తిరుమల లడ్డూ కల్తీ కేసు గుట్టురట్టు... దొంగలు దొరికేసినట్లే!

అసలు ఆవు నెయ్యే వాడలేదు.. పామాయిల్, కెమికల్స్ కలిపి అగ్మార్క్ పేరిట స్వామివారికి సరఫరా!

ఈడీ దర్యాప్తులో షాకింగ్ నిజాలు.. కల్తీకి తెరతీసిన సుకృతి ఫుడ్స్ ప్రమోటర్ కైలాష్ చంద్ మంగ్లా అరెస్ట్!

భోలే బాబా డెయిరీ డైరెక్టర్ విపిన్ జైన్ ఊచలు లెక్కపెట్టాల్సిందే.. కల్తీ రాకెట్‌లో బిగుస్తున్న ఈడీ ఉచ్చు!

Tirumala: తిరుమల శ్రీవారి లడ్డూ ప్రసాదం తయారీలో వాడే నెయ్యి కల్తీ వ్యవహారంలో కేంద్ర దర్యాప్తు సంస్థ ఎన్‌ఫోర్స్‌మెంట్ డైరెక్టరేట్ (ఈడీ) సంచలన విషయాలను వెలుగులోకి తెచ్చింది. లడ్డూ ప్రసాదంలో ఎలాంటి కల్తీ జరగలేదని, ఇదంతా రాజకీయ కుట్ర అని గతంలో చేసిన వాదనలను పటాపంచలు చేస్తూ ఈడీ తన అధికారిక దర్యాప్తులో నిర్ధారించింది. 2019 నుంచి 2024 మధ్య కాలంలో తిరుమల తిరుపతి దేవస్థానానికి దాదాపు రూ. 230 కోట్ల విలువైన కల్తీ నెయ్యి సరఫరా అయినట్లు, ఇందులో భారీ ఎత్తున మనీ లాండరింగ్ జరిగినట్లు ఈడీ నిర్ధారించింది.

ఆవు నెయ్యి స్థానంలో రసాయనాలు, పామాయిల్

తిరుమలలో స్వామివారి లడ్డూ తయారీకి స్వచ్ఛమైన ఆవు నెయ్యిని వాడాల్సి ఉండగా, అసలు ఆవు నెయ్యే లేకుండా ప్రమాదకర రసాయనాలతో కూడిన సింథటిక్ మిశ్రమాలను వినియోగించినట్లు తేలింది. రిఫైన్డ్ పామ్ ఆయిల్, పామ్ కెర్నల్, పామోలిన్‌లతో పాటు MG90 మోనోగ్లిజరైడ్స్, మైవాసిట్ సాఫ్ట్ 400, ఎసిటిక్ యాసిడ్ ఎస్టర్ వంటి రసాయనాలను నెయ్యి వాసన, చిక్కదనం కోసం కలిపినట్లు దర్యాప్తులో వెల్లడైంది. శాస్త్రీయంగా చూస్తే ఇలాంటి ఎస్టర్లు, మోనోగ్లిజరైడ్స్‌లో జంతువుల కొవ్వు (Animal Fat) ఆనవాళ్లు ఉండే అవకాశాలు మెండుగా ఉంటాయని నిపుణులు స్పష్టం చేస్తున్నారు.

నకిలీ రికార్డులు – ఏఆర్ డెయిరీ శాంపిల్స్ తిరస్కరణతో మొదలైన విచారణ

2024 జూలైలో ప్రభుత్వం మారిన తర్వాత టీటీడీ నిఘా పెంచగా, సరఫరా అయిన నెయ్యి ట్యాంకర్ల శాంపిల్స్ పరీక్షల్లో ఫెయిల్ కావడంతో వాటిని తిరస్కరించారు. అనంతరం ముఖ్యమంత్రి చంద్రబాబు నాయుడు కల్తీ విషయాన్ని బహిర్గతం చేయడంతో దేశవ్యాప్తంగా దుమారం రేగింది. సీబీఐ డైరెక్టర్ పర్యవేక్షణలో ఏర్పాటైన స్వతంత్ర సిట్ (SIT) విచారణ చేపట్టి, నకిలీ ఇన్వాయిస్‌లు సృష్టించి అగ్మార్క్ స్పెషల్ నెయ్యి పేరిట సరఫరా చేసిన 36 మందిపై చార్జ్‌షీట్ నమోదు చేసింది. ఈ కేసులో భారీగా హవాలా, మనీ లాండరింగ్ లావాదేవీలు ఉన్నట్లు సిట్ తేల్చడంతో ఈడీ రంగంలోకి దిగింది.

కీలక నిందితుల అరెస్టులు – కైలాష్ చంద్ మంగ్లా, విపిన్ జైన్

మొత్తం రూ. 230 కోట్ల నకిలీ నెయ్యి సరఫరాలో దాదాపు రూ. 96 కోట్ల విలువైన కల్తీ నెయ్యిని ఒక్క సుకృతి ఫుడ్ ప్రమోటర్ కైలాష్ చంద్ మంగ్లానే తయారు చేసినట్లు తేలింది. ఈ నేపథ్యంలో సుకృతి ఫుడ్స్ ప్రమోటర్ కైలాష్ చంద్ మంగ్లాతో పాటు భోలే బాబా డెయిరీ డైరెక్టర్ విపిన్ జైన్‌ను ఈడీ అధికారులు పక్కా బ్యాంక్ లావాదేవీలు, డిజిటల్ ఆధారాలతో అరెస్ట్ చేశారు. సాధారణంగా తిరుగులేని ఆర్థిక ఆధారాలు ఉంటే తప్ప ఈడీ అరెస్టులు చేయదన్న విషయం ఈ కేసు తీవ్రతను స్పష్టం చేస్తోంది.

కమిషన్లు ఎవరి జేబుల్లోకి వెళ్లాయి? – ఆస్తుల అటాచ్‌మెంట్‌కు రంగం సిద్ధం

ఈడీ తదుపరి అడుగు ఈ వందల కోట్ల రూపాయల కల్తీ నెయ్యి దందాలో ఎవరెవరికి కమీషన్లు ముట్టాయన్న దానిపై దృష్టి సారించింది. దేవుడి ప్రసాదాన్ని సైతం అడ్డం పెట్టుకుని కోట్ల రూపాయలు దండుకున్న అప్పటి పాలకులు, సహకరించిన టీటీడీ ఉన్నతాధికారుల ఆర్థిక మూలాలను ఈడీ కూపీ లాగుతోంది. అక్రమ సంపాదనతో కూడబెట్టిన నిందితుల ఆస్తులను అటాచ్ చేసే ప్రక్రియ త్వరలోనే ప్రారంభం కానుందని సమాచారం.

శ్రీవారి భక్తుల్లో భరోసా – తప్పు చేసిన వారికి శిక్ష తప్పదు

పవిత్రమైన తిరుమల లడ్డూ ప్రసాదంపై నమ్మకంతో ఐదేళ్ల పాటు స్వామివారి ప్రసాదాన్ని భక్తితో స్వీకరించిన కోట్లాది మంది భక్తులకు ఈ దర్యాప్తు నివేదిక ద్వారా అసలు నిజాలు తెలిసొచ్చాయి. దైవద్రోహానికి పాల్పడిన నిందితులు ఎంతటి వారైనా చట్టం ముందు దోషులుగా నిలబడాల్సిందేనని, ఈడీ తీసుకుంటున్న చర్యలతో వెంకటేశ్వర స్వామి భక్తుల మనోభావాలకు సాంత్వన చేకూరుతుందని పరిశీలకులు భావిస్తున్నారు.