దేశీయ విమానయాన రంగంలో అగ్రస్థానంలో ఉన్న ఇండిగో ఎయిర్లైన్స్ తమ కార్యకలాపాల నిర్వహణలో కీలక నిర్ణయం తీసుకుంది. దేశవ్యాప్తంగా పలు విమానాశ్రయాల్లో తమకు కేటాయించిన విమాన స్లాట్లలో మొత్తం 717 స్లాట్లను ఉపసంహరించుకుంది. ముఖ్యంగా ఢిల్లీ, ముంబై, చెన్నై, కోల్కతా, బెంగళూరు, హైదరాబాద్ వంటి ప్రధాన విమానాశ్రయాల నుంచి 364 స్లాట్లు వదులుకోవడం ప్రాధాన్యత సంతరించుకుంది. వీటిలో అత్యధిక సంఖ్యలో స్లాట్లు హైదరాబాద్, బెంగళూరు విమానాశ్రయాలకు చెందినవిగా సమాచారం.
విమానాశ్రయాల్లో విమానాలు టేకాఫ్ చేయడానికి లేదా ల్యాండింగ్కు కేటాయించే నిర్దిష్ట సమయాన్నే ‘స్లాట్’గా పిలుస్తారు. ఇండిగో సంస్థ జనవరి నుంచి మార్చి మధ్యకాలానికి చెందిన స్లాట్లను తిరిగి ఇచ్చినట్లు సంబంధిత వర్గాలు వెల్లడించాయి. ముఖ్యంగా మార్చి నెలలోనే అత్యధికంగా 361 స్లాట్లను ఖాళీ చేయడం గమనార్హం. ఇది ఇండిగో షెడ్యూలింగ్ వ్యవస్థలో వచ్చిన ఒత్తిడి, ఆపరేషనల్ సవాళ్లకు నిదర్శనంగా విమానయాన నిపుణులు అభిప్రాయపడుతున్నారు.
ఇదే సమయంలో గత డిసెంబరులో ఇండిగో సంస్థ భారీ సంఖ్యలో విమాన సర్వీసులను రద్దు చేయడం దేశవ్యాప్తంగా చర్చనీయాంశంగా మారింది. పలు విమానాలు ఆకస్మికంగా రద్దుకావడంతో ప్రయాణికులు తీవ్ర ఇబ్బందులు ఎదుర్కొన్నారు. విమానాల ఆలస్యం, రీషెడ్యూలింగ్, ప్రత్యామ్నాయ విమానాల లభ్యత లేకపోవడం వంటి సమస్యలు ప్రయాణికుల్లో అసంతృప్తిని పెంచాయి. ఈ పరిణామాలు ఇండిగో బ్రాండ్ ఇమేజ్పైనా ప్రభావం చూపినట్లు విశ్లేషకులు చెబుతున్నారు.
ఈ పరిస్థితులను తీవ్రంగా పరిగణించిన డైరెక్టరేట్ జనరల్ ఆఫ్ సివిల్ ఏవియేషన్ (DGCA), ఇండిగో వింటర్ షెడ్యూల్పై 10 శాతం కోత విధించింది. విమానయాన భద్రత, ప్రయాణికుల సౌకర్యం దృష్ట్యా ఈ నిర్ణయం తీసుకున్నట్లు డీజీసీఏ స్పష్టం చేసింది. ఈ నియంత్రణ చర్యల అనంతరం ఇండిగో తన కార్యకలాపాలను పునఃవ్యవస్థీకరించుకొని, సేవలను స్థిరపర్చే దిశగా అడుగులు వేస్తోందని సంబంధిత వర్గాలు వెల్లడించాయి. రాబోయే రోజుల్లో ఇండిగో తన ఆపరేషన్లను మరింత సమర్థవంతంగా నిర్వహించడంపై దృష్టి పెట్టనున్నట్లు సమాచారం.
