పంజాబ్లోని సిర్హింద్ రైల్వే స్టేషన్ సమీపంలో గరీబ్ రథ్ ఎక్స్ప్రెస్లో శనివారం ఉదయం అగ్నిప్రమాదం సంభవించింది. అమృత్సర్ నుంచి సహర్సా వెళ్తున్న ఈ రైలు (Train No. 12204)లో అగ్ని చెలరేగడంతో ప్రయాణికులు ఒక్కసారిగా భయాందోళనకు గురయ్యారు. అయితే, సిబ్బంది అప్రమత్తతతో పెద్ద ప్రమాదం తప్పింది. మంటలు వ్యాపించేలోపే రైలును తక్షణమే నిలిపివేయడం వల్ల ప్రాణనష్టం ఏదీ జరగలేదు. ఈ ఘటన స్థానికంగా తీవ్ర కలకలం రేపింది.
వివరాల్లోకి వెళితే, రైలు అంబాలా సమీపంలోని సిర్హింద్ స్టేషన్కు చేరువలో ఉండగా, ఒక బోగీ నుంచి దట్టమైన పొగలు రావడం గమనించిన ప్రయాణికులు వెంటనే సిబ్బందికి సమాచారం ఇచ్చారు. లోకో పైలట్ అప్రమత్తమై రైలును వెంటనే ఆపాడు. మంటలు వేగంగా వ్యాపించే అవకాశం ఉండడంతో ప్రయాణికులు భయంతో రైలులోనుంచి కిందికి దిగి పరుగులు తీశారు. అక్కడున్న రైల్వే సిబ్బంది సహకారంతో అందరినీ సురక్షిత ప్రాంతాలకు తరలించారు.
సమాచారం అందుకున్న వెంటనే అగ్నిమాపక దళం సంఘటనా స్థలానికి చేరుకుని మంటలను అదుపులోకి తెచ్చింది. పోలీసు అధికారులు కూడా ఘటనా స్థలానికి చేరుకొని పరిస్థితిని సమీక్షించారు. సిర్హింద్ జీఆర్పీ ఎస్హెచ్ఓ రతన్ లాల్ తెలిపిన వివరాల ప్రకారం, ఈ ఘటనలో మూడు కోచ్లు పూర్తిగా దగ్ధమయ్యాయి. అయితే సిబ్బంది వేగవంతమైన చర్యల వల్ల ఎవరూ గాయపడలేదని, అందరూ సురక్షితంగా బయటపడ్డారని చెప్పారు. ప్రమాదానికి గల కారణాలను నిర్ధారించేందుకు అధికారులు దర్యాప్తు చేపట్టారు.
ఈ ఘటనతో ఆ మార్గంలో కొంతసేపు రైళ్ల రాకపోకలకు అంతరాయం ఏర్పడింది. రైల్వే అధికారులు వెంటనే ప్రత్యామ్నాయ ఏర్పాట్లు చేసి, ప్రయాణికులను ఇతర రైళ్ల ద్వారా గమ్యస్థానాలకు పంపించారు. అగ్నిప్రమాదానికి కారణం షార్ట్ సర్క్యూట్నా, లేక సాంకేతిక లోపమా అనే దానిపై స్పష్టత రానుంది. ఈ సంఘటన మరోసారి రైల్వే భద్రతా ప్రమాణాలపై ప్రశ్నలు లేవనెత్తింది. అయితే సిబ్బంది సమయోచిత నిర్ణయంతో పెద్ద విషాదం తప్పిందని అధికారులు తెలిపారు.
