ఆన్లైన్ గేమింగ్ కార్యకలాపాల పేరుతో విదేశాలకు అక్రమంగా నిధుల బదిలీ..
14 మంది వ్యక్తులు, సంస్థలకు చెందిన ప్రాంగణాల్లో అధికారులు తనిఖీలు..
న్యూఢిల్లీ: ఆన్లైన్ గేమింగ్ కార్యకలాపాల పేరుతో విదేశాలకు అక్రమంగా నిధుల బదిలీ జరిగిందనే ఆరోపణల నేపథ్యంలో జైగార్డ్ టెక్నాలజీస్ ప్రైవేట్ లిమిటెడ్పై ఎన్ఫోర్స్మెంట్ డైరెక్టరేట్ (ఈడీ) దర్యాప్తును ముమ్మరం చేసింది. ఈ కేసుకు సంబంధించి దేశంలోని పలుచోట్ల ఈడీ అధికారులు సోదాలు నిర్వహించారు.
విదేశీ మారక నియంత్రణ చట్టం (FEMA) నిబంధనల కింద ఈ దర్యాప్తు కొనసాగుతోందని ఈడీ వెల్లడించింది. మొత్తం 14 మంది వ్యక్తులు, సంస్థలకు చెందిన ప్రాంగణాల్లో అధికారులు తనిఖీలు చేపట్టినట్లు తెలిపింది.
ఈ కేసు ఎలా బయటపడిందంటే.. జైగార్డ్ టెక్నాలజీస్ అనే సంస్థ ఆన్లైన్ గేమింగ్ కార్యకలాపాల కోసం ప్రజల నుంచి భారీ మొత్తంలో నిధులను సేకరిస్తోందనే సమాచారం ఈడీకి అందింది. ముఖ్యంగా పేమెంట్ అగ్రిగేటర్ల ద్వారా డబ్బులు సేకరించినట్లు అధికారులు గుర్తించారు.
దర్యాప్తులో బయటపడిన వివరాల ప్రకారం, ఈ నిధులను “హ్యాపీ ఈజీగో” సహా పలు సంస్థల ద్వారా మళ్లించి విదేశాలకు పంపినట్లు ఈడీ అనుమానిస్తోంది. వాలెట్ రీచార్జీలు, ఎయిర్లైన్ సంబంధిత లావాదేవీల పేరుతో డబ్బులను విదేశాలకు తరలించినట్లు ప్రాథమికంగా గుర్తించినట్లు తెలిపింది.
ఈ లావాదేవీలు ఫెమా నిబంధనలకు విరుద్ధంగా జరిగాయని ఈడీ పేర్కొంది. ఆన్లైన్ గేమింగ్, డిజిటల్ చెల్లింపుల పేరుతో జరుగుతున్న ఆర్థిక మోసాలపై కేంద్ర సంస్థలు మరింత అప్రమత్తంగా వ్యవహరిస్తున్న సమయంలో ఈ కేసు ప్రాధాన్యత సంతరించుకుంది.
ప్రస్తుతం కేసుకు సంబంధించిన ఆర్థిక లావాదేవీలు, విదేశీ బదిలీలు, సంబంధిత సంస్థల పాత్రపై ఈడీ అధికారులు లోతుగా విచారణ కొనసాగిస్తున్నారు. మరిన్ని వివరాలు దర్యాప్తు అనంతరం వెలుగులోకి వచ్చే అవకాశం ఉందని అధికారులు సూచిస్తున్నారు.
