్థులు తాజా షెడ్యూల్పై దృష్టి సారించాల్సిన పరిస్థితి ఏర్పడింది.
సవరించిన షెడ్యూల్ ప్రకారం ఆర్ఆర్బీ గ్రూప్–డీ CBT–1 పరీక్షలు 2026 జనవరి 8, 9 తేదీలతో పాటు ఫిబ్రవరి 2, 3, 4, 5, 6, 9, 10 తేదీల్లో నిర్వహించనున్నారు. అంటే మొత్తం తొమ్మిది రోజుల్లో ఈ పరీక్షలు జరుగనున్నాయి. పరీక్షలు దేశ వ్యాప్తంగా ఉన్న పలు కేంద్రాల్లో ఆన్లైన్ విధానంలో జరుగుతాయని ఆర్ఆర్బీ స్పష్టం చేసింది. అభ్యర్థులు తమకు కేటాయించిన తేదీ, సెషన్, పరీక్షా కేంద్రానికి అనుగుణంగా ముందుగానే సిద్ధం కావాలని సూచించింది. తాజా మార్పులతో పరీక్షలకు హాజరయ్యే అభ్యర్థులు అధికారిక వెబ్సైట్ను తరచూ పరిశీలించాలని సూచనలు జారీ చేసింది.
ఇక గ్రూప్–డీ పరీక్షలకు సంబంధించిన ముఖ్యమైన అప్డేట్గా ఎగ్జామ్ సిటీ ఇంటిమేషన్ స్లిప్ విడుదల తేదీని కూడా ఆర్ఆర్బీ వెల్లడించింది. అభ్యర్థులు తమ పరీక్ష కేంద్రం ఏ నగరంలో ఉందో తెలుసుకునేందుకు ఉపయోగపడే ఈ సిటీ ఇంటిమేషన్ స్లిప్ను పరీక్ష తేదీకి పది రోజుల ముందు అధికారిక వెబ్సైట్ ద్వారా డౌన్లోడ్ చేసుకోవచ్చు. ఉదాహరణకు జనవరి 8న పరీక్ష ఉన్న అభ్యర్థులకు డిసెంబర్ 29 నాటికి సిటీ స్లిప్ అందుబాటులోకి రానుంది. అలాగే అడ్మిట్ కార్డులు పరీక్ష తేదీకి నాలుగు రోజుల ముందు వెబ్సైట్లో విడుదల చేయనున్నట్లు ఆర్ఆర్బీ స్పష్టం చేసింది.
ఇదే సమయంలో ఆర్ఆర్బీ ఎన్టీపీసీ అండర్ గ్రాడ్యుయేట్ 2024 CBT–2 పరీక్షలకు సంబంధించిన ప్రాథమిక ఆన్సర్ కీని కూడా రైల్వే రిక్రూట్మెంట్ బోర్డ్ విడుదల చేసింది. ఆన్సర్ కీతో పాటు ప్రశ్నపత్రం, రెస్పాన్స్ షీట్లను కూడా అభ్యర్థుల కోసం వెబ్సైట్లో పొందుపరిచింది. ఆన్సర్ కీపై అభ్యంతరాలు ఉంటే ఒక్కో ప్రశ్నకు రూ.50 చెల్లించి డిసెంబర్ 30 వరకు అభ్యంతరం తెలపవచ్చని బోర్డు తెలిపింది. డిసెంబర్ 20న దేశ వ్యాప్తంగా CBT–2 పరీక్షలు నిర్వహించగా, మొత్తం 51,978 మంది అభ్యర్థులు ఈ దశకు అర్హత సాధించారు. ఈ భర్తీ ప్రక్రియ ద్వారా కమర్షియల్ కమ్ టికెట్ క్లర్క్, అకౌంట్స్ క్లర్క్ కమ్ టైపిస్ట్, జూనియర్ క్లర్క్ కమ్ టైపిస్ట్, ట్రైన్స్ క్లర్క్ వంటి 3,445 పోస్టులను భర్తీ చేయనున్నారు.
