ప్రముఖ మెసేజింగ్ యాప్ వాట్సాప్ తన యూజర్లకు మరింత సురక్షితమైన, ప్రశాంతమైన అనుభవం కల్పించేందుకు మరో కొత్త ఫీచర్‌ను తీసుకువస్తోంది. రోజురోజుకు పెరుగుతున్న స్పామ్ మెసేజ్‌లు, అనవసర ప్రమోషనల్ సందేశాలను అరికట్టడమే ఈ ఫీచర్ లక్ష్యం. కొత్త అప్‌డేట్ ప్రకారం, యూజర్లు తమ కాంటాక్ట్ లిస్టులో లేని వ్యక్తులకు పంపే మెసేజ్‌లపై నెలవారీ పరిమితి (లిమిట్) విధించబడనుంది. ప్రస్తుతం ఈ ఫీచర్ టెస్టింగ్ దశలో ఉంది.
కొత్త ఫీచర్ ప్రకారం, ఎవరైనా తమకు తెలియని వ్యక్తికి వరుసగా మూడు మెసేజ్‌లు పంపినా వారు స్పందించకపోతే, పంపినవారి నెలవారీ మెసేజ్ లిమిట్ నుంచి మూడు మెసేజ్‌లు ఆటోమేటిక్‌గా తగ్గిపోతాయి. అంటే, అనవసరంగా తెలియని నంబర్లకు మెసేజ్‌లు పంపడం కష్టమవుతుంది. ఇది ప్రధానంగా స్పామ్ అకౌంట్లను, అవాంఛిత ప్రమోషనల్ మెసేజ్‌లను నియంత్రించడానికే ఉద్దేశించబడింది. ఈ కొత్త ఫీచర్ యూజర్ల ఇన్‌బాక్స్‌ను క్లీన్‌గా ఉంచడం, వ్యక్తిగత సంభాషణలను ప్రోత్సహించడం లక్ష్యంగా తీసుకొచ్చింది.
వాట్సాప్ యాప్ ఇప్పుడు కేవలం చాటింగ్ యాప్‌గానే కాకుండా బిజినెస్ అకౌంట్లు, కస్టమర్ సపోర్ట్, కమ్యూనిటీలు వంటి విభిన్న రంగాల్లో విస్తరించింది. కానీ ఈ విస్తరణతో పాటు స్పామ్ మెసేజ్‌ల సంఖ్య కూడా గణనీయంగా పెరిగింది. అనేక వ్యాపార సంస్థలు ప్రమోషన్ల పేరుతో యూజర్లకు నిరంతరం మెసేజ్‌లు పంపుతున్నాయి. ఈ సమస్యను తగ్గించేందుకు వాట్సాప్ కొత్త పరిమితిని ప్రవేశపెడుతోంది. టెక్‌క్రంచ్ నివేదిక ప్రకారం, ఈ ఫీచర్ ద్వారా ప్రతి యూజర్‌కి ఒక నిర్దిష్ట లిమిట్ ఉంటుంది. ఎవరైనా ఆ లిమిట్‌కు చేరువవుతున్నప్పుడు వారిని ముందుగానే హెచ్చరించబడుతుంది. పరిమితి దాటిన తర్వాత కొత్త కాంటాక్ట్‌లకు మెసేజ్‌లు పంపకుండా తాత్కాలికంగా నిలిపివేయబడే అవకాశం కూడా ఉంది.
అయితే ఈ లిమిట్ ఫ్రెండ్స్, ఫ్యామిలీ వంటి వ్యక్తిగత చాట్స్‌పై ఎలాంటి ప్రభావం చూపదని వాట్సాప్ స్పష్టం చేసింది. ఈ ఫీచర్ ప్రధానంగా తెలియని నంబర్ల నుంచి వచ్చే అవాంఛిత సందేశాలపై మాత్రమే వర్తిస్తుంది. భారతదేశం వంటి దేశాల్లో 500 మిలియన్లకుపైగా యూజర్లను కలిగి ఉన్న వాట్సాప్‌కు స్పామ్ నియంత్రణ పెద్ద సవాలుగా మారింది. ఈ నేపథ్యంలో కొత్త ఫీచర్ ద్వారా ఆ సమస్యను గణనీయంగా తగ్గించే ప్రయత్నం చేస్తోంది. వ్యాపారాల పరంగా చూస్తే, ఇది కస్టమర్లతో నిజమైన సంబంధాలను ఏర్పరచుకోవడంపై దృష్టి పెట్టాల్సిన అవసరాన్ని సూచిస్తోంది. స్పామ్ మెసేజ్‌లను పూర్తిగా నిర్మూలించకపోయినా, ఈ ఫీచర్ వాట్సాప్‌ను మళ్లీ వ్యక్తిగత సంభాషణల వేదికగా మార్చడంలో కీలక అడుగుగా భావించవచ్చు.
