టాలీవుడ్ నిర్మాత బన్నీ వాస్ ఇటీవల పైరసీ సమస్యపై కఠిన వ్యాఖ్యలు చేశారు. సినిమా పరిశ్రమలో ప్రస్తుతం చిన్న మరియు మధ్యతరహా నిర్మాతలు తీవ్రమైన నష్టాలను ఎదుర్కొంటున్న నేపథ్యలో ఆయన చేసిన వ్యాఖ్యలు పెద్ద చర్చకు దారి తీసాయి.
పైరసీ ఒక పెద్ద నేరం మాత్రమే కాకుండా, ఎన్నో కుటుంబాల జీవనాధారాన్ని దెబ్బతీసే ప్రమాదకర వ్యవస్థ అని బన్నీ వాస్ స్పష్టం చేశారు. కొందరు సోషల్ మీడియాలో లేదా ఇంటర్వ్యూలలో “పైరసీ వల్ల నా సినిమా హైప్ వచ్చింది, మాకు ఉపయోగం జరిగింది” అని చెప్పడం చాలా తప్పు అని ఆయన మండిపడ్డారు. అలాంటి మాటలు ఇతరులను కూడా పైరసీని సమర్థించేలా దారితీస్తాయని చెప్పారు.
బన్నీ వాస్ మాట్లాడుతూ టికెట్ ధరల పెంపు గురించి కూడా వివరణ ఇచ్చారు. సంవత్సరానికి కేవలం 10 నుంచి 15 పెద్ద సినిమాలకు మాత్రమే టికెట్ ధరలు పెంచుతున్నారని, ఆ నిర్ణయాలు కూడా థియేటర్ నిర్వహణ ఖర్చులు, GST, టెక్నికల్ విలువలు, మార్కెట్ డిమాండ్ వంటి అంశాలను అధ్యయనం చేసి తీసుకుంటున్నారని తెలిపారు. అయితే, ఎవరూ పెంచని మిగతా చిన్న సినిమాలే ఎక్కువగా పైరసీ బారిన పడుతున్నాయని ఆవేదన వ్యక్తం చేశారు.
ప్రేక్షకులకు పైరసీ ఒక చిన్న తప్పు అనిపించినా, అసలు విషాదం నిర్మాతల దగ్గరే మొదలవుతుందని ఆయన తెలిపారు. ఒక సినిమా వెనక వందలాది టెక్నీషియన్స్, కార్మికులు, లైన్ ప్రొడ్యూసర్స్, థియేటర్ వర్కర్స్ ఉన్నారన్నారు. సినిమా పైరసీకి గురైనప్పుడే అత్యధికంగా నష్టపోయేది చిన్న సినిమాలేనని, ఎందుకంటే అవి బడ్జెట్ రికవరీ కోసం పూర్తిగా బాక్సాఫీస్పైనా ఆధారపడతాయని అన్నారు.
“పైకి చూస్తే నిర్మాతలు పెద్దగా మాట్లాడరేమో కానీ లోపల వారు ఎదుర్కొంటున్న నష్టం వర్ణించలేనిది” అని బన్నీ వాస్ వేదన వ్యక్తం చేశారు. పైరసీని అరికట్టాలంటే ప్రభుత్వం, పోలీసు శాఖ, డిజిటల్ ప్లాట్ఫాంలు, థియేటర్లతో పాటు ప్రజలు కూడా అవగాహన కలిగి ఉండాలని ఆయన కోరారు. సినిమా ఒక వినోదం మాత్రమే కాదు వేలాది మందికి ఉపాధి అని, కష్టపడి తయారుచేసిన సినిమాను చౌకగా, పైరసీ రూపంలో చూడటం నిర్మాతల కృషిని అవమానపరచడమేనని బన్నీ వాస్ స్పష్టం చేశారు.
