అమెరికా వెళ్లాలనుకునే భారతీయులకు ముఖ్యమైన గమనిక. అమెరికా ప్రభుత్వం నాన్-ఇమ్మిగ్రెంట్ వీసాల జారీ విధానంలో కీలక మార్పులు చేసింది. ఇకపై వీసా కోసం దరఖాస్తు చేసుకునే వారు తమ సొంత దేశంలో లేదా చట్టబద్ధంగా నివసిస్తున్న దేశంలోనే ఇంటర్వ్యూ అపాయింట్మెంట్ తీసుకోవాలి. ఇతర దేశాల్లో వెళ్లి వేగంగా ఇంటర్వ్యూ పూర్తి చేసుకునే అవకాశం ఇక రద్దు చేశారు. ఈ కొత్త నిబంధనలు తక్షణమే అమల్లోకి వచ్చాయి.
కరోనా సమయంలో భారత్లోని అమెరికా ఎంబసీ, కాన్సులేట్లలో వీసా దరఖాస్తులు భారీగా పెరగడంతో అపాయింట్మెంట్స్ కోసం మూడు సంవత్సరాల వరకు వేచి చూడాల్సి వచ్చింది. దీన్ని నివారించడానికి కొందరు భారతీయులు దుబాయ్, బ్యాంకాక్ వంటి ఇతర దేశాల్లో వెళ్ళి B1 (వ్యాపారం), B2 (పర్యాటకం) వీసా ఇంటర్వ్యూలను పూర్తి చేసుకున్నారు. అయితే, తాజాగా ఆ మినహాయింపును పూర్తిగా రద్దు చేశారు.
ఈ మార్పు F1 (విద్య), తాత్కాలిక ఉద్యోగ, వ్యాపారం లేదా పర్యాటక వీసాల కోసం దరఖాస్తు చేసుకునే వ్యక్తులపై ప్రభావం చూపుతుంది. అత్యవసర వ్యాపార సమావేశాలు లేదా కుటుంబ కార్యక్రమాల కోసం అమెరికా వెళ్లాలనుకునే వారికి ఇబ్బందులు తప్పవు. నిపుణుల సూచన ప్రకారం, ప్రయాణికులు ఇప్పుడు చాలా ముందుగానే వీసా ప్రక్రియను సిద్ధం చేసుకోవాలి లేదా సులభమైన వీసా విధానమున్న ఇతర దేశాలను పరిగణించవచ్చు.
