- విదేశాల్లో ఉన్న భారతీయులకు స్వదేశంలో ఇన్వెస్ట్ చేసే గోల్డెన్ ఛాన్స్..
- నిర్మలమ్మ మాస్టర్ ప్లాన్..
కేంద్ర ఆర్థిక మంత్రి నిర్మలా సీతారామన్ నేడు పార్లమెంటులో 2026-27 ఆర్థిక సంవత్సరానికి సంబంధించిన బడ్జెట్ను ప్రవేశపెట్టారు. ఈ బడ్జెట్లో సామాన్యులకే కాకుండా, విదేశాల్లో ఉంటున్న భారతీయులకు (NRIs) కూడా అదిరిపోయే శుభవార్త చెప్పారు. ముఖ్యంగా భారత స్టాక్ మార్కెట్పై నమ్మకంతో పెట్టుబడులు పెట్టాలనుకునే ఎన్నారైలకు కేంద్రం పెద్ద పీట వేసింది. విదేశీ మూలధనాన్ని ఆకర్షించడం ద్వారా దేశ ఆర్థిక మార్కెట్లను మరింత బలోపేతం చేయడమే ఈ నిర్ణయం వెనుక ఉన్న ప్రధాన ఉద్దేశ్యం. ఈ బడ్జెట్ ప్రతిపాదనల్లోని ముఖ్యాంశాలు మరియు దాని ప్రభావంపై పూర్తి విశ్లేషణ ఇక్కడ ఉంది.
ఇప్పటివరకు ఎన్నారైలు భారతీయ కంపెనీల ఈక్విటీలలో పెట్టుబడి పెట్టాలంటే కొన్ని కఠిన పరిమితులు ఉండేవి. ఆ నిబంధనలను సడలిస్తూ ఆర్థిక మంత్రి కీలక ప్రకటన చేశారు. గతంలో భారత కంపెనీల ఈక్విటీల్లో ఎన్నారైల పెట్టుబడి పరిమితి కేవలం 10 శాతంగా మాత్రమే ఉండేది. ఇప్పుడు దానిని ఏకంగా 24 శాతానికి పెంచారు. ఈ నిర్ణయం వల్ల విదేశాల్లో స్థిరపడిన భారతీయులు మన దేశీయ కంపెనీల్లో మరిన్ని వాటాలను కొనుగోలు చేసే అవకాశం దక్కుతుంది. ఇది స్టాక్ మార్కెట్లో లిక్విడిటీని (నగదు లభ్యతను) పెంచుతుంది.
కేవలం నేరుగా షేర్లు కొనడమే కాకుండా, పోర్ట్ఫోలియో మేనేజ్మెంట్ సర్వీసెస్ ద్వారా పెట్టుబడి పెట్టే వారికి కూడా కేంద్రం ఊరటనిచ్చింది. లిస్టెడ్ కంపెనీల్లో పీఎంఎస్ ద్వారా పెట్టుబడి పెట్టే పరిమితిని గతంలో ఉన్న 5 శాతం నుండి 10 శాతానికి పెంచారు. దీనివల్ల ఎన్నారైలు తమ నిధులను నిపుణులైన ఫండ్ మేనేజర్ల ద్వారా మరింత సమర్థవంతంగా భారత మార్కెట్లో మదుపు చేయవచ్చు.
ప్రస్తుతం ప్రపంచ ఆర్థిక వ్యవస్థలో అనిశ్చితి ఉన్నప్పటికీ, భారత మార్కెట్ స్థిరంగా రాణిస్తోంది. ఈ తరుణంలో కేంద్రం తీసుకున్న ఈ నిర్ణయం గేమ్ చేంజర్ కానుంది. చైనా వంటి దేశాల నుండి పెట్టుబడులు వెనక్కి వెళ్తున్న సమయంలో, ఆ పెట్టుబడులను భారత్ వైపు మళ్లించడానికి ఎన్నారైల ద్వారా వచ్చే నిధులు ఎంతగానో దోహదపడతాయి. విదేశీ కరెన్సీ నిల్వలు పెరగడం వల్ల రూపాయి విలువ మరింత స్థిరపడే అవకాశం ఉంది.
కంపెనీలకు నిధుల సేకరణ సులభమవుతుంది, తద్వారా కొత్త ఉద్యోగాల సృష్టి జరుగుతుంది. మొత్తానికి నిర్మలా సీతారామన్ ప్రవేశపెట్టిన ఈ బడ్జెట్ "మదుపర్ల బడ్జెట్"గా కనిపిస్తోంది. ఎన్నారైలకు కల్పించిన ఈ వెసులుబాటు వల్ల భారత స్టాక్ మార్కెట్లకు కొత్త కళ రానుంది. ఒకవైపు దేశీయ వృద్ధిని పెంచుతూనే, మరోవైపు ప్రపంచ వేదికపై భారత ఆర్థిక మార్కెట్లను తిరుగులేని శక్తిగా మార్చడమే ఈ బడ్జెట్ సారాంశం.
డేటా సెంటర్ల ఏర్పాటుపై శుభవార్త..
భారతదేశంలో డేటా సెంటర్లను ఏర్పాటు చేసే సంస్థలకు కేంద్ర ప్రభుత్వం శుభవార్త చెప్పింది. 2047 వరకు డేటా సెంటర్లను ఏర్పాటు చేసే సంస్థలకు ట్యాక్స్ హాలీడే ప్రకటిస్తున్నట్లు నిర్మలా సీతారామన్ తెలిపారు. ఈ ట్యాక్స్ హాలీడే నిర్ణయంతో క్లౌడ్ సేవల సంస్థలకు భారీ ప్రయోజనం చేకూరనుంది.
గంటన్నర పాటు సాగిన నిర్మలా సీతారామన్ ప్రసంగం..
2026-27 ఆర్థిక సంవత్సరానికి గాను నిర్మలా సీతారామన్ లోక్సభలో 11 గంటలకు బడ్జెట్ ప్రసంగాన్ని ప్రారంభించారు. సుమారు గంటన్నర పాటు ఆమె ప్రసంగం సాగింది.
