భారత్లో 10 లక్షల ఉద్యోగాల సృష్టికి భారత్-నార్వే ఒప్పందాలు..
గ్రీన్ ఎనర్జీ, బ్లూ ఎకానమీ రంగాల్లో పెట్టుబడులకు మోదీ ఆహ్వానం..
నార్వే పర్యటనలో భారత ప్రధాని నరేంద్ర మోదీ కీలక ఆర్థిక లక్ష్యాలతో ముందుకు సాగుతున్నారు. ఒస్లోలో నార్వే ప్రధాని జోనాస్ గార్ స్టోర్తో కలిసి ఇండియా-నార్వే బిజినెస్ అండ్ రీసెర్చ్ సమ్మిట్లో పాల్గొన్న ప్రధాని మోదీ, రెండు దేశాల మధ్య వాణిజ్య మరియు పెట్టుబడి సంబంధాలను మరింత బలోపేతం చేసే దిశగా కీలక సందేశాలు ఇచ్చారు. ఈ సమావేశంలో నార్వే క్రౌన్ ప్రిన్స్ హాకోన్ కూడా పాల్గొన్నారు. భారత్, నార్వేలకు చెందిన 50కిపైగా కంపెనీల సీఈఓలు, 250 మందికిపైగా వ్యాపార, పరిశోధన రంగ ప్రతినిధులు హాజరయ్యారు.
సమ్మిట్లో మాట్లాడిన ప్రధాని మోదీ, ట్రేడ్ అండ్ ఎకనామిక్ పార్ట్నర్షిప్ అగ్రిమెంట్ (TEPA) అమల్లోకి వచ్చిన తర్వాత రెండు దేశాల మధ్య వాణిజ్యం, పెట్టుబడులు గణనీయంగా పెరిగాయని చెప్పారు. ఈ ఒప్పందం కింద 100 బిలియన్ డాలర్ల పెట్టుబడులను లక్ష్యంగా పెట్టుకుని, భారత్లో 10 లక్షల ఉద్యోగాలు సృష్టించే దిశగా కలిసి పనిచేయాలని పిలుపునిచ్చారు.
భారత్లో ప్రస్తుతం పెట్టుబడులకు అనుకూల వాతావరణం ఉందని ప్రధాని మోదీ పేర్కొన్నారు. యువత ప్రతిభ, వ్యాపార స్నేహపూర్వక విధానాలు, పెట్టుబడిదారులకు అనుకూలమైన నిబంధనలు నార్వే కంపెనీలకు పెద్ద అవకాశాలను అందిస్తున్నాయని తెలిపారు. ముఖ్యంగా బ్లూ ఎకానమీ, షిప్ బిల్డింగ్, గ్రీన్ ఎనర్జీ, హెల్త్ టెక్నాలజీ, స్టార్టప్లు, క్రిటికల్ మినరల్స్, గ్రీన్ టెక్నాలజీ వంటి రంగాల్లో నార్వే పెట్టుబడులు పెంచాలని కోరారు.
ఇండియా-నార్వే సంబంధాలను ‘గ్రీన్ స్ట్రాటజిక్ పార్ట్నర్షిప్’ స్థాయికి తీసుకెళ్లిన నేపథ్యంలో, పర్యావరణ హిత అభివృద్ధి లక్ష్యాలను ప్రధాని మోదీ ప్రస్తావించారు. పునరుత్పాదక ఇంధనం, గ్రీన్ హైడ్రోజన్, విద్యుత్ మౌలిక వసతులు, స్వచ్ఛ ఇంధన రంగాల్లో భారత్ వేగంగా ముందుకు సాగుతోందని తెలిపారు. సముద్ర వనరుల పరిరక్షణ, క్లీన్ ఎనర్జీ పెట్టుబడులు, క్లైమేట్ ఫైనాన్స్ రంగాల్లో నార్వే ప్రపంచానికి ఆదర్శంగా నిలుస్తోందని ప్రశంసించారు.
ఈ సందర్భంగా రెండు దేశాల ప్రభుత్వాలు, ప్రైవేట్ సంస్థల మధ్య పలు వ్యాపార ఒప్పందాలు కుదిరాయి. అంతరిక్షం, డిజిటల్ పబ్లిక్ ఇన్ఫ్రాస్ట్రక్చర్, సస్టైనబిలిటీ, టన్నెలింగ్ టెక్నాలజీ, హెల్త్, అడ్వాన్స్డ్ టెక్నాలజీ రంగాల్లో ఈ ఒప్పందాలు జరిగాయి.
తర్వాత జరిగిన మీడియా సమావేశంలో విదేశాంగ శాఖ కార్యదర్శి సిబి జార్జ్ మాట్లాడుతూ, ఈ పర్యటనతో భారత్-నార్వే సంబంధాలు మరింత బలపడినట్లు తెలిపారు. గ్రీన్ మరియు బ్లూ ఎకానమీ రంగాల్లో భాగస్వామ్యం ద్వారా పెట్టుబడులు, ఉపాధి అవకాశాలు పెరగడంతో పాటు, భారత్కు ఇంధన భద్రత కూడా బలపడుతుందని చెప్పారు.
వికసిత భారత్ లక్ష్యానికి అవసరమైన మూడు ముఖ్యమైన అంశాలు — ట్రేడ్ అండ్ ఇన్వెస్ట్మెంట్, టెక్నాలజీ, టాలెంట్ — ఈ పర్యటన ద్వారా మరింత బలపడినట్లు భారత విదేశాంగ శాఖ పేర్కొంది. సమ్మిట్కు ముందు ఒస్లోలో ఆరోగ్య సాంకేతికత, సముద్ర సహకారం, బ్యాటరీలు, ఎనర్జీ స్టోరేజ్, డిజిటలైజేషన్, విండ్ ఎనర్జీ వంటి అంశాలపై ప్రత్యేక రౌండ్టేబుల్ సమావేశాలు కూడా నిర్వహించారు.
