LPG Gas Cylinder: దేశంలో ప్రస్తుతం నెలకొన్న వంట గ్యాస్ కొరతను దృష్టిలో పెట్టుకుని కేంద్ర ప్రభుత్వం వలస కార్మికుల కోసం ఒక మంచి నిర్ణయం తీసుకుంది. ముఖ్యంగా వేరే ఊర్ల నుండి వచ్చి ఇక్కడ పనులు చేసుకునే వారు, చదువుకునే విద్యార్థులు గ్యాస్ సిలిండర్ దొరక్క చాలా ఇబ్బందులు పడుతున్నారు. ఇరాన్ యుద్ధం కారణంగా గ్యాస్ నౌకలు సముద్రంలో చిక్కుకుపోవడంతో మన దేశానికి వచ్చే ఎల్పీజీ సరఫరా తగ్గింది. ఈ కష్టకాలంలో పేద ప్రజలకు వంట గ్యాస్ అందుబాటులో ఉండాలనే ఉద్దేశంతో, వారికి ఇచ్చే 5 కేజీల చిన్న సిలిండర్ల కోటాను ప్రభుత్వం ఇప్పుడు రెండు రెట్లు పెంచింది.
గతంలో గ్యాస్ కనెక్షన్ తీసుకోవాలంటే లోకల్ అడ్రస్ ప్రూఫ్ ఉండాలని నిబంధన ఉండేది, కానీ వలస కూలీలకు అది పెద్ద సమస్యగా మారింది. దీన్ని గమనించిన ప్రభుత్వం ఇప్పుడు నిబంధనలను చాలా సులభం చేసింది. ఇకపై మీ దగ్గర స్థానిక అడ్రస్ ప్రూఫ్ లేకపోయినా పర్వాలేదు, కేవలం ఆధార్ కార్డు ఒక సెల్ఫ్ డిక్లరేషన్ పేపర్ ఇస్తే వెంటనే గ్యాస్ కనెక్షన్ ఇచ్చేలా ఏర్పాట్లు చేశారు. దీనివల్ల వేల మైళ్ల దూరం నుండి పనుల కోసం వచ్చిన వారికి ఎంతో మేలు జరుగుతుంది.
పెద్ద సిలిండర్లు కొనడం సామాన్యులకు ఆర్థికంగా భారం అవుతుందని, ఈ 5 కేజీల మినీ సిలిండర్లను ప్రభుత్వం ప్రోత్సహిస్తోంది. ఈ చిన్న సిలిండర్ల రీఫిల్లింగ్ ధర తక్కువగా ఉండటమే కాకుండా, ఇవి ఎప్పుడూ అందుబాటులో ఉండేలా చర్యలు తీసుకుంటున్నారు. కొత్త రూల్స్ వచ్చిన మొదటి రోజే దేశం మొత్తం మీద దాదాపు 90 వేల సిలిండర్లు అమ్ముడయ్యాయంటే, వీటికి ఎంత డిమాండ్ ఉందో మనం అర్థం చేసుకోవచ్చు. మార్చి చివరి వారం నుండి ఇప్పటివరకు సుమారు 6.6 లక్షల సిలిండర్లను కార్మికులకు అందజేశారు.
మరోవైపు గ్యాస్ కొరతను సాకుగా చూపి ఎవరైనా బ్లాక్ మార్కెట్ చేస్తే ఊరుకోమని ప్రభుత్వం హెచ్చరించింది. గ్యాస్ ఏజెన్సీలు ఎట్టి పరిస్థితుల్లోనూ సరఫరాను ఆపకూడదని, అవసరమైతే రాష్ట్రాలకు ఇచ్చే కోటాను మరో 20 శాతం పెంచుతామని కేంద్రం తెలిపింది. ఆసుపత్రులు, హాస్టళ్లు మరియు పాలు పంపిణీ చేసే డైరీ రంగానికి గ్యాస్ ఇచ్చే విషయంలో మొదటి ప్రాధాన్యత ఇవ్వాలని ఆయిల్ కంపెనీలకు స్పష్టమైన ఆదేశాలు వెళ్లాయి. దీనివల్ల అత్యవసర సేవలకు ఎటువంటి ఆటంకం కలగకుండా ఉంటుంది.
ప్రభుత్వ చమురు సంస్థలైన ఐఓసీఎల్, బీపీసీఎల్ హెచ్పీసీఎల్ తమ గ్యాస్ ఏజెన్సీల ద్వారా ఈ చిన్న సిలిండర్లను సామాన్యులకు చేరువ చేస్తున్నాయి. యుద్ధం కారణంగా ఏర్పడిన ఈ ఇంధన సంక్షోభం నుండి ప్రజలను కాపాడటానికి ప్రభుత్వం చేస్తున్న ఈ ప్రయత్నం మంచి ఫలితాలను ఇస్తోంది. రాబోయే రోజుల్లో గ్యాస్ సరఫరా మళ్ళీ సాధారణ స్థితికి వస్తుందని, అప్పటివరకు ఈ 5 కేజీల సిలిండర్లు వలస కార్మికుల వంట గ్యాస్ కష్టాలను తీరుస్తాయని అధికారులు ఆశాభావం వ్యక్తం చేస్తున్నారు.
