ఆంధ్రప్రదేశ్ ప్రభుత్వం అనాథ పిల్లలకు అండగా నిలుస్తూ మిషన్ వాత్సల్య పథకాన్ని అమలు చేస్తోంది. తల్లిదండ్రులు లేని పిల్లల చదువు, పోషణ కోసం ఆర్థిక సహాయం అందించడమే ఈ పథకం ప్రధాన ఉద్దేశ్యం. ఇప్పటికే రెండు విడతల్లో డబ్బులు పంపిణీ చేయగా, ఇప్పుడు మూడో విడత కోసం రాష్ట్రవ్యాప్తంగా దరఖాస్తులు స్వీకరిస్తున్నారు. అర్హులైన పిల్లలకు నెలకు రూ.4 వేల చొప్పున వారి బ్యాంక్ ఖాతాల్లో నేరుగా జమ చేయబడుతుంది.
ఈ పథకానికి 2025 మార్చి 31 నాటికి 18 ఏళ్లలోపు వయసున్న అనాథ పిల్లలు అర్హులు. దీర్ఘకాలిక వ్యాధులతో బాధపడుతున్న దంపతుల పిల్లలు, బాలల న్యాయ చట్టం 2015 ప్రకారం నిరాదరణకు గురైనవారు కూడా ఈ పథకంలో చేర్చబడతారు. అర్హుల ఎంపికలో ప్రభుత్వ పాఠశాలలు, కాలేజీల్లో చదువుతున్న పిల్లలకు ప్రాధాన్యం ఇవ్వనున్నారు.
దరఖాస్తు చేసుకోవడానికి పిల్లల జనన, ఆదాయ, కుల ధ్రువీకరణ పత్రాలతో పాటు, ఆధార్‌, రేషన్ కార్డు కాపీలు, బ్యాంక్ పాస్‌బుక్, తల్లిదండ్రులు లేదా సంరక్షకుల వివరాలు సమర్పించాలి. ఈ పత్రాలపై గెజిటెడ్ అధికారి సంతకం తప్పనిసరి. దరఖాస్తులు ఐసీడీఎస్ ప్రాజెక్టుల వారీగా అంగన్‌వాడీ కార్యకర్తలు, సీడీపీవోలు, పర్యవేక్షకుల ద్వారా స్వీకరించబడతాయి.
ఈ పథకానికి కుటుంబ ఆదాయం పరిమితిని కూడా ప్రభుత్వం నిర్ణయించింది. గ్రామీణ ప్రాంతాల్లో వార్షిక ఆదాయం రూ.72 వేల లోపు, పట్టణాల్లో రూ.96 వేల లోపు ఉన్న కుటుంబాల పిల్లలు మాత్రమే అర్హులు. మొత్తం నిధుల్లో 60% కేంద్రం, 40% రాష్ట్రం భరిస్తుంది. ఎంపికైన వారికి ప్రతి నెలా నిరంతరాయంగా రూ.4 వేల ఆర్థిక సాయం అందించబడుతుంది.
