అజర్‌బైజాన్–జార్జియా సరిహద్దు వద్ద భారీ విమాన ప్రమాదం సంభవించిన ఘటన అంతర్జాతీయ స్థాయిలో ఆందోళనకు గురిచేసింది. టర్కీకి చెందిన మిలిటరీ కార్గో విమానం సీ–130 కుప్పకూలి 20 మంది సైనికులు మృతి చెందారు. అజర్‌బైజాన్‌లోని ఒక ఎయిర్‌బేస్‌ నుంచి టర్కీకి బయల్దేరిన ఈ విమానం ప్రయాణం మధ్యలోనే నియంత్రణ కోల్పోయినట్లు సమాచారం. ప్రమాద స్థలంలో ప్రస్తుతం రక్షణ బృందాలు శోధన–రక్షణ కార్యాచరణ కొనసాగిస్తున్నాయి. ఈ ఘటనను టర్కీ రక్షణ మంత్రిత్వ శాఖ ధ్రువీకరించినట్లు అసోసియేటెడ్ ప్రెస్ వెల్లడించింది.
అజర్‌బైజాన్ స్థానిక మీడియా తెలిపిన వివరాల ప్రకారం, విమానం కుప్పకూలే ముందు గాల్లోనే గింగిరాలు తిరిగినట్లు ప్రత్యక్ష సాక్షులు పేర్కొన్నారు. విమానం రెండు వైపులా దట్టమైన పొగలు చిమ్ముతూ పర్వతాల మధ్య పడిపోయినట్లు తెలుస్తోంది. దీనికి సంబంధించిన వీడియోలు సామాజిక మాధ్యమాల్లో వైరల్ అవుతున్నాయి. ఇటీవలే రష్యా సైనిక హెలికాప్టర్ ప్రమాదంలో ఐదుగురు మృతి చెందిన ఘటన కూడా తాజా సంఘటనను మరింత భయాందోళనకు గురిచేస్తోంది.
ఈ ప్రమాదంపై టర్కీ రక్షణ శాఖ స్పందిస్తూ, ఘటనకు సంబంధించిన ఫోటోలు లేదా వీడియోలను మీడియా ప్రచారం చేయొద్దని కోరింది. టర్కీ అధ్యక్షుడు రెచెప్ తయ్యిప్ ఎర్డోగన్ మృతుల కుటుంబాలకు సానుభూతి తెలిపారు. మరణించిన సైనికులను ‘వీరులు’గా అభివర్ణిస్తూ ఘనంగా సంతాపం ప్రకటించారు. అజర్‌బైజాన్ అధ్యక్షుడు ఇల్హామ్ అలియేవ్ కూడా తీవ్ర విచారం వ్యక్తం చేస్తూ టర్కీకి మద్దతునిచ్చారు.
అదే సమయంలో, అజర్‌బైజాన్ విదేశాంగ మంత్రి హకాన్ ఫిదాన్, జార్జియా ఉన్నతాధికారులతో సంప్రదించి ప్రమాద పరిస్థితులపై సమాచారం సేకరించారు. ఈ ఘటన సిగ్ నాగీ ప్రాంతానికి ఐదు కిలోమీటర్ల దూరంలో, జార్జియా–అజర్‌బైజాన్ సరిహద్దులో జరిగినట్లు అధికారికంగా నిర్ధారించారు. విమానం అమెరికన్ కంపెనీ ‘లాక్‌హీడ్ మార్టిన్’ రూపొందించిన సీ–130 హెర్క్యులెస్ మోడల్ మిలిటరీ కార్గో ఎయిర్‌క్రాఫ్ట్ కావడం గమనార్హం.
ఈ విషాదకర ప్రమాదం ప్రాంతీయ భద్రతా వ్యవస్థపై ప్రశ్నార్థక చిహ్నాలు మిగిల్చింది. ఇటీవల వరుసగా సైనిక విమానాలు కుప్పకూలుతున్న నేపథ్యంలో భద్రతా ప్రమాణాలపై నిపుణులు ఆందోళన వ్యక్తం చేస్తున్నారు. ప్రమాదానికి గల కారణాలను తెలుసుకునేందుకు సంబంధిత దేశాలు సంయుక్త దర్యాప్తు చేపట్టే అవకాశం ఉంది. ఈ ఘటనలో ప్రాణాలు కోల్పోయిన సైనికులకు ప్రపంచవ్యాప్తంగా సానుభూతి వెల్లువ వ్యక్తమవుతోంది.
