హైదరాబాద్ - విజయవాడ ప్రయాణం మరింత ఈజీ!

• ప్రయాణించిన దూరానికే టోల్ వసూలు.. ఓఆర్ఆర్ తరహాలో నయా ఆటోమేటిక్ టెక్నాలజీ అమలు!

• 'జీరో ఫెటాలిటీస్' లక్ష్యంతో రోడ్డు ప్రమాదాలకు చెక్.. ప్రతి 15-18 కి.మీ వద్దే ఎంట్రీ, ఎగ్జిట్ పాయింట్లు!

• గుజరాత్ చింతన్ శివిర్‌లో గడ్కరీతో మంత్రి కోమటిరెడ్డి భేటీ సఫలం.. కేంద్రం నుంచి వేగంగా అనుమతులు!

Andhrapradesh-Telanagana: తెలంగాణ మరియు ఆంధ్రప్రదేశ్ రాష్ట్రాల మధ్య ప్రధాన ఆర్థిక జీవనాడిగా ఉన్న హైదరాబాద్-విజయవాడ జాతీయ రహదారి (NH-65) సమూల మార్పులకు సిద్ధమైంది. హైదరాబాద్ సమీపంలోని ఆందోల్ మైసమ్మ ఆలయం నుంచి విజయవాడ మీదుగా మచిలీపట్నం వరకు మొత్తం 285 కిలోమీటర్ల రహదారిని 6 వరుసల హైస్పీడ్ యాక్సెస్ కంట్రోల్డ్ కారిడార్‌గా (అదనంగా రెండు సర్వీస్ రోడ్లతో కలిపి 6+2 లేన్లు) విస్తరించే ప్రతిపాదనకు పబ్లిక్-ప్రైవేట్-పార్ట్‌నర్‌షిప్ అప్రైజల్ కమిటీ (PPPAC) అధికారిక ఆమోదం తెలిపింది. ఈ మెగా ప్రాజెక్టును రూ. 12,073.99 కోట్ల అంచనా వ్యయంతో చేపట్టనున్నారు.

మూడు ప్యాకేజీలుగా నిర్మాణ పనులు

ఈ భారీ ప్రాజెక్టును వేగవంతంగా పూర్తి చేసేందుకు మొత్తం మూడు ప్రధాన ప్యాకేజీలుగా విభజించారు. మొదటి ప్యాకేజీ కింద హైదరాబాద్ నుంచి నందిగామ వరకు 181.30 కి.మీ పొడవైన మార్గాన్ని రూ. 6,792.52 కోట్లతో బిల్ట్-ఆపరేట్-ట్రాన్స్‌ఫర్ (BOT) పద్ధతిలో చేపట్టనున్నారు. రెండో ప్యాకేజీలో నందిగామ నుంచి విజయవాడ వరకు 45 కి.మీ రహదారిని రూ. 2,965.11 కోట్లతో బీవోటీ విధానంలోనే నిర్మిస్తారు. మూడో ప్యాకేజీలో విజయవాడ నుంచి మచిలీపట్నం పోర్టు వరకు 59.695 కి.మీ భాగాన్ని రూ. 806.77 కోట్లతో హైబ్రిడ్ యాన్యుటీ మోడ్ (HAM) పద్ధతిలో అభివృద్ధి చేయనున్నారు. భూసేకరణ, నిర్మాణంతో కలిపి సగటున కిలోమీటర్‌కు దాదాపు రూ. 38 కోట్లు ఖర్చు కానుంది.

మంత్రి కోమటిరెడ్డి చొరవ – కేంద్రం సానుకూలత

గుజరాత్‌లోని ఏక్తా నగర్‌లో ఇటీవల నిర్వహించిన 'చింతన్ శివిర్-2026' సదస్సులో తెలంగాణ ఆర్ అండ్ బీ శాఖ మంత్రి కోమటిరెడ్డి వెంకటరెడ్డి కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీతో ప్రత్యేకంగా సమావేశమయ్యారు. హైదరాబాద్-విజయవాడ మార్గంలో నిత్యం పెరుగుతున్న ట్రాఫిక్, వాహనాల రద్దీని ఆయన దృష్టికి తీసుకెళ్లగా గడ్కరీ వెంటనే స్పందించి విస్తరణకు పచ్చజెండా ఊపారు. కేంద్ర క్యాబినెట్ ఆమోదం పొందిన వెంటనే టెండర్లు పిలిచి, 2030 నాటికి పనులను పూర్తి చేయాలని లక్ష్యంగా పెట్టుకున్నారు.

అత్యున్నత భద్రతా ప్రమాణాలు – 6+2 లేన్ల నెట్‌వర్క్

ప్రయాణికుల భద్రతకు అత్యధిక ప్రాధాన్యమిస్తూ ప్రధాన ఆరు లేన్ల రహదారికి ఇరువైపులా క్రాష్ బారియర్లను అమర్చనున్నారు. స్థానిక గ్రామాలు, పట్టణాల ట్రాఫిక్ ప్రధాన క్యారేజ్‌వేపైకి రాకుండా నిరోధించేందుకు రెండు వైపులా ప్రత్యేక సర్వీస్ రోడ్లు నిర్మిస్తారు. స్థానిక వాహనాలు ప్రధాన రహదారిపైకి నేరుగా రాకుండా ప్రతి 15 నుంచి 18 కిలోమీటర్లకు మాత్రమే ప్రత్యేక ఎంట్రీ, ఎగ్జిట్ పాయింట్లను ఏర్పాటు చేస్తారు. మార్గమధ్యంలోని ప్రధాన మున్సిపాలిటీలు, పట్టణాల వద్ద బైపాస్‌లు నిర్మించి సిగ్నల్-ఫ్రీ ప్రయాణాన్ని సాధ్యం చేయనున్నారు.

కిలోమీటర్ ఆధారిత టోల్ – జీరో ఫెటాలిటీస్ లక్ష్యం

ఔటర్ రింగ్ రోడ్ (ORR) తరహాలోనే వాహనదారులు ఎంత దూరం ప్రయాణిస్తే అంత దూరానికి మాత్రమే ఆటోమేటిక్‌గా రుసుము కట్ అయ్యేలా అధునాతన ఆటోమేటిక్ నంబర్ ప్లేట్ రికగ్నిషన్ (ANPR) ఆధారిత సరికొత్త టోల్ విధానాన్ని అమల్లోకి తీసుకురానున్నారు. రెండు రాష్ట్రాల మధ్య నిత్యం లక్షలాది వాహనాలు రాకపోకలు సాగిస్తున్న ప్రస్తుత తరుణంలో 4 లేన్ల రోడ్డుపై తరచూ జరుగుతున్న ట్రాఫిక్ జామ్‌లు, ఘోర రోడ్డు ప్రమాదాలను నివారించి, 'జీరో ఫెటాలిటీస్' (Zero Fatalities) సాధించడమే ఈ ప్రాజెక్టు ముఖ్య ఉద్దేశం.

అవసరమైన భూసేకరణ – ప్రాంతీయ ప్రగతికి ఊతం

ఈ రోడ్డు విస్తరణ తెలంగాణలోని యాదాద్రి భువనగిరి, నల్లగొండ, సూర్యాపేట జిల్లాలతో పాటు ఏపీలోని ఎన్టీఆర్, కృష్ణా జిల్లాల మీదుగా సాగనుంది. ఈ మార్గంలో అత్యధిక భాగం భూమి ఇప్పటికే ఎన్‌హెచ్ఏఐ వద్ద అందుబాటులో ఉండగా, అదనంగా తెలంగాణ పరిధిలో 213.33 హెక్టార్లు, ఏపీలో కేవలం 6.50 హెక్టార్ల ప్రైవేట్ భూమిని మాత్రమే సేకరించాల్సి ఉంది. ఈ ఎక్స్‌ప్రెస్‌వే పూర్తిస్థాయిలో అందుబాటులోకి వస్తే రెండు రాష్ట్రాల మధ్య ప్రయాణ సమయం సగానికి తగ్గడమే కాకుండా, పారిశ్రామిక రవాణా, మచిలీపట్నం పోర్టు కనెక్టివిటీ శరవేగంగా అభివృద్ధి చెందనున్నాయి.