ఆంధ్రప్రదేశ్ ముఖ్యమంత్రి నారా చంద్రబాబు నాయుడు గిరిజనులకు కూటమి ప్రభుత్వం అండగా ఉంటుందని పునరుద్ఘాటించారు. ఏజెన్సీ ప్రాంతం దేవుడు సృష్టించిన అద్భుతమని అభివర్ణిస్తూ, ఎన్నికల ముందు ఇచ్చిన సూపర్ సిక్స్ హామీలను సూపర్ హిట్ చేశామని అన్నారు. సంపద సృష్టించి పేదలకు పంచడం తన లక్ష్యం అని పేర్కొంటూ, ఆర్థికంగా అభివృద్ధి చెందినవారు సమాజానికి తిరిగి ఇవ్వాలని సూచించారు. స్థానిక గిరిజనులకే ఉద్యోగాలు ఇచ్చేలా ఎన్టీఆర్ జీవో తీసుకొచ్చిన విషయాన్ని గుర్తుచేసి, ఈ జీవోను వైసీపీ, కాంగ్రెస్ నిలిపివేసినట్లు విమర్శించారు. జగన్ హయాంలో రాష్ట్రం విధ్వంసం పాలైందని, వైసీపీ పేదల సర్వనాశనానికే పుట్టిందని తీవ్రంగా విమర్శించారు.
గంజాయి సాగు నిర్మూలనపై అధికారులు తీసుకుంటున్న చర్యలను సీఎం ప్రశ్నించారు. డ్రోన్ల వినియోగంతో గంజాయి సాగును నివారించడంపై దృష్టి పెట్టాలని సూచిస్తూ, జీరో గంజా కల్టివేషన్, జీరో క్రైమ్ లక్ష్యాలతో పోలీసులు ప్రణాళికాబద్ధంగా పనిచేయాలని ఆదేశించారు. ఏజెన్సీ ప్రాంతంలో 10 వేల ఎకరాల్లో సెరీకల్చర్ సాగు జరుగుతోందని అధికారులు వివరించగా, సీఎం ఆ పట్టుదారాలతో తయారు చేసిన వస్త్రాలను పరిశీలించారు. నిఫ్ట్ వంటి సంస్థలతో భాగస్వామ్యం ద్వారా ఏజెన్సీ వస్త్రాలకు మంచి మార్కెట్ సాధ్యమని సూచించారు. అరకు కాఫీ స్టాల్ను సందర్శించి కాఫీ తాగి, స్థానిక ముడిసరుకులతో కూకీస్, మిల్లెట్ బిస్కట్లు, చాక్లెట్లు తయారీపై దృష్టి పెట్టాలని సూచించారు.
లగిశపల్లిలో జరిగిన అంతర్జాతీయ ఆదివాసీ దినోత్సవంలో పాల్గొన్న సీఎం, గిరిజన ప్రాంత అభివృద్ధికి సంబంధించిన పలు పథకాల శంకుస్థాపనలు, ప్రారంభోత్సవాలు చేశారు. హోమ్ స్టే ప్రాజెక్టుల స్థితి, జీసీసీ కొత్త ఉత్పత్తులు, డ్రగ్స్ నివారణ చర్యలపై సమీక్షించారు. కాఫీ తోటల రైతులతో మాట్లాడి, ఆర్గానిక్ ఉత్పత్తులకు ప్రోత్సాహం ఇచ్చేలా ఈ-కామర్స్ ద్వారా మార్కెటింగ్ కల్పించాలన్నారు. వనదేవత మోదకొండమ్మను దర్శించుకొని, కాఫీ తోటలు, నేసిన చీరలను పరిశీలించారు. గిరిజన ఉత్పత్తులకు లోగో ఆవిష్కరించి, అంతర్జాతీయ మార్కెటింగ్ సాధ్యానికి ప్రముఖ కంపెనీల భాగస్వామ్యం కల్పించేలా చర్యలు తీసుకోవాలని సూచించారు.
