దేశవ్యాప్తంగా లక్షలాది మంది యువత ఆశగా ఎదురుచూస్తున్న ఎస్సెస్సీ కంబైన్డ్ హయ్యర్ సెకండరీ లెవల్ (CHSL) 2025 టైర్-1 పరీక్షలకు సంబంధించి స్టాఫ్ సెలెక్షన్ కమిషన్ (SSC) పెద్ద మార్పు తీసుకొచ్చింది. ఈసారి అభ్యర్థుల సౌకర్యార్థం కమిషన్ కొత్త విధానాన్ని ప్రవేశపెట్టింది. ఇప్పటివరకు పరీక్ష తేదీ, నగరం, షిఫ్ట్‌ను ఎస్సెస్సీనే నిర్ణయించేది. కానీ ఈసారి “సెల్ఫ్ స్లాట్ సెలెక్షన్” అనే కొత్త ఫీచర్ ద్వారా అభ్యర్థులకే తమ పరీక్ష తేదీ, నగరం, షిఫ్ట్ ఎంచుకునే అవకాశం ఇవ్వబడింది.
ఈ ఫీచర్ ద్వారా అభ్యర్థులు ఎస్‌ఎస్‌సీ అధికారిక వెబ్‌సైట్‌లో లాగిన్ అయ్యి, దరఖాస్తు సమయంలో ఇచ్చిన మూడు ఎంపికల నగరాలలో తమకు అనుకూలమైన నగరం, పరీక్ష తేదీ, షిఫ్ట్‌ను ఎంచుకోవచ్చు. ఈ సదుపాయం అక్టోబర్ 22 నుంచి 28 వరకు అందుబాటులో ఉంటుంది. అంటే, ప్రతి అభ్యర్థి తనకు సౌకర్యమైన రోజు, సమయం, ప్రదేశంలో పరీక్ష రాసే అవకాశాన్ని పొందుతాడు. ఈ చర్య అభ్యర్థులకు ప్రయాణం, వసతి వంటి సమస్యలను తగ్గించి, పరీక్షను మరింత సులభంగా రాయడానికి ఉపయోగపడనుంది.
ఎస్సెస్సీ తెలిపిన వివరాల ప్రకారం, CHSL 2025 టైర్-1 ఆన్‌లైన్ పరీక్షలు నవంబర్ 12 నుంచి దేశవ్యాప్తంగా అనేక కేంద్రాలలో ప్రారంభం కానున్నాయి. పరీక్షలకు 10 రోజుల ముందు సిటీ ఇంటిమేషన్ స్లిప్‌లు అందుబాటులోకి వస్తాయి. పరీక్షకు నాలుగు రోజుల ముందు అడ్మిట్ కార్డులు డౌన్‌లోడ్ చేసుకోవచ్చని కమిషన్ ప్రకటించింది. ఇది మొదటిసారి అభ్యర్థులకు ఇంత విస్తృతమైన స్వేచ్ఛను ఇస్తున్నట్లు అధికారులు తెలిపారు. ఈ విధానం పారదర్శకతను పెంచడమే కాకుండా, పరీక్షా నిర్వహణలో ఉన్న ఒత్తిడిని కూడా తగ్గిస్తుందని ఎస్సెస్సీ పేర్కొంది.
ఈ పరీక్షల ద్వారా కేంద్ర ప్రభుత్వంలోని పలు మంత్రిత్వ శాఖలు, కార్యాలయాలు, సంస్థల్లో లోయర్ డివిజనల్ క్లర్క్, జూనియర్ సెక్రటేరియట్ అసిస్టెంట్, డేటా ఎంట్రీ ఆపరేటర్ పోస్టులను భర్తీ చేయనున్నారు. మొత్తం 3,131 పోస్టులు భర్తీ చేయడానికి ఈ నోటిఫికేషన్ జారీ చేశారు. ఇంటర్మీడియట్‌ (10+2) అర్హత ఉన్న అభ్యర్థులు ఈ పోస్టులకు అర్హులు. పరీక్షలో మంచి స్కోర్ సాధిస్తే, కేంద్ర ప్రభుత్వ ఉద్యోగావకాశం దక్కే అవకాశం ఉంటుంది. సెల్ఫ్ స్లాట్ ఎంపికతో అభ్యర్థులకు కలిగే ఈ కొత్త సౌకర్యం పరీక్షా ప్రక్రియలో సరికొత్త మార్పుగా నిలిచేలా కనిపిస్తోంది.
