పోలవరం ప్రాజెక్టు పనులు ప్రస్తుతం వేగంగా ముందుకు సాగుతున్నాయని విదేశీ నిపుణుల బృందం స్పష్టంగా తెలిపింది. గతంలో తాము చేసిన పర్యటనతో పోలిస్తే ఇప్పుడు ప్రాజెక్టులో గణనీయమైన పురోగతి కనిపిస్తోందని వారు ప్రశంసించారు. మూడు రోజుల పాటు పోలవరం ప్రాజెక్టు ప్రాంతాన్ని, నిర్మాణ పనులను క్షుణ్ణంగా పరిశీలించిన అనంతరం రాజమహేంద్రవరంలోని పోలవరం ప్రాజెక్టు అథారిటీ కార్యాలయంలో అధికారులతో సమావేశం నిర్వహించారు. ఈ సందర్భంగా ప్రాజెక్టు పనుల నాణ్యత, వేగం, భవిష్యత్తు కార్యాచరణపై విస్తృతంగా చర్చించారు.
విదేశీ నిపుణులు హైన్స్బెర్గర్, డేవిడ్ బి పాల్, ఫ్రాంకో డి సిస్కోలు ప్రాజెక్టులో గత మూడు నెలల్లో సాధించిన పురోగతిని ప్రత్యేకంగా అభినందించారు. గతంలో డయాఫ్రం వాల్ పనులు 2026 జూన్ వరకు పూర్తవుతాయని అంచనా వేసినప్పటికీ, ప్రస్తుతం పరిస్థితులు మారాయని, ఫిబ్రవరి నాటికే ఈ కీలక పనులు పూర్తయ్యే అవకాశం ఉందని వెల్లడించారు. ఇది ప్రాజెక్టు అమలులో సానుకూల పరిణామమని వారు అభిప్రాయపడ్డారు.
పోలవరం ప్రధాన డ్యాంలో ఉపయోగిస్తున్న ఇసుక, రాయి, క్లే వంటి నిర్మాణ సామగ్రి నాణ్యత ప్రమాణాలకు అనుగుణంగా ఉందని నిపుణులు తెలిపారు. గ్యాప్–1 ప్రధాన డ్యాం నిర్మాణానికి అవసరమైన ఆకృతులకు ఇప్పటికే ఆమోదం లభించిందని, గ్యాప్–2 డ్యాంకు సంబంధించి ఇసుక రీచ్లో 23 అడుగుల లోతు వరకు ఆకృతులకు కూడా అనుమతులు ఇచ్చినట్లు పేర్కొన్నారు. ఈ పనులు పూర్తయ్యేందుకు ఇంకా కొన్ని నెలలు సమయం పట్టే అవకాశం ఉందన్నారు.
గ్యాప్–2 ప్రధాన డ్యాం బంకమన్న రీచ్కు సంబంధించిన ఆకృతులపై గత మూడు రోజులుగా సవివరమైన చర్చలు జరిగాయని అధికారులు తెలిపారు. క్లే రీచ్ ఎత్తు, నిర్మాణ విధానాలు, పాటించాల్సిన సాంకేతిక సూత్రాలపై విదేశీ నిపుణులు మౌఖికంగా సమ్మతి తెలిపారు. ఈ అంశాలపై తమ లిఖితపూర్వక అభిప్రాయాలను వారం రోజుల్లో అందిస్తామని, అవసరమైన డ్రాయింగ్లను కూడా త్వరగా పూర్తి చేస్తామని వారు హామీ ఇచ్చారు.
నాణ్యత నియంత్రణ, నాణ్యత మదింపు పరీక్షలు చాలా పద్ధతిగా జరుగుతున్నాయని నిపుణులు ప్రశంసించారు. అయితే ఈ పరీక్షల ఫలితాలను మరింత పక్కాగా డాక్యుమెంటేషన్ చేయాలని సూచించారు. గ్రౌటింగ్, క్లే కోర్ వంటి కీలక పనుల విషయంలో మరిన్ని పరీక్షలు చేపట్టాలని, అవసరమైతే అదనపు హోల్స్ వేసి లోతైన అధ్యయనం చేయడం మంచిదని సూచించారు.
పోలవరం ప్రాజెక్టు పూర్తి లక్ష్యాన్ని గతంలో నిర్ణయించిన 2027 డిసెంబరు నుంచి 2027 జూన్కు ముందుకు తెచ్చినట్లు విదేశీ నిపుణులు వెల్లడించారు. ఈ కాలవ్యవధిలో ప్రాజెక్టును పూర్తి చేసే సామర్థ్యం ఉన్నదని వారు నమ్మకం వ్యక్తం చేశారు. భూకంపాలను తట్టుకునేలా డ్యాం ఆకృతులపై కూడా అధ్యయనం కొనసాగుతుందని, ఈ విషయంపై వారం రోజుల్లో తమ అభిప్రాయాన్ని వెల్లడిస్తామని తెలిపారు.
