తెలంగాణ రాష్ట్ర ప్రభుత్వం గల్ఫ్ దేశాల్లో పని చేస్తున్న రాష్ట్ర కార్మికుల సంక్షేమం కోసం సమగ్ర ఎన్నారై పాలసీ (ప్రవాసీ విధానం) రూపకల్పన దిశగా కీలకమైన అడుగులు వేస్తుంది. ఈ నేపథ్యంలో ఎన్నారై అడ్వయిజరీ కమిటీ దేశంలోని ఇతర రాష్ట్రాలు అమలు చేస్తున్న విజయవంతమైన మోడళ్లను పరిశీలించేందుకు ఢిల్లీ, కేరళ రాష్ట్రాలకు అధ్యయన పర్యటనలు చేపట్టనుంది.
ఈ విషయం గురించి కమిటీ చైర్మన్ అంబాసడర్ డా. బి.ఎం. వినోద్ కుమార్, వైస్ చైర్మన్ మంద భీంరెడ్డి ఒక సంయుక్త ప్రకటన విడుదల చేశారు. తెలంగాణ అవసరాలకు తగిన విధంగా సమగ్ర ఎన్నారై పాలసీ రూపొందించడమే ఈ పర్యటనల ప్రధాన ఉద్దేశమని వారు స్పష్టం చేశారు.
డా. వినోద్ కుమార్ మాట్లాడుతూ — గల్ఫ్ దేశాల్లో తెలంగాణవాసులు కష్టపడుతున్నారు. వారి సమస్యలు, భద్రత, కుటుంబాల సంక్షేమం వంటి అంశాలపై సమగ్ర విధానం అవసరం. అందుకే ఇతర రాష్ట్రాల అనుభవాలను, కేంద్ర పథకాలను సమీక్షించి తెలంగాణకు తగిన మార్గదర్శక విధానం రూపొందిస్తాం అని పేర్కొన్నారు.
పర్యటనల ప్రణాళిక
నవంబర్ చివరి వారంలో ఢిల్లీలోని విదేశాంగ మంత్రిత్వ శాఖ ఉన్నతాధికారులతో ఎన్నారై అడ్వయిజరీ కమిటీ సభ్యులు సమావేశం కానున్నారు. ఈ సందర్భంగా కేంద్ర ప్రభుత్వం ప్రవాస భారతీయుల కోసం అమలు చేస్తున్న సురక్షా, స్వదేశ్, ఇమిగ్రేషన్ ఫెసిలిటేషన్ సర్వీసెస్, ఇండియన్ కమ్యూనిటీ వెల్ఫేర్ ఫండ్ వంటి పథకాల అమలు విధానం ఫలితాలను సమీక్షించనున్నారు.
తదుపరి డిసెంబర్ రెండవ వారంలో కేరళ పర్యటనలో భాగంగా ఆ రాష్ట్ర ప్రభుత్వం గల్ఫ్ కార్మికుల కోసం విజయవంతంగా నడుపుతున్న నోర్కా (NORKA - Non Resident Keralites Affairs)కార్యక్రమాలను ప్రత్యక్షంగా అధ్యయనం చేయనున్నారు. ఈ సందర్భంగా కేరళ నోర్కా అధికారులు, స్వచ్ఛంద సంస్థల ప్రతినిధులతో సమావేశాలు ఏర్పాటు చేయబడతాయి.
ఎన్నారై పాలసీ లక్ష్యాలు
తెలంగాణ ఎన్నారై పాలసీ ప్రధానంగా గల్ఫ్ దేశాల్లో పనిచేస్తున్న కార్మికులకు
భద్రత, ఆరోగ్య పరిరక్షణ
న్యాయ సహాయం,
విద్యా, ఉపాధి అవకాశాలూ
పునరావాస సౌకర్యాలు,
పరదేశంలో మృతిచెందిన కార్మికుల కుటుంబాలకు సహాయం వంటి అంశాలను దృష్టిలో ఉంచుకొని రూపొందించబడనుంది.
వైస్ చైర్మన్ మంద భీంరెడ్డి మాట్లాడుతూ — గల్ఫ్ ప్రాంతంలో తెలంగాణ వర్కర్ల పరిస్థితి ప్రత్యేక దృష్టి కావాలి. చాలా మంది పాస్‌పోర్టులు, లీగల్ సపోర్ట్, ఇన్సూరెన్స్ లేక ఇబ్బందులు ఎదుర్కొంటున్నారు. ఈ పాలసీ వాటిని పరిష్కరించడంలో గేమ్ ఛేంజర్ అవుతుంది అని తెలిపారు.
సమగ్ర రూపకల్పన దిశగా
ఈ అధ్యయన పర్యటనల అనంతరం ఎన్నారై అడ్వయిజరీ కమిటీ తెలంగాణ ప్రభుత్వం ముందు సమగ్ర నివేదిక సమర్పించనుంది. ఆ నివేదిక ఆధారంగా పాలసీకి రూపం ఇవ్వడం తదుపరి అమలు కోసం ప్రత్యేక యాక్షన్ ప్లాన్ సిద్ధం చేయనున్నారు.
తెలంగాణ ప్రభుత్వం చేపడుతున్న ఈ ప్రయత్నం రాష్ట్రం నుండి గల్ఫ్ దేశాలకు వలస వెళ్ళిన వందలాది మంది కార్మికులకు కొత్త భరోసా కలిగించే దిశగా కీలక ముందడుగుగా పరిగణించబడుతోంది.
