వంటకాల్లో తరచూ ఉపయోగించే సొరకాయ ఇప్పుడు స్కిన్ కేర్ లో కొత్త ప్రయోగాలకు దారి తీస్తుంది. నీరు, విటమిన్లు, యాంటీ ఆక్సిడెంట్లు సమృద్ధిగా ఉండే సొరకాయ చర్మాన్ని సహజంగా హైడ్రేట్ చేయడంలో తోడ్పడుతుందని నిపుణులు చెబుతున్నారు. ముఖ్యంగా శీతాకాలంలో చర్మం పొడిబారే వారికి ఇది సహజ సహాయక పదార్థంగా ఉపయోగపడే అవకాశముందని సూచిస్తున్నారు.
సొరకాయలో ఉన్న నీటి శాతం 95% వరకు ఉంటుంది. ఈ కారణంగా శరీరానికి, చర్మానికి సహజ హైడ్రేషన్ అందుతుంది. చర్మంలో తేమ తగ్గిపోవడం వల్ల వచ్చే ముడతలు, మచ్చలు, రఫ్నెస్ తగ్గించడంలో ఇది సహాయపడవచ్చని న్యూట్రిషన్ నిపుణులు అంటున్నారు. అలాగే సొరకాయలోని విటమిన్ C మరియు మెటల్ ట్రేస్ ఎలిమెంట్ జింక్ కొల్లాజెన్ ఉత్పత్తిని పెంచుతాయని వారు వివరించారు. కొల్లాజెన్ పెరగడం వల్ల చర్మం మెరుగ్గా ఉండి, చిన్న ముడతలు తగ్గే అవకాశముందని అధ్యయనాల్లో కూడా తేలినది.
సొరకాయ వినియోగం ఎలా ఉండాలి?
డైటీషన్లు సూచిస్తున్న ప్రకారం అప్పుడే చేసిన సొరకాయ రసం వారంలో రెండు లేదా మూడు సార్లు తీసుకుంటే శరీరాన్ని డీటాక్స్ చేయడంలో సహాయపడవచ్చు. స్మూతీగా లేదా నిమ్మరసం, పుదీనా కలిపి తీసుకుంటే రుచిగా కూడా ఉంటుంది. చర్మంపై ఉపయోగించాలనుకునే వారు సొరకాయ రసంలో రోజ్ వాటర్ కలిపి ఫేస్ మాస్క్లా అప్లై చేయవచ్చు. కళ్ల కింద ఉన్న మచ్చలను తగ్గించడానికి అలాగే కళ్ళ మీద పెట్టుకుంటే చల్లగా ఉపశమనం ఇస్తుందని తెలుపుతున్నారు.
అయితే, ఇది హోమ్ రమెడీ మాత్రమే. అన్ని రకాల చర్మాలకు ఇది ఒకే విధంగా పనిచేస్తుందని శాస్త్రీయంగా నిర్ధారించబడలేదు. ముఖ్యంగా సున్నితమైన చర్మం (Sensitive Skin) ఉన్నవారు ముందుగా ప్యాచ్ టెస్ట్ చేయడం మంచిది. మొటిమలు, ఎర్రదనం లేదా అలర్జీ వంటి సమస్యలు ఉన్నవారు డెర్మటాలజిస్ట్ సలహా తీసుకోవడం ఉత్తమం.
సొరకాయను చర్మ సంరక్షణలో భాగంగా ఉపయోగించడం ప్రయోజనకరంగా ఉండొచ్చు కానీ అది ఒక పూర్తిస్థాయి వైద్య చికిత్స కాదు. రోజువారీ ఆహారం, నీటి మోతాదు, నిద్ర, సరైన స్కిన్ కేర్ రొటీన్ను పాటించడం కూడా అవసరం అని నిపుణులు గుర్తు చేస్తున్నారు.
ఇది కేవలం అవగాహనకు మాత్రమే అందిస్తున్న సమాచారం నీ శరీరాన్ని బట్టి ముందుగా మీ డెర్మటాలజిస్ట్ సలహా మేరకు పాటించాల్సిందిగా మనవి.
