ఓపెన్ ఏఐ సంస్థ ఇటీవల విడుదల చేసిన అట్లాస్ బ్రౌజర్ ఆర్టిఫిషియల్ ఇంటెలిజెన్స్ ఆధారంగా పనిచేసే కొత్త తరహా బ్రౌజర్. చాట్జీపీటీ టెక్నాలజీతో పనిచేసే ఈ బ్రౌజర్ వినియోగదారుల ఇంటర్నెట్ అనుభవాన్ని మరింత సులభతరం చేస్తుంది. సాధారణ బ్రౌజర్ల మాదిరిగా కాకుండా, యూజర్ అవసరాలను ముందుగానే అర్థం చేసుకుని సమర్థవంతమైన సమాచారాన్ని అందించడమే దీని ప్రధాన లక్ష్యం.
ఈ బ్రౌజర్లో ‘ఆస్క్ చాట్జీపీటీ’ అనే ఆప్షన్ ఉంటుంది. దీన్ని క్లిక్ చేసిన వెంటనే పక్కనే చాట్జీపీటీ సైడ్బార్ ఓపెన్ అవుతుంది. ఇందులో మీరు చూసే వెబ్పేజీలను సంక్షిప్త రూపంలో పొందవచ్చు, సందేహాలను చాట్జీపీటీని అడిగి నివృత్తి చేసుకోవచ్చు. అంతేకాకుండా ట్యాబ్ మారకుండా ఈ ప్రక్రియను చేయగలగడం దీని ప్రత్యేకత.
అట్లాస్ బ్రౌజర్లో బ్రౌజర్ మెమరీ ఫీచర్ కూడా అందుబాటులో ఉంది. ఇది యూజర్ గతంలో చూసిన వెబ్పేజీలను గుర్తుంచుకుంటుంది. తరువాత ఆ సమాచారాన్ని అవసరమైనప్పుడు తిరిగి చూపిస్తుంది. ఈ విధంగా చాట్జీపీటీ యూజర్ బ్రౌజింగ్ అలవాట్లను అర్థం చేసుకుని అనుకూల ఫలితాలను అందిస్తుంది.
ఏఐ ఆధారిత సెర్చ్ వ్యవస్థ ఈ బ్రౌజర్లో మరో విశేషం. యూజర్ ఇచ్చిన ప్రశ్నను ముందుగా అర్థం చేసుకుని నెట్టింట లోతుగా వెతికి సరైన, విశ్వసనీయమైన సమాచారాన్ని చూపిస్తుంది. అదేవిధంగా, ఇందులోని ఏజెంట్ మోడ్ యూజర్ తరఫున ఆన్లైన్ పనులను చిటికెలో పూర్తి చేస్తుంది. ఉదాహరణకు రెస్టారెంట్ బుకింగ్, ఈవెంట్ ప్లానింగ్ లేదా అపాయింట్మెంట్ బుక్ చేయడం వంటి పనులు సులభంగా చేసేస్తుంది.
ఇన్లైన్ టెక్స్ట్ ఎడిటింగ్ ఫీచర్ రాయడం లేదా ఎడిట్ చేయడం సులభతరం చేస్తుంది. యూజర్లు వాక్యాలను సెలక్ట్ చేసి చాట్జీపీటీ ఐకాన్ను క్లిక్ చేస్తే వాక్య నిర్మాణం మెరుగుపడుతుంది. ఈ ఫీచర్ రాతపని చేసే వారికి ఉపయోగకరంగా ఉంటుంది. మొత్తం మీద, ఓపెన్ ఏఐ అట్లాస్ బ్రౌజర్ ఇంటర్నెట్ అనుభవాన్ని కొత్త దిశగా తీసుకెళ్తూ భవిష్యత్తు బ్రౌజింగ్ విధానానికి మార్గదర్శకం అవుతోంది.
