హైదరాబాద్లోని రాజీవ్ గాంధీ అంతర్జాతీయ విమానాశ్రయం (RGIA) లో ఇండిగో ఎయిర్లైన్స్ (IndiGo Airlines) సేవల్లో ఏర్పడిన అంతరాయం వరుసగా నాలుగో రోజు కూడా కొనసాగుతోంది. శుక్రవారం నాడు ఇండిగో ఏకంగా 92 విమానాలను రద్దు చేయడంతో, వేలాది మంది ప్రయాణికులు తీవ్ర ఇబ్బందులకు గురయ్యారు. గత నాలుగు రోజుల్లో ఇంత పెద్ద సంఖ్యలో విమానాలు రద్దు కావడం ఇదే తొలిసారి.
ఇండిగో ఎయిర్లైన్స్ గత కొన్ని రోజులుగా తమ కార్యకలాపాలలో ఎదుర్కొంటున్న సమస్యను అదుపులోకి తేలేకపోయింది. ఈరోజు రద్దు చేసిన 92 విమానాల్లో 43 రాకపోకల సర్వీసులు మరియు 49 బయలుదేరే సర్వీసులు ఉన్నాయి.
ఈ నెల 2 నుంచి ఇప్పటివరకు ఇండిగో మొత్తం 220 సర్వీసులను నిలిపివేసింది. నిన్న (గురువారం) కూడా 74 విమానాలను రద్దు చేసిన విషయం తెలిసిందే.
విశాఖపట్నం విమానాశ్రయంలో కూడా 8 ఇండిగో విమానాలు రద్దయ్యాయి. చెన్నై, బెంగళూరు, అహ్మదాబాద్ వంటి నగరాలకు సర్వీసులు నిలిచిపోవడంతో అక్కడ కూడా ప్రయాణికులు నిరసన తెలిపారు.
వరుస రద్దులతో విసిగిపోయిన ప్రయాణికులు ఈరోజు శంషాబాద్ టెర్మినల్ భవనంలో ఆందోళనకు దిగారు. పరిస్థితి అదుపు తప్పేలా కనిపించింది.
ప్రయాణికులు ఇండిగో సిబ్బందితో తీవ్ర వాగ్వాదానికి దిగారు. తమ ప్రశ్నలకు సరైన సమాధానం చెప్పాలంటూ సిబ్బందిని నిలదీశారు.
"చెక్-ఇన్ ప్రక్రియ పూర్తయ్యాక విమానాలను రద్దు చేస్తున్నారని కొందరు ప్రయాణికులు ఆరోపించారు. సిబ్బంది అందుబాటులో లేనప్పుడు విమానాలను ఎందుకు షెడ్యూల్ చేస్తున్నారని" ప్రశ్నిస్తూ, "షీమ్ షీమ్" (Shame Shame) అంటూ నినాదాలు చేశారు.
ముఖ్యంగా కొచ్చి వెళ్లాల్సిన విమానాలు రద్దు కావడంతో అయ్యప్ప భక్తులు పెద్ద సంఖ్యలో విమానాశ్రయంలో చిక్కుకుపోయారు. వారు "స్వామియే శరణం అయ్యప్ప" అంటూ నినాదాలతో తమ నిరసనను వ్యక్తం చేశారు.
ఈ గందరగోళం మధ్యే, విజయవాడ వెళ్లేందుకు విమానాశ్రయానికి చేరుకున్న ఏపీ మంత్రి కొలుసు పార్థసారథి, అయ్యప్ప భక్తుల సమస్యపై తక్షణమే స్పందించారు.
ఆయన వెంటనే కేంద్ర పౌర విమానయాన శాఖ మంత్రి రామ్మోహన్ నాయుడుతో ఫోన్లో మాట్లాడారు. కొచ్చికి వెళ్లాల్సిన భక్తుల కోసం ప్రత్యేక విమానం (Special Flight) ఏర్పాటు చేయాలని ఆయన కేంద్రాన్ని కోరారు.
అయితే, ఈ గందరగోళం కారణంగా తన విమానాన్ని అందుకోలేకపోయిన మంత్రి పార్థసారథి, చివరకు రోడ్డు మార్గంలోనే విజయవాడకు బయలుదేరి వెళ్లారు. ఈ పరిణామాలపై ఇండిగో సంస్థ మరోసారి స్పందించింది.
సాంకేతిక లోపాలు, శీతాకాలం కారణంగా షెడ్యూళ్లలో మార్పులు, వాతావరణ సమస్యలు, విమాన రాకపోకల్లో రద్దీ మరియు సిబ్బంది డ్యూటీ సమయాలపై కొత్త నిబంధనల (FDTL) అమలు వంటి అనేక కారణాల వల్ల ఈ అంతరాయం ఏర్పడిందని ఇండిగో వివరణ ఇచ్చింది.
ప్రయాణికులు విమానాశ్రయానికి బయలుదేరే ముందు తమ విమాన స్థితిని (Flight Status) తప్పనిసరిగా తెలుసుకోవాలని ఆర్జీఐఏ అధికారులు సూచించారు.
