బనగానపల్లె నియోజకవర్గంలో వైఎస్సార్ కాంగ్రెస్ పార్టీకి గట్టి ఎదురుదెబ్బ తగిలింది. కొలిమిగుండ్ల మండలం ఎర్రగుడి గ్రామానికి చెందిన పలువురు కీలక నేతలు, కార్యకర్తలు వైసీపీని వీడి తెలుగుదేశం పార్టీలో చేరారు. బనగానపల్లెలోని టిడిపి కార్యాలయంలో జరిగిన ఈ కార్యక్రమంలో రాష్ట్ర మంత్రి బీసీ జనార్దన్ రెడ్డి స్వయంగా పాల్గొని, పార్టీలోకి వచ్చిన వారికి పసుపు కండువాలు కప్పి సాదరంగా ఆహ్వానించారు. నియోజకవర్గంలో మంత్రి చేస్తున్న అభివృద్ధి పనులకు ఆకర్షితులయ్యే తాము ఈ నిర్ణయం తీసుకున్నామని చేరిన నాయకులు ఈ సందర్భంగా వెల్లడించారు.
పార్టీలో చేరిన నాయకులను ఉద్దేశించి మంత్రి బీసీ జనార్దన్ రెడ్డి మాట్లాడుతూ.. కార్యకర్తలే పార్టీకి అసలైన బలం అని కొనియాడారు. గ్రామ స్థాయి నుంచి పార్టీ బలోపేతం కోసం ప్రతి ఒక్కరూ కష్టపడి పనిచేయాలని ఆయన సూచించారు. పాత, కొత్త అనే తేడా లేకుండా అందరూ సమన్వయంతో ముందుకు సాగాలని, అప్పుడే నియోజకవర్గాన్ని మరింత అభివృద్ధి చేసుకోగలమని పార్టీ కేడర్కు దిశానిర్దేశం చేశారు. కూటమి ప్రభుత్వం అధికారంలోకి వచ్చిన తర్వాత రాష్ట్రవ్యాప్తంగా అభివృద్ధి పరుగులు పెడుతోందని, దీనికి ప్రతి కార్యకర్త సహకారం అవసరమని ఆయన పేర్కొన్నారు.
వైసీపీని వీడి వచ్చిన నాయకులు మాట్లాడుతూ.. ప్రస్తుత పరిస్థితుల్లో ఆ పార్టీలో కొనసాగడం వృధా అని అభిప్రాయపడ్డారు. రాష్ట్రంలో వైఎస్సార్సీపీకి భవిష్యత్తు లేదని, ప్రజల సమస్యలను పట్టించుకోవడంలో ఆ పార్టీ పూర్తిగా విఫలమైందని మండిపడ్డారు. కేవలం విమర్శలకే పరిమితం కాకుండా, ప్రజలకు సేవ చేయాలనే ఉద్దేశంతోనే తాము తెలుగుదేశం పార్టీని ఎంచుకున్నామని చెప్పారు. కూటమి ప్రభుత్వం తీసుకుంటున్న ప్రజాహిత నిర్ణయాలు, ముఖ్యమంత్రి చంద్రబాబు నాయుడు విజన్ చూసి ప్రజల్లో నమ్మకం పెరిగిందని వారు వ్యాఖ్యానించారు.
మంత్రి బీసీ జనార్దన్ రెడ్డి నాయకత్వంపై ఎర్రగుడి గ్రామస్తులు పూర్తి విశ్వాసం వ్యక్తం చేశారు. మంత్రి ఆధ్వర్యంలో బనగానపల్లె నియోజకవర్గం రూపురేఖలు వేగంగా మారిపోతున్నాయని, గతంలో ఎన్నడూ లేని విధంగా ఇక్కడ అభివృద్ధి పనులు జరుగుతున్నాయని వారు ప్రశంసించారు. సామాన్య ప్రజలకు అందుబాటులో ఉంటూ సమస్యలను పరిష్కరించే వ్యక్తిగా మంత్రికి ఉన్న పేరు తమను ఎంతగానో ప్రభావితం చేసిందన్నారు. ఆయన అండతో గ్రామాన్ని కూడా అన్ని రంగాల్లో ముందుకు తీసుకెళ్తామని ధీమా వ్యక్తం చేశారు.
ఈ కార్యక్రమంలో నిమ్మకాయల రంగయ్య, వై శేఖర్, వై ప్రమోద్, వై లాజర్, ఎం బాబయ్య, తలారి రామ్మోహన్ వంటి ప్రముఖులతో పాటు పెద్ద సంఖ్యలో కార్యకర్తలు టిడిపి తీర్థం పుచ్చుకున్నారు. కార్యక్రమంలో స్థానిక టిడిపి నేతలు, మండల స్థాయి ప్రజాప్రతినిధులు కూడా పాల్గొని నూతనంగా చేరిన వారికి శుభాకాంక్షలు తెలిపారు. ఈ భారీ చేరికలతో కొలిమిగుండ్ల మండలంలో తెలుగుదేశం పార్టీకి మరింత ఊపు వచ్చినట్లయింది.
