రిలయన్స్ ఇండస్ట్రీస్ లిమిటెడ్ మరోసారి టెక్నాలజీ రంగంలో సంచలన నిర్ణయం తీసుకుంది. దాని అనుబంధ సంస్థ రిలయన్స్ ఇంటెలిజెన్స్ లిమిటెడ్ ద్వారా గ్లోబల్ టెక్ దిగ్గజం గూగుల్తో భాగస్వామ్యం కుదుర్చుకుంది. ఈ ఒప్పందం ప్రకారం, 18 నుంచి 25 సంవత్సరాల వయస్సు గల జియో వినియోగదారులు ఇప్పుడు గూగుల్ యొక్క ఆధునిక జెమిని ప్రో AI సేవలను 18 నెలలపాటు ఉచితంగా పొందగలరు. రూ.35,000 విలువైన ఈ సబ్స్క్రిప్షన్ పూర్తిగా ఉచితంగా అందించబడుతుంది. ఇండియాలో AI వినియోగాన్ని వేగవంతం చేయాలనే లక్ష్యంతో ఈ ప్రత్యేక ఆఫర్ను అక్టోబర్ 30 నుంచి ప్రారంభించనున్నట్లు కంపెనీ ప్రకటించింది.
ఈ ఆఫర్ అర్హత గల జియో అన్లిమిటెడ్ 5G ప్లాన్ వినియోగదారులకు మాత్రమే అందుబాటులో ఉంటుంది. ముఖ్యంగా, 25 సంవత్సరాల లోపు వయస్సు ఉన్న యువ వినియోగదారులు ఈ ప్రత్యేక అవకాశాన్ని పొందగలరు. అదనపు చార్జీలు లేకుండా అందించే ఈ సేవలో గూగుల్ జెమిని ప్రోతో పాటు పలు ఆధునిక AI టూల్స్, క్లౌడ్ స్టోరేజ్ సదుపాయాలు ఉంటాయి. డిజిటల్ ఇండియాలో యువతకు AI సామర్థ్యాన్ని చేరువ చేయాలనే ఉద్దేశంతో రిలయన్స్ ఈ భాగస్వామ్యాన్ని రూపొందించింది.
రిలయన్స్ ఇండస్ట్రీస్ చైర్మన్ ముఖేష్ అంబానీ ఈ భాగస్వామ్యంపై మాట్లాడుతూ, “భారతదేశంలోని 1.45 బిలియన్ల ప్రజలకు ఇంటెలిజెన్స్ సేవలను అందుబాటులోకి తీసుకురావడమే మా లక్ష్యం” అని స్పష్టం చేశారు. ఆయన మాట్లాడుతూ, గూగుల్ వంటి దీర్ఘకాలిక వ్యూహాత్మక భాగస్వాములతో కలిసి భారతదేశాన్ని “AI ఆధారిత” దేశంగా కాకుండా “AI సాధికారత కలిగిన దేశంగా” మార్చడమే తమ ప్రధాన ఆశయమని తెలిపారు. అంటే ప్రతి భారతీయుడు తెలివైన సాధనాలను ఉపయోగించి సృష్టించగలగడం, ఆవిష్కరించగలగడం, అభివృద్ధి చెందగలగడం అనేది రిలయన్స్ విజన్ అని అంబానీ చెప్పారు.
గూగుల్ జెమిని ప్రోలో అపరిమిత చాట్లు, 2TB క్లౌడ్ స్టోరేజ్, Veo 3.1 ద్వారా వీడియో జనరేషన్, నానో బనానా టూల్తో ఇమేజ్ జనరేషన్, అనేక అధునాతన AI సాధనాలు ఉంటాయి. ఈ టూల్స్ ద్వారా విద్యార్థులు, యువ సృష్టికర్తలు, డెవలపర్లు తమ ప్రతిభను మరింతగా ప్రదర్శించేందుకు అవకాశం కలుగుతుంది. ఈ ప్రాజెక్ట్ ద్వారా భారతదేశం AI విప్లవంలో ముందంజలో నిలవనుందనే అంచనా వ్యక్తమవుతోంది. డిజిటల్ ఇండియా దిశగా ఇది మరో కీలక అడుగు అని నిపుణులు అభిప్రాయపడుతున్నారు.
