ఆంధ్రప్రదేశ్ ప్రభుత్వం వరి రైతులకు శుభవార్తను అందించింది. ధాన్యం కొనుగోలు ప్రక్రియను సంక్రాంతి వరకు కొనసాగించనున్నట్లు పౌర సరఫరాల శాఖ మంత్రి నాదెండ్ల మనోహర్ ప్రకటించారు. ప్రస్తుతం ధాన్యం కొనుగోళ్లపై జరిగిన సమీక్షలో ఆయన ఈ నిర్ణయాన్ని వెల్లడించారు. ఈ సీజన్లో రైతుల నుంచి ఇప్పటివరకు 11 లక్షల మెట్రిక్ టన్నుల ధాన్యాన్ని ప్రభుత్వం కొనుగోలు చేసింది.
ఇప్పటికే రైతుల బ్యాంక్ ఖాతాల్లో ₹2,300 కోట్లు జమ చేసినట్లు మంత్రి వివరించారు. ధాన్యం అమ్మిన రైతులకు 24 గంటల్లోపే డబ్బులు జమ చేసే విధానం అమల్లో ఉందని చెప్పారు. టెక్నికల్ సమస్యల వల్ల కొన్నిచోట్ల కొనుగోళ్లు ఆలస్యమైనా వాటిని త్వరగా పరిష్కరిస్తున్నామని మంత్రి స్పష్టం చేశారు. రైతులు ధాన్యం విక్రయించిన తర్వాత ఖాతాల్లో డబ్బులు జమ అయ్యాయా లేదూ తప్పనిసరిగా చెక్ చేసుకోవాలని సూచించారు.
ఖరీఫ్ సీజన్లో పండిన ఒక్కో ధాన్యం గింజను కూడా ప్రభుత్వం కొనుగోలు చేస్తామని మంత్రి హామీ ఇచ్చారు. ఈ సారి రాష్ట్రంలో మొత్తం 51 లక్షల మెట్రిక్ టన్నుల ధాన్యం కొనుగోలును లక్ష్యంగా పెట్టుకున్నామని పేర్కొన్నారు. బాపట్ల జిల్లా నడింపల్లిలోని కొనుగోలు కేంద్రాన్ని స్వయంగా సందర్శించి అక్కడి పరిస్థితులను సమీక్షించారు.
ధాన్యం కొనుగోళ్లు సజావుగా సాగేందుకు రాష్ట్రవ్యాప్తంగా 3500 రైతు సహాయ కేంద్రాలు (PPCలు) ఏర్పాటు చేశారు. రైతులకు సహాయం చేయడానికి 16,500 మంది సిబ్బందిని, ధాన్యం రవాణా కోసం 32,000 వాహనాలను, అలాగే ధాన్యం నిల్వ చేయడానికి 1706 రైస్ మిల్లులను ప్రభుత్వం సిద్ధంగా ఉంచింది. రైతులు తమ సొంత వాహనాల్లో ధాన్యం తీసుకువస్తే వచ్చే రవాణా ఖర్చును కూడా వారి బ్యాంక్ ఖాతాల్లో జమ చేస్తున్నామని ప్రభుత్వం తెలిపింది.
ప్రధానంగా, రైతులు ధాన్యం విక్రయం కోసం వాట్సాప్ సిస్టమ్ ద్వారా సులభంగా వివరాలను పంపే విధానాన్ని ప్రభుత్వం అమలు చేస్తోంది. ‘హాయ్’ అని మెసేజ్ పంపితేనే రైతులు ధాన్యం అమ్మకపు రిజిస్ట్రేషన్ చేసుకోవచ్చు. ఈ చర్యలన్నీ రైతులకు మరింత సౌలభ్యం కల్పించడం, కొనుగోలు ప్రక్రియను పారదర్శకంగా నిర్వహించడమే లక్ష్యంగా ప్రభుత్వం చేపట్టినవి.
