కర్ణాటకలో మహిళా 'మ్యూల్ హెర్డర్' గుట్టురట్టు..
విదేశీ ప్రయాణాల పేరుతో నమ్మించి..
బ్యాంక్ ఖాతా ఇస్తే కొంపమునిగింది..
Cyber Fraud Karnataka: కర్ణాటకలో ఒక మహిళ తన భర్త స్నేహితుడి బ్యాంక్ ఖాతాను దుర్వినియోగం చేస్తూ సుమారు రూ. 70.85 లక్షల మేర సైబర్ మోసానికి పాల్పడిన ఘటన సంచలనం సృష్టిస్తోంది. నిందితురాలిని ప్రతిమ కుమార్గా గుర్తించిన బెంగళూరు సైబర్ క్రైమ్ పోలీసులు ఆమెపై కేసు నమోదు చేశారు. ఈ మోసం వెనుక పెద్ద ఎత్తున 'మ్యూల్ అకౌంట్స్' (Mule Accounts) నెట్వర్క్ ఉన్నట్లు పోలీసులు అనుమానిస్తున్నారు. బాధితుడు తన భర్తకు 15 ఏళ్లుగా పరిచయం ఉన్న వ్యక్తి కావడంతో, ఆ చొరవతోనే ఆమె ఈ భారీ స్కామ్కు స్కెచ్ వేసినట్లు ప్రాథమిక విచారణలో తేలింది.
నిందితురాలు గత డిసెంబర్ నెలలో బాధితుడిని కలిసి, తనకు విదేశీ ప్రయాణాలు మరియు సాహస యాత్రల (Adventure Events) నిర్వహణ కోసం బ్యాంక్ ఖాతా అవసరమని నమ్మబలికింది. దీనికోసం బాధితుడి కరెంట్ అకౌంట్ వివరాలు, నెట్ బ్యాంకింగ్ ఐడీ, పాస్వర్డ్ మరియు బ్యాంకుతో అనుసంధానమైన మొబైల్ నంబర్ను వాట్సాప్ ద్వారా సేకరించింది. ఈ లావాదేవీలకు సంబంధించి జీఎస్టీ మరియు ఇతర పన్నులను తానే చెల్లిస్తానని హామీ ఇవ్వడంతో, బాధితుడు ఆమెను నమ్మి వివరాలన్నీ అప్పగించాడు. అయితే, ఆ తర్వాత ఆమె అసలు రంగు బయటపెట్టింది.
బ్యాంక్ వివరాలు చేజిక్కించుకున్న వెంటనే, ప్రతిమ ఆ ఖాతాకు లింక్ అయి ఉన్న మొబైల్ నంబర్ను మార్చివేసింది. తద్వారా ఖాతాలో జరిగే లావాదేవీల సమాచారం బాధితుడికి తెలియకుండా జాగ్రత్త పడింది. ఫిబ్రవరి 3వ తేదీన కేవలం ఒక్కరోజులోనే ఆ ఖాతా ద్వారా ఏకంగా రూ. 70,85,137 విలువైన లావాదేవీలను నిర్వహించింది. ఈ డబ్బు అంతా ఇతర సైబర్ నేరాల ద్వారా వచ్చిన అక్రమ సొమ్ముగా (Cyber Proceeds) పోలీసులు భావిస్తున్నారు. అంటే, ఇతర బాధితుల నుండి దోచుకున్న సొమ్మును ఈ ఖాతాలోకి మళ్ళించి, అక్కడి నుండి వేరే చోటికి తరలించే 'మ్యూల్' పద్ధతిని ఆమె ఉపయోగించింది.
జాతీయ సైబర్ క్రైమ్ పోర్టల్లో నమోదైన ఫిర్యాదుల ఆధారంగా విచారణ చేపట్టిన అధికారులకు ఈ అనుమానాస్పద లావాదేవీలు కనిపించాయి. పోలీసులు నేరుగా బాధితుడి ఇంటికి వెళ్లి విచారించడంతో ఈ మొత్తం వ్యవహారం వెలుగులోకి వచ్చింది. తన ఖాతాను నిందితురాలు ఏ విధంగా వాడుకుందో తెలుసుకున్న బాధితుడు దిగ్భ్రాంతికి గురై పోలీసులకు ఫిర్యాదు చేశాడు. నిందితురాలిపై భారతీయ న్యాయ సంహిత (BNS) మరియు ఐటీ చట్టం కింద పలు సెక్షన్ల ప్రకారం పోలీసులు కేసు నమోదు చేశారు. ఈమె వెనుక ఉన్న మరికొంత మంది 'మ్యూల్ హెర్డర్స్' కోసం పోలీసులు గాలిస్తున్నారు.
ప్రస్తుతం కర్ణాటక సైబర్ కమాండ్ విభాగం రాష్ట్రవ్యాప్తంగా ఇటువంటి నకిలీ మరియు మ్యూల్ ఖాతాలపై ప్రత్యేక నిఘా పెట్టింది. సైబర్ నేరగాళ్లు సామాన్యులను నమ్మించి వారి బ్యాంక్ వివరాలను సేకరించి, ఆ ఖాతాలను అక్రమ లావాదేవీలకు వాడుకుంటున్నారని అధికారులు హెచ్చరిస్తున్నారు. కేవలం ఈ ఒక్క కేసే కాకుండా, రాష్ట్రవ్యాప్తంగా సుమారు 869 మ్యూల్ ఖాతాలను గుర్తించి, రూ. 13 కోట్లకు పైగా నిధులను ఫ్రీజ్ చేసినట్లు పోలీసులు వెల్లడించారు. పరిచయం ఉన్న వారికైనా సరే బ్యాంక్ లాగిన్ వివరాలు (Net Banking), ఓటీపీలు పంచుకోవడం ఎంత ప్రమాదకరమో ఈ ఘటన హెచ్చరిస్తోంది.
