2025 చివరి నెల ప్రారంభమయ్యే వేళ, రాబోయే సంవత్సరం కోసం ఉద్యోగులు, విద్యార్థులు అత్యంత ఆతృతగా ఎదురుచూసే విషయం సెలవుల జాబితానే. కొత్త సంవత్సరం ప్లాన్లు, పర్యటనలు, కుటుంబ కార్యక్రమాలు—ఏదైనా ముందుగానే ఫిక్స్ చేసుకోవాలంటే సెలవుల షెడ్యూల్ తప్పనిసరి. ఈ నేపథ్యంలో కేంద్ర ప్రభుత్వం 2026 సంవత్సరానికి వర్తించే అధికారిక సెలవుల క్యాలెండర్ను ప్రకటించింది. ఈసారి సెలవులు ప్రస్తుత సంవత్సరంతో పోల్చితే గణనీయంగా పెరగడం ఉద్యోగులు, విద్యార్థుల్లో ఆనందాన్ని కలిగించింది.
జనవరి నుంచి డిసెంబర్ వరకు మొత్తం 14 తప్పనిసరి (గెజిటెడ్) సెలవులు, 12 ఐచ్ఛిక (రిలాక్సేషన్) సెలవులు ఉండేలా కేంద్రం జాబితాను విడుదల చేసింది. జనవరి 1న నూతన సంవత్సరం సెలవుగా ఉండగా, 14న సంక్రాంతి, 23న వసంత పంచమి, 26న గణతంత్ర దినోత్సవం ప్రకటించారు. వెంటనే ఫిబ్రవరిలో 1న గురు రవిదాస్ జయంతి, 15న మహాశివరాత్రి, 19న ఛత్రపతి శివాజీ మహరాజ్ జయంతి ఉండనుంది.
మార్చి నెలలో రాబోయే పండుగలు కూడా వరుసగానే ఉన్నాయి. మార్చి 4న హోలీ, 19న ఉగాది, 21న రంజాన్ (ఈద్-ఉల్-ఫితర్), 26న శ్రీరామ నవమి, 31న మహావీర్ జయంతి సెలవులను ప్రభుత్వం ఖరారు చేసింది. ఏప్రిల్ తొలి వారంలో 3న గుడ్ ఫ్రైడే, 5న ఈస్టర్, 14న అంబేద్కర్ జయంతి ఉండడంతో ఏప్రిల్లో సెలవులు వరుసగా లభించనున్నాయి.
మే 1న బుద్ధ పౌర్ణమి, 9న రవీంద్రనాథ్ ఠాగూర్ జయంతి, 27న బక్రీద్ ప్రకటించగా, జూన్ 26న మొహర్రం సెలవుగా నిర్ణయించారు. ఆగస్టులో 15న స్వాతంత్ర దినోత్సవం, 26న మిలాద్ఉన్ నబీ, అదే రోజున ఓణం, 28న రక్షాబంధన్ జరగనుంది. సెప్టెంబర్లో 4న జన్మాష్టమి, 14న వినాయక చవితి ఉండగా, అక్టోబర్లో 2న గాంధీ జయంతి, 18–20 తేదీల్లో దసరా సెలవులు ఉండనున్నాయి. పాఠశాలలకు దసరా సెలవులు మరింత ఎక్కువగా లభించే అవకాశం ఉంది.
నవంబర్ నెలలో 8న దీపావళి, 15న చఠ్ పూజ, 24న గురునానక్ జయంతి సెలవులు ప్రకటించగా, డిసెంబర్ 25న క్రిస్మస్తో 2026 సెలవుల క్యాలెండర్ ముగుస్తుంది. వీటితో పాటు ఏడాదిలో 52 ఆదివారాలు, 12 రెండవ శనివారాలు ఉండడంతో మొత్తం సెలవులు విద్యార్థులకు సుమారు 100 దాటే అవకాశం ఉందని అంచనా.
నిజానికి ఈసారి విడుదల చేసిన క్యాలెండర్ ఉద్యోగులు, తల్లిదండ్రులు, విద్యార్థులకు పూర్తి స్థాయి ప్లానింగ్కు ఉపయోగపడుతోంది. పర్యటనలు, వేడుకలు, కుటుంబ కార్యక్రమాల కోసం ముందుగానే షెడ్యూల్ సిద్ధం చేసుకునే వీలు కల్పించడం వల్ల ప్రభుత్వ నిర్ణయాన్ని పలువురు స్వాగతిస్తున్నారు.
